زاخۆ، دلۆڤان هالۆ:

هونەرمەندێ باژێڕێ زاخۆ هاشم بۆسەلی د دیدارەکێ دا بۆ ڕۆژناما ئەڤرۆ دیار کر کو هەر ل ژیێ زاڕۆکینیێ حەزا ستران گۆتنێ ل دەف من پەیدا بوو، لێ ل سالا ل کەمپا دیاربەکرێ من دەست ب گۆتنا سترانێن شەهیانان کر، ژبەرکو بەردەوام ل کەمپێ کۆچك و دیوان و شەڤبێری لێ هەبوون، و گەلەك هونەرمەندان سترانێن فۆلکلۆری د گۆتن وەکو عەبدولستار بۆسەلی و ئسکەندەر گولی و نایف گولی و فەریق ئێکمالەیی و حەکیم نزووری، ئەز ژی ل گەل وان بەرهەڤ دبووم و من گۆهداریا سترانێن وان دکر، لەوما ڤێ چەندێ حەزا گۆتنا سترانێن فۆلکلۆری ل دەف من پەیدا کر، چونکی بنیاتێ هەمی سترانان فۆلکلۆرە.
هونەرمەندێ ناڤهاتی، ئاماژە ب وێ چەندێ ژی کر کو پشتی من ستران ل کۆچك و دیوان و شەڤبێرییان گۆتین، و دەنگێ من دەنگڤەدا و خەلکێ گەلەك حەز ژێ کر، و دوست و هەڤالان ژی پشتەڤانیا من کر، هینگێ گەلەك ڕێگر ژی هەبوون کو مالا مە و نێزیکێن مە نە دڤیان ئەز سترانان بێژم، لێ من ئەڤ سنوورە بەزاند، و مە دەست پێکر ل کۆچك و دیوانان و من خوە گەهاندنە دەنگبێژان، و من گۆهداریا محەمەد عارفێ جزیری و سەعید گاباری و ڕەمەزان مەلا سمایل بۆسەلی و ئسکەندەر گولی و عەبدولستار ستار بۆسەلی دکر، و ئێك هەبوو مامۆستا و قوتاخانە بوو ژ بۆ من و گەلەك هونەرمەندان ئەو ژی حەجی مووسا بلکی بوو، دشیا حەفت و ڕۆژ و حەفت شەڤان بێ دووبارە سترانان بێژیت، من گەلەك حەز ژ دەنگێ وی و سترانێن وی دکرن، ئەز بەردەوام بووم هەتا کو من سەرکەفتن ئینایی، زێدەباری ستران گۆتنێ ژی من چەندین بەڕنامێن فۆلکلۆری ل کەنالێن نافخۆیی و ئاسمانی پێشکێشکرینە، د نوکە دا ئەز و دژوار ڕەزیکی پێکڤە بەرنامەکێ فۆلکلۆری بناڤێ پەسار ل کەنالێ وار پێشکێش دکەین.
هاشم بۆسەلی گۆت:»هەر سترانەكا فۆلکلۆری چیڕۆك و سەرهاتی و ڕوودانەکا ژیواری یا ل پشت هەی، و چیرۆك و سەرهاتیا سترانێن فۆلکلۆری ناهێتە گۆهۆڕین، بتنێ هندەك گۆهوڕینێن بچووك یێن هەین کو ژ دەڤەرەکێ بۆ دەڤەرەکا دی شێوێ گۆتنێ یا جیاوازە، و هەر دەڤەرەکێ تاما خوە یا جودا هەیە، و خەلکێ بیانی ئەم وەکو کورد یێ ب فۆلکلۆرێ مە و سترانێن فۆلکلۆری نیاسینە، سترانێن فۆلکلۆری کارتێکرنەکا مەزن ل سەر خەلکێ هەیە، چونکی من یا گۆهـ لێ بوویی کو هندەك کەسان یا گۆتی دەمێ ئەم تۆڕە دبین، ئەم گۆهداریا سترانێن فۆلکلۆری دکەین چونکی ئەم پێ ئارام دبین و تۆڕەبوونا مە دهێتە خوار، ل کۆچك و دیوان و شەڤبێرییان هندەك کەس بێزار دبن یان خەم و ئاریشە یێن هەین، لێ ئەگەر مرۆڤ سترانێن ب دلێ وان بێژیت دێ ژ وی سەقایی دەرکەڤن و دێ مێشکێ وان ئارام بیت و سەبرێ وان هێت».
گۆت ژی:»گەلەك چەق ژ فۆلکلۆری دچن وەکو ستران و سەرهاتی و چیڕۆك و حەیرانۆك و مەتەلۆك و پایزۆك و گۆتنێن مەزنان، هەر چەندە ئەز حەز ژ هەمی جۆران دکەم، لێ من پتر شارەزایی و حەز و ڤیان یا بۆ سترانێن فۆلکلۆری و حەیرانۆکان هەی، ل ڤان سالێن دوماهیێ خەلك گەلەك گرنگیێ ب سترانێن فۆلکلۆری ددەن، و حەز دکەن بەردەوام ل کۆچك و دیوان و شەڤبێری و شەهیانێن وان سترانێن فۆلکلۆری بهێنە گۆتن، و گەنجێن مە پتر حەز ژ سترانێن فۆلکلۆری دکەن، چونکی ئەو دزانن سترانا هەڤچەرخ یا دەمکییە و زوو دمریت، لێ سترانا فۆلکلۆر یا ژ باب و باپیران بۆ مە مایی و یا نەمرە».
زێدەتر ژی گۆت:»ل سالاێ من سترانەکا فۆلکلۆری کلیپ کر بناڤێ لۆلۆ میرۆ کو ب بەدرخان بەگێ میرێ جزیرا بۆتان هاتیە گۆتن، هەتا نوکە نێزیکی ملیۆنەك و ٥ هزار کەسان ل یۆتیوبێ کەنالێ ڤین تیڤی تەماشەیی وێ کلیپێ کرییە، و پشتی هینگێ من چەندین سترانێن دی ژی تۆمار کرینە و کلیپ کرینە، و ل داهاتی ژی من ل بەرە ب هەڤکاریا مامۆستا قادر قەچاخی، داستان و بەندێن سترانا لەعلی خانێ و هەسامی و سترانا شاهینی و مێموکێ ب تەمامی ب شێوێ دوو قۆلی لگەل سترانبێژەکا دەنگ خوەش یا ژن تۆمار بکەم، و ئەز بەندا زەلامی بێژم و ئەو بەندا ژنێ بێژیت».

هه‌رهین:

سترانبێژ هێرش د دیداره‌كێ دا بۆ به‌رپه‌رێ هونه‌رى یێ رۆژنامه‌یا ئه‌ڤرۆ دیاركر كو ئه‌و مژوولى چێكرنا سترانه‌كێ یه‌ بناڤێ (سوز) كو ژ په‌یڤ و ئاوازێن ئه‌وى بخونه‌ و ل ستودیۆیا ئوكتاف هاتیه‌ توماركرن و ژڤانه‌ ل نێزیك بهێته‌ به‌لاڤكرن.
هێرشى گۆت: هه‌تا نوكه‌ من هزرا سترانا دوقۆلى نه‌كریه‌ كو بێژم یان كا ده‌نگێ كیژ هونه‌رمه‌ندا كچ ل گه‌ل ده‌نگێ من دگونجیت و نوكه‌ بتنێ مژوولى ستران و كلیپا مه‌ كو یێن من بخوه‌ بن، ئانكو بتنێ بن و ئه‌گه‌ر هات و ده‌نگه‌كێ گونجاى هه‌بیت یێ ئاماده‌مه‌ بۆ سترانا دوقولى و ده‌مێ سترانان چێدكه‌م گه‌له‌ك حه‌ز دكه‌م هه‌لبه‌ستێن هه‌لبه‌ستڤان بورهان زێبارى و ئاوازێن هونه‌رمه‌ند رێناس ئاكره‌یى بێژم و دبینم هه‌لبه‌ست و ئاوازێن وان گه‌له‌ك یێ پێ ئارامم و دستران گۆتنێ ژى دا هه‌ڤركیا چ سترانبێژان ناكه‌م، چونكو ده‌نگێ هه‌ر سترانبێژه‌كى تاما خوه‌ یا تایبه‌ت هه‌یه‌ و وهه‌ر سترانبێژه‌كى ژى ستایل و حه‌زژێه‌رێن خوه‌ هه‌نه‌.
هه‌روه‌سا گۆت: من كلیپه‌ك چێكربوو بناڤێ(كچێ تو نازیا نه‌كه‌) كو ژ په‌یڤێن هه‌لبه‌ستڤان بورهان زێبارى بوون و هاته‌ كلیپكرن ژى و پشتى بلاڤ بوونێ وێنه‌یێ وێ ب دلێ من نینه‌ و گرنگه‌ هه‌ر سترانبێژه‌كى ستران ل سه‌ر هه‌ر هه‌لكه‌فته‌كێ هه‌بن و من ستران ب نه‌ورۆزێ نینه‌، به‌لێ من لبه‌ره‌ سترانه‌كێ ل سه‌ر نه‌ورۆزێ ژى چێكه‌م و ل هه‌ر جهه‌كێ بچمێ چ گه‌ریان بیت یان سه‌یران ل گه‌ل مال و هه‌ڤالان بیت سترانان دبێژم و حه‌زژ هه‌موو سترانبێژان دكه‌م و هه‌موو لنك من هێژا و خوشتڤی نە.

هه‌رهین محه‌مه‌د:

هونه‌رمه‌ندا شێوه‌كار جوان یاسین د دیداره‌كێ دا بۆ به‌رپه‌رێ هونه‌رى یێ رۆژنامه‌یا ئه‌ڤرۆ گۆت: من ژى وه‌كو هه‌ر هونه‌رمه‌نده‌كى ستایلێ خوه‌ یێ تایبه‌ت هه‌یه‌ و هه‌ر دیسان هه‌ر شێوه‌كاره‌كى پلانه‌كا ڤه‌شارتى د هۆنه‌رى دا هه‌یه‌ بۆ نمونه‌ مه‌به‌ستا وى ژ چێكرنا ئه‌وى كه‌ڤالى چیه‌ كا هه‌ستێن خوه‌ پێ ده‌ربریت، یان پشته‌ڤانیا ملله‌تى پێ بكه‌ت و ستایلێ من ژى پتر وێنه‌یێن كه‌سوكى نه‌ كو ب رساسى دهێنه‌ چێكرن و هه‌كه‌ كه‌ڤاله‌كى ژى چێكه‌م ل دووڤ وێ هزرێ چێدكه‌م یا دسه‌رێ من دا و نه‌شێم دیاركه‌م كا هه‌ر كه‌ڤاله‌كى چه‌ند ل سه‌ر كاردكه‌م، چونكۆ هه‌ر كه‌ڤاله‌كى قه‌باره‌ك هه‌یه‌ و چ پێنه‌ڤێت هندى قه‌باره‌یێ مه‌زن بیت پتر مرۆڤ دێ ل سه‌ر كاركه‌ت و گه‌له‌ك جاران ده‌مێ كه‌ڤالان چێدكه‌م دهێلمه‌ ب نیڤى ژ به‌ر كو گه‌له‌ك به‌رێ من دكه‌ڤیه‌ سه‌ر كه‌ڤالى و دبیت خه‌له‌تى ژى تێدا هه‌بن هه‌ست پێنه‌كه‌م، چونكۆ گه‌له‌ك فوكسا من ل سه‌ر مابوویه‌ و له‌ورا هه‌تا رۆژه‌كێ ژى من كار ل سه‌ر كه‌ڤالى راوه‌ستاندیه‌ و رۆژا پاشتر من كار ل سه‌ر كریه‌ گۆت: هه‌ر كه‌ڤاله‌كێ من چێكرى ب حه‌زا خوه‌ نه‌شێم بفرۆشم و كا چه‌وا دایك نه‌شێت زارۆكێ خوه‌ بده‌ته‌ ئێكى وه‌سا ئه‌ز ژى نه‌شێم كه‌ڤالێن خوه‌ بده‌مه‌ ئێكى و هه‌كه‌ بكه‌مه‌ دیارى ژى دلێ من هه‌ر یێ دووڤ را و دبێژمێ چاڤێته‌ لێ بیت و ته‌ لكیڤه‌ هه‌لاویستیه‌ و من گه‌له‌ك مفا ژ هونه‌رمه‌نێن بیانى یێن فارسى و فره‌نسى دیتینه‌ وه‌كو (ڤانكوخ و داڤنشى) و مه‌ گه‌له‌ك هونه‌رمه‌ندێن شێوه‌كارى یێن فارس هه‌نه‌ و هزرێن وان گه‌له‌ك دجوانن، به‌لێ بۆ كه‌ڤالى گه‌له‌ك لدووڤ هونه‌رمه‌ندێن فره‌نسى دچم، چونكۆ هونه‌ر ل به‌ر من به‌رفرهتر لێكریه‌ و گه‌له‌ك داغبارا كه‌ڤالێن ڤانكوخى مه‌، چونكو گرێداى لایه‌نێ سایكلوجى ڤه‌ نه‌ و ئه‌ز بخوه‌ ژى بۆ هونه‌رى گه‌له‌ك حه‌ز ژ ئه‌وى لایه‌ى دكه‌م و دزانم دێ چه‌وا سه‌ره‌ده‌ریێ ل گه‌ل كه‌ڤالى كه‌م، ژبه‌رهندێ ژى ده‌مێ ئه‌ز كه‌ڤالێن ڤانكوخى دبینم دبێژم خۆزى یێن من بان.
جوانێ گۆتژى: ئه‌و چه‌نده‌ ژى گۆت: د كه‌ڤالان دا هه‌موو ره‌نگان تایبه‌تمه‌ندیا خوه‌ ل نك من هه‌یه‌، به‌لێ ره‌نگێ ژ هه‌موویان تایبه‌ت تر ره‌نگێ سپى یه‌ و من دڤێت كا ئه‌و ره‌نگه‌ چه‌ندێ لنك من تایبه‌ته‌ ئه‌وێ سپیا تیێ پتر بالكێشكه‌م و ب خه‌ملینم ب ره‌نگێن دى، له‌ورا هه‌موو ره‌نگ لنك من ئێك ئاسته‌، چونكۆ هه‌ر ره‌نگه‌كى پتر رامانا خوه‌ هه‌یه‌ و پتر كه‌ڤالى به‌رچاڤ دكه‌ت زێده‌تر گۆت: هه‌تا نوكه‌ من لبه‌ر نینه‌ چ پێشانگه‌هان ڤه‌كه‌م و داخواز ژ من یا هاتیه‌ كرن به‌لێ من ئه‌و ده‌مه‌ نینه‌، چونكو مژوولى هنده‌ك كارێن دى یێن تایبه‌تم.