د. عەلی تەتەر، پارێزگارێ دهۆكێ دوهی 12/8/2025 سەرا سەرۆكاتیا باژێرڤانیا دهۆكێ دا و ژ لایێ مللەت سالم، سەرۆكێ باژێرڤانیا دهۆكێ و جڤاتا باژێرڤانیێ ڤە پێشوازی لێ‌ هاتە كرن.
د هەڤدیتنەكێ دا، سەرۆكاتیا باژێرڤانیا دهۆكێ راسپارد ژ بۆ پێكئینانا لژنەكێ بۆ هەلسەنگاندن و چاوانیا زێدەكرنا كەسكاتیێ د ناڤا باژێڕی دا، ب تایبەتی ل هەردو چیایێن رەخێن باژێڕی.
هەروەسا د ڤێ پرۆسەیێ دا بزاڤا راكرنا هەمی كەرستەیێن زێدە ل سەر رێیان بهێتە دان و كار ل سەر خوشكرن و پاقژراگرتنا شوستەیان بهێتە كرن، داكو وەلاتی ب ئارامی و دیمەنەكێ جوان هاتوچوویێ بكەن، دیسا پارێزگاری سوپاسیا هەمی وان وەلاتیێن خوشتڤی و لایەنان كر یێن كو پشكداربووین د چاندنا داران دا و كەسكرن و پاقژ راگرتنا باژارێ خۆ دا.

دهۆك، دلۆڤان ئاكرەیی:

ڕێڤەبەرێ نەفت و كانزایان ل دهۆكێ دیاركر، پشتی د دو حەفتیێن بۆری دا پشكا پانزینێ ل دهۆكێ‌ و زاخۆ كێم بووی، حوكمەتا هەرێما كوردستانێ بڕیار دا، پشكا پانزینێ یا ڕۆژانە بۆ نێزیكی 500 هزار لێترێن پانزینێ بۆ ڤان دو باژێڕان بهێتە زێدەكرن.
كارزان ڕەئوف، ڕێڤەبەرێ نەفت و كانزایان ل دهۆكێ بۆ رۆژنامەیا ئەڤرۆ گۆت: «ژ بەر ڕوودانێن ڤان دوماهیان و هێرشێن درۆنی بۆ سەر كۆمپانیێن پترۆلێ، پشكا پانزینێ یا پارێزگەها دهۆكێ‌ و زاخۆ بۆ 288 هزار لێترێن پانزینێ هاتبوو كێمكرن، لێ وەزارەتا سامانێن سروشتی یا حوكمەتا هەرێما كوردستانێ پشكا پانزینا حكومی بۆ 468 هزار لێتران د ڕوژەكێ دا زێدە كریە، لەورا د ڕۆژێن بهێن دا زێدەبوونا پشكا پانزینا حكومی دێ‌ كارتێكرنێ ل بهایێ پانزینا بازرگانی ژی كەت».
كارزانی گۆتژی: «نوكە ل پارێزگەها دهۆكێ‌ و ئیدارا سەربخۆ یا زاخۆ ڕۆژانە ل 13 پانزینخانەیان پانزینا حكومی ب بهایێ 750 دیناران دهێتە بەلاڤكرن و ئەڤ چەندە دێ بیتە ئەگەر كو بهایێ پانزینا بازڕگانی ل پارێزگەها دهۆكێ‌ و زاخۆ ئەرزان ببیت».
بۆ زانین، حەفتییا بۆری حكومەتا هەرێما كوردستانێ پشكا پانزینا حكومی ل پارێزگەها هەولێرێ‌ ژی زیدە كربوو، ڕۆژانە ل سنۆرێ پارێزگەها هەولێرێ ل 50 پانزینخانەیان پانزینا حكومی دهاتە بەلاڤكرن.

دهۆك، لەزگین جۆقی:

نوونەرێ قوربانێن جینۆسایدا شنگالێ بۆ رۆژناما ئەڤرۆ دیاركر كو 22 روفاتێن قوربانیێن جینۆسایدا شنگالێ گەهشتنە دەستێ كەسوكارێن قوربانیان و بڕیارە ئەڤرۆ د رێورەسمەكێ دا بهێنە ڤەشارتن.
نایف جاسۆ، نوونەرێ قوربانیێن جینۆسایدا ئێزدیان ل شنگالێ خویاكر، پتریا روفاتان خەلكێ گوندێ كوچۆنە و گۆت: «ئەڤرۆ ڕادەستی كەسوكارێن قوربانیان دێ‌ هێنە كرن، 22 روفاتێن ئێزدیان ل فەرمانگەها نۆشداریا داد ل پارێزگەها نەینەوا بۆ دەڤەرداریا شنگالێ دێ هێنە ڤەگوهاستن».
گۆتژی: «ئەڤرۆ ل مۆنۆمێنتا جینۆسایدا ئێزدیان ل شنگالێ رێورەسم دێ هێنە كرن و كەسوكارێن قوربانیان دێ روفاتێن قوربانیان بن ئاخ كەن».

رەمەزان زەكەریا:

پێشنیار هاتیە كرن تاخێ مەزرینگانێ ل سەنتەرێ‌ دەڤەرداریا ئاكرێ‌ بهێتە راكرن و 55 هەتا 60 خانیێن وی تاخی بهێنە خرابكرن و ببیتە پاركا راوەستاندنا ترۆمبێلان.
ئەمین سەلیم، رێڤەبەرێ گەشتوگوزارا دەڤەرداریا ئاكرێ بۆ ئەڤرۆ گۆت: «پێشنیار هاتیە كرن كو پاركەكا مەزن ل تاخێ مەزرینگانێ ل سەنتەرێ‌ دەڤەرداریا ئاكرێ بهێتە دروستكرن بۆ راوەستاندنا ترۆمبێلان، ژ بەركو ل جەژن و بیرەوەریان قەرەبالغیا ترۆمبێلان دروست دبیت، لەو ئەم دخوازین ب رێیا وێ‌ پاركێ‌ پتر خزمەتا گەشتیاران بكەین دەمێ قەستا ئاكرێ دكەن».
ناڤبری گۆتژی: «ئەم دێ رێكخۆشكەر بین ل گەل وان وەبەرهێنەران یێن حەز بكەن پڕۆژەیێن گەشتیاری ل دەڤەرداریا ئاكرێ دروست بكەن بۆ پتر راكێشانا گەشتیاران».

زنار تۆڤی:

رێڤەبەرێ بازاركرنێ ل دەستەیا گەشتوگوزارا هەرێما كوردستانێ دیاركر، ب مەرەما پاراستن و ناساندنا كلتۆرێ هەرێما كوردستانێ بۆ وەلاتان، پێدڤییە و مەرجە ل جهێن گەشتیاری بەرهەم و كارێن دەستی یێن ناڤخۆیی بهێنە نیشادان، دیسا دڤێت هەموو كەڤال و مینۆیێن خوارنێ ب زمانێ كوردی بهێنە نڤێسین و دبێژیت: هەر جهەكێ‌ ڤی كاری نەكەت، لێپرسین ل گەل دێ هێتە كرن.
سیروان تەوفیق، رێڤەبەرێ بازاركرنێ ل دەستەیا گەشتوگوزارا هەرێما كوردستانێ بۆ رۆژناما ئەڤرۆ گۆت: «ئێك ژ مەرجان ل جهێن گەشتیاری یێن هەرێما كوردستانێ، ب تایبەتی ل ئۆتێلێن پێنج ستێر، پێدڤییە تابلۆیان ب زمانێ كوردی ب هەلاویسن ل جهێ تابلۆیێن زمانێن دیتر و ژ لایێ مۆزیك و سترانان ژی ڤە، بزاڤ هاتینە كرن، پترین مۆزیك و سترانێن فۆلكلۆرێ كوردی بۆ گەشتییاران بهێنە هەلكرن، دیسا 380 كوڕ و كچ ژی ل دەڤەرێن گەشتیاری كارێن دەستی نیشا گەشتیاران ددەن و د فرۆشنێ‌«.
گۆتژی: «ئارمانجا مە ژ ڤی كاری ناساندنا كلتۆرێ كوردستانێ یە ب ئایین و نەتەوێن جوداڤە، بۆ هندێ ئەو گەشتیارێن سەرەدانا هەرێما كوردستانێ دكەن، یادگارییەكا ڤێرێ ل گەل خۆ ببەنە وەلاتێ خۆ، چونكی ئەڤە ل هەموو وەلاتان هەیە و ئێكە ژ كارێن مە و ئەڤە گرنگیدانە ب بەرهەمێن خۆمالی و بازاركرنا وان، هەروەسا ئەوێن وان مەرجان بنپێ بكەن، لێپرسین ل گەل دێ هێتە كرن».

زاخۆ، دلۆڤان هالۆ:

گۆهدار شێخۆ سەرپەرشتێ ئیدارا سەربخوە یا زاخۆ د كۆنفراسێ كەسككرنا باژێری دا ڕاگەهاند، دێ دوو مەزنترین پارك ل سەر ئاستێ كوردستانێ و ئیراقێ ل ئیدارا سەربخوە یا زاخۆ هێنە دروستكرن، د نوكە دا بەرهەڤی بۆ دروستكرنا ئێك ژ وان پاركان دهێتە كرن.

جگەرخوین تاهر، ڕێڤەبەرێ گشتی یێ وەبەرهێنانێ ل ئیدارا سەربخوە یا زاخۆ بۆ ڕۆژناما ئەڤرۆ دیار كر، ل سەر ڕووبەرێ هزار دونەمان دێ ئێك ژ مەزنترین دوو پاركان ل سەر ئاستێ كوردستان و ئیراقێ ل زاخۆ هێتە دروستكرن.
ڕێڤەبەرێ گشتی یێ وەبەرهێنانێ ل ئیدارا سەربخوە یا زاخۆ ئاماژە ب وێ چەندێ ژی كر، ئەڤ پاركە دێ دناڤبەرا گۆندێ حەسەن ئاڤا و گۆندێ مامەرێ دا هێتە دروستكرن و دیزاینا ڤێ پاركێ هاتییە دانان و دێ قەرەبوویا خودان زەڤییێن وی جهی ژی هێتە كرن.
ناڤهاتی گۆت ژی:»ئەو كۆمپانیا ڤی پڕۆژەی دروست كەت دێ مفای ژ تۆبۆگرافیا دەڤەرێ بینیت وەكو دول و نهال و كەند و كوران و ب چ ڕەنگان ناهێتە تێكدان، ئەڤ پڕۆژە دێ ڕێژەكا مەزن یا كەسكاتییێ ل ئیدارا سەربخوە یا زاخۆ زێدە كەت.
زێدەتر ژی گۆت:» د نوكە دا ئەم یێ بەرهەڤییان دكەین كو ڕووپیڤان بهێتە كرن و سنوور بۆ دەوروبەرێن پاركێ بهێنە دانان و خودان زەڤیێن وی جهی ژی بهێنە قەرەبووكرن».