دوهی ئێكشەمبی 16/3/2025، سەرۆك مەسعود بارزانی ل سالڤەگەرا 37 یا كێمیابارانكرنا هەلەبجە پەیامەك ل تۆرا جڤاكییا ئێكس بەلاڤكر.
دەقێ پەیاما سەرۆك بارزانی:
ئازارا تاوانا كێمیابارانكرنا هەلەبجە هەتا هەتایێ دێ دناخ و دلێ هەر كوردستانییەكی دا مینیت و ناهێتە ژبیركرن. بەرپرسیارەتییا وێ تاوانا دژی مرۆڤایەتیێ و ئەنجام و شوونوارێن وێ، هەتا قەرەبووكرنا كەسوكارێن قوربانییان، ئەركێ دەولەتا ئیراقێ یە. ل سالڤەگەرا 37 یا كارەساتا تۆببارانكرنا هەلەبجە ب چەكێ كیمیاوی سلاڤان بۆ گیانێ پاقژ یێ شەهیدێن هەلەبجە و مالبات و كەسوكارێن شەهید و بریندارێن وێ تاوانێ د هنێرین.

دوهی ئێكشەمبی 16/3/2025، نێچیرڤان بارزانی، سەرۆكێ هەرێما كوردستانێ ل سالڤەگەرا 37 یا كێمیابارانكرنا هەلەبجە پەیامەك بەلاڤكر.
دەقێ پەیاما سەرۆكێ هەرێما كوردستانێ:
ل سالڤەگەرا كارەساتا كێمیابارانكرنا هەلەبجە، سەرێ رێزێ بۆ گیانێ زێدەتر ژ پێنج هزار شەهیدێن هەلەبجە د چەمینین و ب رێز ڤە بیرئینانا هەموو شەهیدێن كوردستانێ دكەین كو ژ پێخەمەت ئازادیێ دا گیانێ خوە بەخشی. سلاڤ و رێز بۆ بنەمال و كوسوكارێن سەربلندێن شەهیدان و برینداران و قوربانییان كو هەتا ئەڤرۆ ژی هێشتا ژ ئەنجامێن وێ تاوانێ، د ئازاران دانە.
كێمیابارانكرنا هەلەبجە تنێ تاوانەك نەبوو، بەلكو پشكەكا خەمگین بوو ژ زنجیرەیەكا تاوان و جینۆسایدان كو ئارمانجا وان نەهێلانا گەلێ كوردستانێ بوو. مللەتەك كو تنێ تاوانا وی، داخوازكرنا مافێ خوە یێ رەوا بوو د ژیان و ئازادیێ دا. هەلبەجە بوویە هێمایەكا جیهانی بۆ ستەملێكرنا گەلێ مە و دیدەڤانەك بۆ درندەییا وان تاوانێن دژی وی هاتینە ئەنجامدان. هەكە دادپەروەرییەكا راستەقینە هەبا، تنێ ئەڤ كارەساتە بەس بوو بۆ دانپێدانێ ب هەموو مافێن رەوا یێن گەلێ كوردستانێ.
ب ڤێ هەلكەفتێ جارەكادی دوپات دكەین كو پێدڤییە قەرەبوویا خەلكێ هەلەبجە و هەموو قوربانیێن جینۆساید و ئەنفالێ بهێتە كرن و د هەموو واراندا باشترین خزمەتگوزارێ بۆ بهێنە پێشكێشكرن. ئەركێ حوكمەتا ئیراقێ یە بەرپرسیارەتییا خوە یا قانوونی و ئەخلاقی بەرانبەر قوربانییان و هەموو پێگیریێن خوە دەرهەق هەلەبجە و خەلكێ وێ بجهبینیت و دادپەروەریێ بۆ ب دەستڤەبینیت. هەروەسا هەموو پێرابوونێن ب پارێزگەهبوونا هەلەبجە تمام بكەت، پێدڤییە جڤاكێ نێڤدەولەتی ژی د بزاڤێن خوە دا بۆ پشتڕاستبوونێ ژ دوبارەنەبوونا ڤان جۆرە تاوانان ل هەر جهەكێ جیهانێ، بەردەوام بیت.
ئەڤرۆ هەرێما كوردستانێ ب قەوارەیێ خوە یێ دستووری و فیدرالی و هەموو دەستكەفتێن خوەڤە، بەرهەمێ خەبات و قوربانیدانێ شەهیدانە، ئەركێ مە هەموویانە ب ئێكڕێزیێ، بپارێزین. وەفاداری بۆ قوربانیێن هەلەبجە و هەموو شەهیدێن كوردستانێ، هەروەسا پشتڕاستبوون ژ پاشەڕۆژەكا باشتر بۆ هەموویان، دێ ب رێكا ب بهێزكرنا پێكڤە كاركرنێ و تێكگەهشتنێ و هاریكاریێ ژ پێخەمەت پاراستنا مافێن گەلێ كوردستانێ بیت.

دوهی ئێكشەمبی 16/3/2025 مەسرور بارزانی، سەرۆكێ حوكمەتا هەرێما كوردستانێ ل سالڤەگەرا 37 یا كیمیابارنكرنا هەلەبجە پەیامەك بەلاڤكر.
دەقێ پەیاما سەرۆكێ حوكمەتا هەرێما كوردستانێ:
ل سالڤەگەرا كێمیابارانكرنا باژێرێ هەلەبجە و دەوروبەرێن وێ، ب رێزڤە بیرئینانا شەهیدێن ڤێ كۆمكوژییا رژێما بەرێ یا ئیراقێ دكەین و هەردەم ل بیرا مەنە. مە رێز بۆ قوربانیدانا خەلكێ نیشتمانپەروەر و خەباتكەرێ هەلەبجە، ب تایبەتی بریندارێن كارەساتێ و كەوسكارێن سەربلندێن شەهیدان یا هەی.
هەرچەندە پشكەك ژ بەرپرسیار و ئەنجامدەرێن سەرەكی یێن ڤێ تاوانێ، یێن گەهشتینە سزایێ خوە، بەلێ سەرەرای دەربازبوونا 37 سالان ل سەر ڤێ كارەساتا مەزن، هێشتا برینێن وێ تاوانێ نەهاتینە دەرمانكرن. لەوما ئەركێ مە هەموویانە، كاری ژ پێخەمەت زێدەتر ناساندنا جینۆسایدا هەلەبجە و ئەنفالێ و هەموو تاوانێن دی كو دژی گەلێ كوردستانێ هاتینە كرن بكەین و زێدەتر خزمەتا بنەمال و كەسوكارێن شەهید و قوربانیێن ڤێ تاوانێ بكەین.
حوكمەتا هەرێما كوردستانێ، ب ئەركێ سەرەكی یێ خوە دزانیت كو خزمەتەكا هەژی هەلەبجییان و قوربانیێن دی یێن جینۆسایدا گەلێ كوردستانێ بكەت. ل سالێن بۆری ژی، چەندین پرۆژەیێن خزمەتگوزاری د وارێن جۆراوجۆردا ل پارێزگەها هەلەبجە یێن هاتینە ئەنجامدان، بەلێ دزانین ژی هەلەبجە پێدڤی ب خزمەتەكا زێدەتر یا هەی، ژ ڤی رووی ڤە، ئاكنجیێن بەرێز و قوربانیدەرێن پارێزگەها هەلەبجە پشتڕاست دكەین كو ل پاشەڕۆژێ ژی دێ زێدەتر و باشتر خزمەتا وێ دەڤەرێ كەین.
جهێ داخێ یە، حوكمەتا فیدرال هەتا نوكە، بەرپرسیارەتییا خوە یا دستووری و قانوونی د قەرەبووكرنا بنەمال و كەسوكار وقوربانی و شەهیدێن هەلەبجە و ئەنفالكرییان بجه نەئینایە. بەلكو هەتا نوكە ژی، جڤاتا نوونەران پرۆسەیا ب پارێزگەهبوونا هەلەبجە پەسەند نەكریە. لەوما داخواز دكەین ئێدی خەمساری بەرانبەر قوربانیێن هەلەبجە نەهێتە كرن و ب شێوەیەكێ هەژی، بهێنە قەرەبووكرن و ب پارێزگەهبوونا وێ ژی ب زووترین دەم بهێتە پەسەندكرن.

دوهی ئێكشەمبی 16/3/2025 ل سات 11 سپێدێ ل سەرانسەری هەرێما كوردستانێ رێوڕەسمێ رێزگرتنێ ل قوربانیێن كێمیابارانكرنا هەلەبجە بڕێڤەچوو، هەڤدەم سەرۆك بارزانی و مەسرور بارزانی، سەرۆكێ حوكمەتا هەرێما كوردستانێ پشكداری وی هەلكەفتێ بوون.
بارەگەهێ بارزانی، ل پێگەهێ خوە ل سەر تۆرا جڤاكییا فەیسبووكی وێنەیێ رێوڕەسمێ رێزگرتنێ ل شەهیدێن كێمیابارانكرنا هەلەبجە بەلاڤكر كو سەرۆك بارزانی ل گەل ستافێ بارەگەهێ بارزانی ب راوەستییان ب بێدەنگی، پشكداری هەلكەفتا سالڤەگەرا 37 یا كێمیابارانكرنا هەلەبجە بوون.
هەر دوهی ئێكشەمبی 16/3/2025، مەسرور بارزانی، سەرۆكێ حوكمەتا هەرێما كوردستانێ هەڤدەم ل گەل هەڤوەلاتیێن هەرێما كوردستانێ، بۆ رێزگرتنێ ل گیانێ پاقژ یێ شەهیدێن هەلەبجە، ساتەكێ ب بێدەنگێ راوەستیا.
دوهی 16 ئادارێ، 37 سال ل سەر كێمیابارانكرنا هەلەبجە دەربازبوون، كو رژێما بەعس ل 16/3/1988، ب فرۆكەیان ب چەند جۆرێن غازا كیمیاوی، باژێرێ هەلەبجە كێمیابارانكر و د ئەنجامدا زێدەتر ژ پێنج هزار هەڤوەلاتی شەهید بوون و زێدەتر ژ 10 هزار هەڤوەلاتی بریندار بوون.

دوهی ئێكشەمبی 16/3/2025، مەسرور بارزانی، سەرۆكێ حوكمەتا هەرێما كوردستانێ پێشوازی ل حەمید ئەلشەتری، سەرۆكێ دەزگەهێ هەوالگیرییا نیشتمانییا عیراقا فیدرال كر.
د دیدارەكێ دا هەردو ئالییان دوماهی گوهۆڕین و پێشهاتێن رەوشا گشتی و ئەمنی ل ئیراقێ و دەڤەرێ گەنگەشەكر و دوپاتی ل پێشڤەبرنا هەماهەنگیێ د ناڤبەرا هەرێما كوردستانێ و حوكمەتا فیدرال ژ پێخەمەت پاراستنا ئاسایش و ئارامیێ هاتە كرن.

پەیڤدارێ حوكمەتا هەرێما كوردستانێ، راگەهاند: پێدڤییە حوكمەتا ئیراقێ قەرەبوویا هەلەبجە بكەت و ئەركێ ل سەر ملێ خوە بەرانبەر ئاكنجیێن پارێزگەها هەلەبجە بجهبینیت.
پێشەوا هەورامانی، پەیڤدارێ حوكمەتا هەرێما كوردستانێ گۆت» حوكمەتا هەرێما كوردستانێ دەستێ ئاڤەدانیێ ل هەلەبجە نا بڕیت و ئەوا پێتڤی بیت بۆ پارێزگەها هەلەبجە دێ ل بەرچاڤ هێتە وەرگرتن، مەسرور بارزانی، سەرۆكێ حوكمەتا هەرێما كوردستانێ بەرنامەیێن جودا بۆ پێشڤەبرنا هەلەبجە ب تایبەت د وارێن چاندنێ و گەشتیاری دا یێن هەین».
پەیڤدارێ حوكمەتا هەرێما كوردستانێ ل دۆر سالڤەگەرا كێمیابارانكرنا هەلەبجە دیاركر» گرنگترین بابەت كو پەیوەندییا هەلەبجە و نڤشێ نوو ب هێز دهێلیت، ئەوە كو ل رۆژا 16 ئادارێ ل هەموو سالان ل قوتابخانەیان، قوتابییان چالاكیێن جۆراوجۆر یێن هەین و بۆ دهێتە گۆتن چاوان باژێرەك هاتە شەهیدكرن».
پەیڤدارێ حوكمەتا هەرێمێ پەیامەك ئاراستەی حوكمەتا ئیراقا فیدرال كر و گۆت» دڤێت حوكمەتا فیدرال باژێرێ هەلەبجە قەرەبوو بكەت و ئەركێ ل سەر ملێ خوە ل بەرانبەر ئاكنجیێن هەلەبجە بجهبینیت و ب كریار نیشان بدەت كو مەبەستا وێ برینێن وان بهێنە دەرمانكرن.

ناكۆكیێن د ناڤبەرا شیعە و سوننەیاندا ل باشوور و ناڤەڕاستا ئیراقێ بوونە ئاستەنگ ل پێشبەری ب پارێزگەهبوونا هەلەبجە، پەرلەمانتارەك ژی دبێژیت: بۆ ڤێجارێ شیعە و سوننەیان سۆز یا دای دەنگی ب پرۆژە قانوونا هەلەبجە بدەن.
شوان كەلاری، ئەندامەكێ جڤاتا نوونەرێن ئیراقێ ژی ژ فراكسیۆنا پارتی دیموكراتی كوردستان گۆت» د دەمێ بۆری دا شاندەكێ بلند ب سەرپەرشتییا نوخشە ناسح، پارێزگەرا هەلەبجە ب وەكالەت، سەرەدانا جڤاتا نوونەران كر و ل گەل مەحموود مەشهەدانی، سەرۆكێ جڤاتا نوونەران و شاخەوان عەبدوللا، جێگرێ سەرۆكێ جڤاتا نوونەران كۆمبوو».
گۆت ژی» پاشی هەموو فراكسیۆنێن كوردی پێكڤە سەرەدانا ئالییان كر و هەر ئێك ژ شیعە و سوننە و ئالیێن دی، سۆز دا د روونشتنا ڤێجارێ دا دەنگ ب پارێزگەهبوونا هەلەبجە بدەن».
وی پەرلەمانتاری ل دۆر وێ چەندێ بۆچی ل جڤاتا نوونەرێن ئیراقێ دانپێدان ب پارێزگەهبوونا هەلەبجە دا ناهێتە كرن، گۆت» ل دەمێ بۆری بەری پرۆژە قانوون بچیتە د بەرنامەیێ كارێ جڤاتا نوونەران دا، شیعە و سوننەیان ب هەر هۆكارەكێ بیت ئاستەنگ ل پێشبەری ب پارێزگەهبوونا هەلەبجە دروست دكرن، شیعەیان داخوازا ب پارێزگەهبوونا (تەل رفعەت) دكر و سوننەیان ژی داخوازا ب پارێزگەهبوونا (فەللوجە) دكر».
دیاركر ژی» بێ وجدانی یە هەلەبجە ب وان هەموو قوربانیێن خوەڤە، ل گەل وان باژێران بهێتە بەراوردكرن» .
شوان كەلاری دوپاتكر و گۆت» ب پشتڕاستیڤە هەلەبجە دێ بیتە پارێزگەه و ئەم ژی دێ ل سەر وان سۆزێن ئالییان بزاڤێن چڕ كەین بۆ وێ چەندێ بەری تمامبوونا ڤێ خولا جڤاتا نوونەرێن ئیراقێ، ئەو پرسە بهێتە ئێكلاكرن».
ئەوژی بەرچاڤكر» هەكە پڕۆژە قانوونا ب پارێزگەهبوونا هەلەبجە دەنگان ل جڤاتا نوونەرێن ئیراقێ نەئینیت دێ پڕۆژە ب دوماهی هێت».