بسپۆرەکێ زانستێن سیاسی دیار دکەت ل سووریێ ژ ئالیێ ئەمریکا ڤە کار بۆ ئاڤاکرنا دەولەتەکا ناڤەندی دهێتە کرن لێ ئەو یەک ب دلێ ئسرائیلێ نینە و ئسرائیل ل دژی ئاڤاکرنا سیستەمەک ناڤەندی یە، ئانکو سەبارەت ب سووریێ ناکۆکیێن مەزن د ناڤبەرا ئەمریکا و ئسرائیلێ دا هەنە.

حەمید بۆزئارسلان بسپۆرێ کاروبارێن سیاسی دیار کر، هێشتا ژی سیاسەتا ئەمریکا سەبارەت ب سووریێ ب تەمامی زەلال نینە، راستە نها تۆم باراک کار بۆ ئاڤاکرنا سیستەمەک ناڤەندی دکەت، لێ گەلەک تشتێن ئەو دبێژیت ژی رۆن نینن، ئانکو ب کورتی مرۆڤ دشێت بێژیت هەتا نها ژی سیاسەتا ئەمریکا و وەلاتێن دی یێن رۆژئاڤایی سەبارەت ب سووریێ ب تەمامی رۆن نینە، چونکی ل گۆر هەر پێشهاتەکێ بەرپرسێن وان وەلاتان داخویانیێن جودا ددەن و ئەو یەک ژی نیشا ددەت هێشتا ژی سەبارەت ب پاشەرۆژا سووریێ گەلەک ناکۆکی هەنە و گۆت: (ناکۆکیێن هەری مەزن نها د ناڤبەرا ئەمریکا و ئسرائیلێ دا هەنە، چونکی ئیسرائیلێ نەڤێت ب چو رەنگەکێ دەولەتەک بهێز ل سووریێ بهێتە ئاڤاکرن، بەرپرسێن ئسرائیلێ ب رەنگەکێ ئاشکرا ل دژی ڤێ یەکێ نە و هەتا نها ئسرائیلێ گەلەک جاران ژی ئێرشی ناڤەندێن هەری گرنگ یێن سووریێ کریە و ب رەنگەکێ ئاشکرا ئەڤ پەیامە دایە ئەحمەد شەرع، کو دڤێت زێدەگاڤیان نەکەت).
بسپۆرێ کاروبارێن سیاسی ئەو یەک ژی دیار کر، سەبارەت ب رۆژئاڤایێ کوردستانێ ژی نها ناکۆکیێن گەلەک مەزن هەنە، پشتی روودانێن ل سوەیدا کوردێن سووریێ ناخوازن ببنە پشکەک ژ سیستەمێ نها یێ سووریێ، کوردان دڤێت ل سەر ئاخا خوە ب رەنگەکێ ئازاد بژین و خوە برێڤە ببەن، ئەو یەک ژی تشتەک گەلەک سروشتیە و مافەکێ رەوا یێ هەموو مللەتێن جیهانێ یە، لێ دیارە ژ بەر ناکۆکیێن سەبارەت ب پاشەرۆژا سووریێ رێگری ل داخوازیێن کوردان دهێتە کرن، ب تایبەتی ژی تورکیا رێگرە ل هەمبەر ئاڤابوونا هەرێمەکا کوردی ل سووریێ و گۆت: (هەلوەستێ تورکیا و شامێ سەبارەت ب رۆژئاڤایێ کوردستانێ دێ بیتە ئەگەرێ روودانێن گەلەک نەخوەش بۆ سووریا نوو، چونکی هەر کەس دزانیت بێی کوردان چو سیستەمەک نوو و دیموکراتی ل سووریێ ناهێتە ئاڤاکرن، خالا دی رەفتارێن ل سوەیدا ژی سەلماند لەشکرێ سووریێ ژ چەندین گرۆپێن توندرەو پێکهاتینە، کو دشێن د پاشەرۆژێ دا ببنە مەترسی بۆ هەموو خەلکێن سووریێ).
ناڤهاتی د دووماهیا ئاخڤتنا خوە دا ئەو یەک ژی نەڤەشارت، کو ئاڤاکرنا سیستەمەک نوو بۆ سووریێ بێی رازیبوونا کوردان، دورزیان و پێکهاتەیێن دی گەلەک زەحمەتە، چونکی کوردێن سووریێ ناخوازن ببنە پشکەک ژ سیستەمێ جیهادی ل سووریێ و هەکە تورکیا ژی دەست ژ سیاسەتا خوە یا شاش بەرنەدەت دێ سووریێ بەر ب چارەنڤیسەکێ نەدیار ڤە چیت.

مەسعود پزیشکیان سەرۆک کۆمارێ ئیرانێ د داخویانیەکێ دا بۆ دەزگەهێن راگەهاندنا ئیرانێ دیار کر، ئیرانێ دڤێت ل گەل ئەمریکا و وەلاتێن رۆژئاڤایێ دەست ب دانوستاندنان بکەت و هەموو پرسێن هەی ژی چارەسەر بکەت، لێ د هەمان دەمی دا ئیران دەست ژ بەرنامەیێ خوە یێ ئەتۆمی بەرنادەت، نابیت ئەمریکا و وەلاتێن ئێکەتیا ئۆرۆپا داخوازەک وەسا ژ ئیرانێ بکەن، چونکی ئیران ب چو رەنگەکێ داخوازا وان قەبوول ناکەت.
سەبارەت ب ئەگەرێ ئێرشەکا نوو ژ ئالیێ ئەمریکا و ئسرائیلێ ڤە ژی سەرۆک کۆمارێ ئیرانێ دیار کر، ئیرانێ نەڤێت شەڕێ چو ئالیەکێ بکەت، لێ هەکە ئسرائیلێ بڤێت جارەکا دی ئێرشی ئیرانێ بکەت، ئیران دێ ب هەموو هێزا خوە بەرسڤا ئسرائیلێ دەت، ئیران دشێت ڤێجارێ زیانێن گەلەک مەزنتر ژ بەری نها بگەهینتە ئسرائیلێ و گرنگە ئەمریکا ژی رێ نەدەت جارەکا دی ئسرائیل شاشیەکا وەسا بکەت.

سەرۆکێ گشتی یێ پارتا کۆماریا گەل دیار کر، پێکئینانا کۆمسیۆنەکێ ل پەرلەمانێ تورکیا ژ بۆ قووناغا ئاشتیێ گەلەک گرنگە و وەکو پارتا کۆماری وان هەتا نها پشتەڤانیا خوە بۆ قووناغا ئاشتیێ دیار کرینە و گرنگە دەستهەلاتا نها یا ئاکپارتیێ ژی ئارمانجا وێ ژ قووناغا ئاشتیێ چارەسەرکرنا پرسا کوردی بیت، نابیت ئاکپارتی پاشی هندەک تشتان ژ بۆ بەرژەوەندیێن خوە بکەت.
ئۆزگور ئۆزەل ئەو یەک ژی دیار کر، پارتا کۆماری هەر ژ دەستپێکێ هەتا نها پشتەڤانی ل قووناغا ئاشتیێ کریە، چارەسەرکرنا پرسا کوردی ژ بۆ هەموو تورکیا گرنگە، لێ مخابن هەتا نها ژی ئاکپارتی وەکو پێدڤی کار ناکەت، دڤێت ئارمانجا کۆمسیۆنا پەرلەمانێ تورکیا ئاشتی و دیموکراسی بیت، پێدڤیا تورکیا ب ئاشتیێ و پێکڤەژیانێ هەیە، دڤێت هەمی هێزێن سیاسی ژی پشکداریێ د کۆمسیۆنا پەرلەمانی دا بکەن، چونکی ئاریشا سەرەکی ل تورکیا نەبوونا دیموکراسیێ یە، سیستەمێ نها یێ ئاکپارتیێ دروستکری بوویە ئەگەرێ سەرەکی یێ گەلەک ئاریشەیان.