سەرۆك مەسعود بارزانی دوھی ل سەلاحەدین پێشوازی ل ئەندامێن جڤاتا پشتەڤانییا پارێزگەها هەلەبجە كر.
شاندێ مێهڤان ب ناڤێ خەلكێ هەلەبجە سوپاس و پێزانین بۆ ڕۆلێ سەرۆك بارزانی هەبوون» بۆ بزاڤێن وی بۆ پارێزگەهبوونا هەلەبجە و ئەو خزمەتگوزارییێن كو پێشتر پێشكێشی هەلەبجە هاتینە كرن، هەروەسا سوپاسییا سەرۆكاتییا هەرێمێ و حكومەتا هەرێمێ و پەرلەمان و نوونەرێن هەرێما كوردستانێ ل بەغدا كر، كو پێكڤە بزاڤێن ڕژد دكرن بۆ سەرئێخستنا پارێزگەهبوونا هەلەبجە، هەروەسا داخواز كر سەرۆك بارزانی بەردەوام پشتەڤانییا هەلەبجە و خزمەتگوزارییێن زێدەتر بۆ دەڤەرا وان ب رێیا دەزگەھێن هەرێمێ بكەت.
سەرۆك بارزانی ب گەرمی بخێرهاتنا شاندێ مێهڤان كر و زێدەباری ئاماژەدان ب مێژوو و قوربانیدانا هەلەبجە و گۆت: پارێزگەهبوونا هەڵەبجە ب تنێ بابەتەكێ مەعنەویە و ژ پێخەمەت گەهاندنا خزمەتگوزارییێن زێدەترە بۆ قوربانیدان و مەزناتییا هەلەبجە ناهێتە هەڤبەر كرن.
ئاماژە ژی کر كو ب شانازی ڤە ئەو خۆ ب ئەندامەكێ جڤاتا پشتەڤانییا پارێزگەها هەلەبجە دزانیت و ئەركێ دامودەزگەھێن هەرێمێ یە ئەوا د شیانێن وان دابیت بۆ خزمەتكرنا هەلەبجە ئەنجام بدەن.
هەروەسا سەرۆك بارزانی رەوشا سیاسی و پەیوەندییێن د ناڤبەرا هەرێما كوردستانێ و حكومەتا ئیراقا فیدرال دا باسكرن.

ژبەر مالئاڤاهییا محسن سالح ئامێدی، پێشمەرگەی هەردو شۆڕەشێن ئیلۆن و گۆلانێ و هەلگرێ مەدالییا بارزانیێ نەمر، سەرۆك بارزانی سەرساخی ل محەمەد محسن ئامێدی كوڕێ خودێ ژێ رازی و بنەمالا وان كر.
بارەگەهێ بارزانی بەلاڤكر» سەرۆك مەسعود بارزانی، ژ بەر مالئاڤاهییا محسن ئامێدی، پێشمەرگێ هەردو شۆڕەشێن ئیلۆن و گولانێ، سەرساخی ل محەمەد محسن كوڕێ خودێ ژێ رازی و بنەمالا وان كر».

نێچیرڤان بارزانی، سەرۆكێ هەرێما كوردستانێ، ب مەبەستا مالئاڤاهیكرنێ، پێشوازی ل ئانو سارێلا، بالیۆزا فینلەندا ل ئیراقێ كر.
د دیدارەكێدا نێچیرڤان بارزانی، ژ بەر ئەرك و بزاڤێن وێ ژ پێخەمەت پێشڤەبرنا هەڤبەندیێن وەلاتێ خوە ل گەل ئیراقێ، سوپاسی و پێزانین پێشكێشی سارێلا كر و هیڤییا سەركەفتنێ د ئەركێ وێ یێ نوو دا بۆ خواست، هەروەسا خواستا هەرێما كوردستانێ بۆ زێدەتر ب هێزكرنا هەڤبەندییان و هاریكارییا هەڤپشك ل گەل فینلەندا دوپاتكر. ژ ئالیێ خوەڤە سارێلا هاریكارییا ئالیێن پەیوەندیدارێن هەرێمێ ل د دەمێ كاركرنا وێدا بلند هەلسەنگاند و دوپاتكر كو وەلاتێ وێ ب گرنگی دنێریتە پەیوەندیێن خوە ل گەل ئیراقێ و هەرێما كوردستانێ.

نێچیرڤان بارزانی، سەرۆكێ هەرێما كوردستانێ، ل دەمێ پێشوازیكرنێ ل د. محەمەد ئەلحەسان، سەرۆكێ نوو یێ نوونەرایەتییا نەتەوەیێن ئێكگرتی ل ئیراقێ (یونامی) راگەهاند» هەرێما كوردستانێ تاكو ب دووماهی هاتنا ئەركێ یونامی، هەموو جۆرە پشتەڤانییەكێ و ئاسانكارییەكێ پێشكێش دكەت».
د كۆمبوونەكێدا هەردو ئالییان دوپاتی ل چارەسەركرنا كێشەییێن د ناڤبەرا هەولێرێ وبەغدایێ دا كر، رەوشا سیاسییا ئیراقێ و هەرێما كوردستانێ، هەماهەنگییا د ناڤبەرا (یونامی) و ئالیێن پەیوەندیدار و دوماهی پێشهاتێن رۆژهەلاتا ناڤین و كاریگەریێن وان هاتنە گەنگەشە كرن.
نێچیرڤان بارزانی سوپاسییا هەرێمێ بۆ رۆلێ نەتەوەیێن ئێكگرتی ل ئیراقێ و هەرێما كوردستانێ دوپاتكر و بەرهەڤی نیشادا بۆ پێشكێشكرنا هەموو ئاسانكارییان و هەماهەنگی و پشتەڤانییەكا پێدڤی هەتا ب دووماهی هاتنا ئەركێ وان.
ژ ئالیێ خوەڤە د. محەمەد ئەلحەسان هاریكارییا ئالیێن هەرێما كوردستانێ بلند هەلسەنگاند و دوپاتی ل گرنگییا پاراستنا ئیراقێ ژ كێشە و ئالۆزیێن دەڤەرێ كر.
هەردو ئالی د هەڤڕابوون ل سەر وێ چەندێ كو چارسەركرنا كێشەیێن هەولێرێ – بەغدایێ و گەهشتن ب تێكگەهشتنێ، د بەرژەوەندییا هەموو ئیراقێدایە و خزمەتا پاراستنا ئارامیێ و گەشەكرنا وەلاتی دكەت.

نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ، جودا پشكداری د بەهییا محسن سالح ئامێدی، پێشمەرگێ شۆڕەشێن ئیلۆن و گۆلانێ و هەلگرێ مەدالییا بارزانی و كەسایەتیێ ناڤدارێ دەڤەرێ دا كر.
سەرۆكێ هەرێمێ و سەرۆكێ حوكمەتا هەرێمێ سەرەخوەشی و هەڤخەمییا خوە گەهاندە مالبات و كەسوكارێن رەحمەتی و هیڤی خواستن، خودایێ مەزن گیانی وی ب بەحەشتا بەرین شاد بكەت و ئارامیێ و هەداری ب بنەمال و كەسوكار و هەڤالێن وی ببەخشیت.
بنەمالا محسن سالح ئامێدی، سوپاسییا هەڤخەمی و بەرهەڤبوونا نێچیرڤان بارزانی و مەسرور بارزانی د بەهیێدا دیاركر.

وەزارەتا ناڤخوە ل حوكمەتا هەرێما كوردستانێ راگەهاند: هیچ بنگەهەكێ ئیسرائیلی ل هەرێما كوردستانێ نینە و ئەو دەنگوباسێن گوتین كو هێرش ل سەر بنگەهەكێ ئیسرائیلی ل سنوورێ پارێزگەها هەولێرێ، د راست نینن.
ب گۆڕەی بەیاننامەیەكا وەزارەتا ناڤخوە ل حوكمەتا هەرێما كوردستانێ» ل چەند میدیایێن ئەلكترۆنی یێن فەرمی ل ئیرانێ وەسا هاتیە بەلاڤكرن كو بەری چەند شەڤان ب درۆنان هێرش ل سەر بنگەهەكێ سەر ب ئیسرائیلێ ڤە هاتیە كرن».
وەزارەتا ناڤخوە ئەو دەنگوباس رەتكرن و دیاركر» د بێ بنەمانە و د دوورن ژ راستیێ، نە بنگەهێن ئیسرائیلی ل كوردستانێ هەنە و نە ئۆپەراسیۆنێن وەسا هاتینە ئەنجامدان».
د بەیاننامەیا وەزارەتا ناڤخوە دا هاتیە ژی» ل شەڤا 3/7/2025 درۆنەك ل دەڤەرەكا چۆل ل نێزیك هەولێرێ كەفتە خوارێ، ئەڤ هێرشە ژی ژ ئالیێ هندەك گرۆپێن سەر ب حەشدا شەعبی ب مەبەستا دروستكرنا ئاژاوێ دهێنە ئەنجامدان، پێدڤییە ئالیێن پەیوەندیدار ل حوكمەتا فیدرالی سنوورەكی بۆ ڤان كارێن تێكدەرانە دانن و پێرابوونێن قانوونی بەرامبەر تاوانباران بهێنە وەرگرتن».
د بەیاننامەیەكا كورتدا كو شەڤا 3/7/2025 بەلاڤكربوو، دژە تیرۆرا كوردستانێ راگەهاندبوو»» ل سات 9:58 شەڤێ، درۆنەكا مینڕێژكری ل نێزیك فرۆكخانەیا نێڤدەولەتییا هەولێرێ هاتە ئێخستن».
دژە تیرۆرا كوردستانێ د بەیاننامەیا خوە دا دیاركربوو ژی» ژ ئەنجامێ وێ روودانێ چو زیانێن گیانی و مادی نەبوون».