دهۆك، لەزگین جوقی
سیلفانا خدر، كچەكا رزگاربوویە ئێزدی یە بەحسی چێرۆكا خۆ دناڤ دەستێن تێرۆرستێن داعش دا دكەت و راگەهاند، د ژیێ 16ساڵیێ دا تیرۆرستێن داعش 12 جاران كرین و فرۆتن ب من كرن، ژبەر ئەشكەنجەدانا تێرۆرستێن داعش هەتا نوكە ئەز چارەسەریێ ل نەخۆشخانەیان وەردگرم، خێزانا من هزر نەدكرن ئەز یا ساخم، دناڤ گۆرەستانا گۆندێ كۆچۆ دا قەبرێ من چێكربوون، لێ ئەز ب ساخێ ڕزگاربووم.
سیلفانا خدر، د ژیێ 16ساڵی دا بوو دەمێ ژلایێ تێرۆرستێن داعش ڤە ل شنگالێ هاتیە گرتن و رەڤاندن بۆ رۆژناما ئەڤرۆ دیار كر، ل دەستپێكا جینۆسایدا شنگالێ دەمێ داعشا ئەم رەڤاندین، هەمی زێر و پارە و موبایل ژ مە وەرگرتن، ل دووڤدا زەلام و ژن ژیكجۆدا كرن، پتریا وان دناڤ گۆرێن بكۆم دا كوشتن و كچ و ژن و زارۆ بەرەڤ تەلەعفەر برن، ئەم دناڤ تەلەعفەر دا ماین بۆ دەمێ چەند رۆژان، ل دووڤدا تێرۆرستێن داعش دەست ب كرین و فروتنا كچ و ژنان كرن، ئەز ئێك ژ وان كچان بووم هێشتا د ژیێ 16سالیێ دا بووم، داعشا دەستدرێژیا سكسی دگەل من كرن و 12 جاران تێرورستێن داعش دناڤ ئاخا ئیراقێ و سوریا دا كرین و فروتن ب من كرن.
گۆت ژی: من گەلەك رۆژێن نەخۆش و دژوار بۆراندن، چ جاران من باوەر نەدكر دێ ژ دەستێن تێرۆرستێن داعش رزگار بم، گەلەك جاران خێزانێن داعش ئەز ئەشكەنجە دام هەتا نوكە ژبەر ئەشكەنجەدانا تێرورستێن داعش گوهێن من دئێشن ئەز چارەسەریێ وەردگرم هەروەسا ددانێن من خراب كرن ژبەر لێدانێ و گەلەك د درندە بوون.
سیلفانا خۆیا كر ، گەلەك جاران من پرسیارا خێزانا خۆ ژ تێرورستێن داعش دكر دگۆتنە من كەس نەمایە، گەلەك جاران ب شەڤا دناڤ رێكێن ئاخێ دا ب ماتۆرسكلان ئەم دبرن دناڤ بارەگایێن داعشا كرن و داخوازا كارێن خراب ژ مە كرن.
ئەو ژی دیار كر، خێزانا من هزر نەدكر ئەز یا ساخم چونكە بۆ دەمێ 10ساڵان من نەشیا د گەل خێزان و كەس و كارێن خۆ باخڤم و خێزانا من هزر كرن ئەز یا مریمە دناڤ گۆرستانا گۆندێ كۆچۆ دا، گۆرەستانا من چێكربوون و ئەز ب ساخێ ڕزگار بووم، مخابن هەتا نوكە چارەنڤیسێ گەلەك كەسان ژ خێزان و كەس و كارێن من یێ دیار نینە.
نيشاندان