دهوك، لەزگین جوقی:
سەرۆكێ جڤاتا پارێزگەها نەینەوا ژ پۆستێ وی هاتە لادان و هێشتا دیار نینە كی دێ پۆستێ سەرۆكێ جڤاتا پارێزگەها نەینەوا وەرگریت.
جڤاتا پارێزگەها نەینەوا دوهی 5/3/2025 پشتی لێپرسین ل گەل سەرۆكێ جڤاتا پارێزگەها نەینەوا كری، دەنگ ل سەر لادانا ئەحمەد ئەلحەسعوود، سەرۆكێ جڤاتا پارێزگەها نەینەوا دا و ژ پۆستێ وی هاتە لادان.
ئەحمەد كەنعان، سەرۆكێ فراكسیۆنا پارتی ل جڤاتا پارێزگەها نەینەوا بۆ ئەڤرۆ گۆت: «ژ بەر سەرپێچیێن قانوونی و باوەرنامەیا سەختە سەرۆكێ جڤاتا پارێزگەها نەینەوا هاتە لادان».
رەمەزان زەكەریا:
ل دۆر داوی قووناغێن رێكەفتنێ ل سەر نووژەنكرنا شەش جهێن شوونواری ل سنوورێ دەڤەردارییا ئامێدیێ، كومبوونەك ل هەولێرێ ل بارەگایێ دەزگەهێ «ئێكسپرێنتیز فرانس» ب بەرهەڤبووونا وارشین سەلمان، دەڤـەردارێ ئامێـدیێ و یان برایم، قونسلێ گشتی یێ فرەنسا ل هەرێمێ ب رێڤە چوو.
د كۆمبوونێ دا، كو نوونەرێ پارێزگارێ دهۆكێ، رێڤەبـەرێ گشتی یێ شوونوارێن هەرێما كوردستانێ و رێڤەبەرێ شوونوارێن دهۆكێ و نوونەرێن هــــەرسێ سازیێن (ئێكسپرێنتیز فرانس و ئیفپۆ و ئەلیف) پشكدار بوون، بەحسێ داوی پلان ل سەر چاوانیا نووژەنكرنا شەش جهێن شوونواری ل ئامێدیێ هاتە كرن.
وارشین سەلمان، دەڤەردارێ ئامێدیێ بۆ ئەڤرۆ دیاركر، ئەو ل سەر نووژنەنكرنا شەش جهێن شوونواری ل ئامێدیێ رێككەفتینە و گۆت: «ئەڤ جهێن شوونواری پێك دهێن ژ قوتابخانەیا قوبەهان یا شوونواری، مزگەفتا مــــــەزن، كەنیسا كەڤن، قەبــرێ جوهیان، كۆرا سێریجێ و گورێ سۆلتانان.
زاخۆ، دلۆڤان هالۆ:
قەیس عوبەید، بەرپرسێ سەندیكا نۆشداران لقێ زاخۆ بۆ ڕۆژناما ئەڤرۆ دیار كر كو بڕیار هاتیەدان بۆ مەها ڕەمەزانێ داشكاندن ل سەر هەمی خزمەتگوزاریێن ساخلەمیێ بهێتە دانان.
بەرپرسێ سەندیكا نۆشداران لقێ زاخۆ، ئاماژە ب وێ چەندێ ژی كر كو پلێتێن نۆشداران بووینە 10 هزار، پلێتێن نۆشدارێن ددانان بووینە بێ بەرامبەر، دیسا كارێن دی ب ڕێژەیا 20% هاتینە كێمكرن.
قەیس گۆت: «سۆنەر و تیشك ب ڕێژەیا 20% هاتینە كێمكرن، هەمی تاقیگەهـان ب ڕێژەیا 20% داشكاندن كرینە، دیسا نشتەگەری ل نەخوەشخانەیان ب ڕێژەیا 20% هەتا 50% هاتینە كێمكرن».
ب، سه‌رجان مەحمود:
ئەندامەکێ سەرکردایەتیا پەکەکێ دیار کر، ئەو دێ د دەمەکێ نێزیک دا پەکەکێ هلوەشینن و دێ دووماهیێ ب شەرێ چەکداری ژی ئینن و بلا کەس گومان د ڤێ یەکێ دا نەبیت، لێ دڤێت دەولەتا تورکیا ژی دووماهیێ ب ئێرشێن خوە ل دژی هێزێن وان بینیت.
مستەفا قەرەسۆ ئەندامێ سەرکردایەتیا پەکەکێ راگەهاند، پشتی پەیاما سەرۆکێ پەکەکێ قۆناغەکا نوو ل تورکیا دەستپێکریە و ئێدی سەردەمێ شەڕێ چەکداری ژی ب دووماهی هاتیە، ژ بەر ڤێ یەکێ ژی دێ پەکەکە هێتە هلوەشاندن و ئەو دێ دووماهیێ ب شەڕێ چەکداری ژی ئینن و گۆت: (لێ دڤێت دەولەتا تورکیا ژی ئێرشێن خوە یێن ل دژی هێزێن پەکەکێ بدەتە راگرتن، نابیت ئێرشێن تورکیا بەردەوام بن، دڤێت ل هەمبەر هلوەشاندنا پەکەکێ دەولەتا تورکیا ژی دەست ب گوهۆڕینێن مەزن بکەت، چونکی ب سیستەمەکێ دیموکراتی دێ هەموو پرسێن هەی هێنە چارەسەر کرن).
ناڤهاتی ئەو یەک ژی دیار کر، پەکەکێ ئەرکێن سەر ملێن خوە بجهئینا و ئێدی پێدڤیە قۆناغەکا نوو دەستپێ بکەت، پەیاما ئۆجەلانی ژی نیشادانا دەستپێکرنا قۆناغەکا نوو یە و بێگومان هەکە دەولەتا تورکیا ژی یا پێدڤی بکەت، دێ هەموو پرسێن هەی هێنە چارەسەرکرن، بلا کەس چو گومانان نەکەت ئەم دێ پەکەکێ هلوەشینین، لێ د هەمان دەمی دا دڤێت ئێدی چو بەهانەیێن دەولەتا تورکیا ژی نەمینن و دڤێت دەولەتا تورکیا ژی ژ بۆ پێشڤەبرنا دیموکراسیێ و چارەسەرکرنا پرسا کوردی یا پێدڤی بکەت و گۆت: (پەیاما ئۆجەلانی گەلەک گرنگ و دیرۆکی بوو، هەکە دەولەتا تورکیا ئاستەنگان دروست نەکەت دێ هەموو پرسێن تورکیا و هەتا یێن ل رۆژهەلاتا ناڤین ژی هێنە چارەسەر کرن، ژ بەر ڤێ یەکێ ژی دڤێت هەموو ئالی ژ بۆ دیموکراسیێ و ئاشتیێ کار بکەن، ئێدی چو بەهانە نەماینە کو دەولەتا تورکیا هێشتا ژی بەردەوامیێ بدەتە ئۆپەراسیۆنێن سەربازی).
سەبارەت ب چارەنڤیسێ ئۆجەلانی ژی مستەفا قەرەسۆ دیار کر، بەری نها دەولەت باخچەلی دیار کربوو بلا ئۆجەلانی پەکەکێ هلوەشینیت دێ سود ژ مافێ هیڤی وەربگریت، هەر کەس ژی دزانیت مافێ هیڤی ئانکۆ هەکە کەسەک ٢٥ سالان د زیندانێ دا ما دڤێت بهێتە ئازاد کرن، ڤێجا دڤێت ئێدی دەولەتا تورکیا ژی ئەرکێن ل سەر ملێن خوە بجه بینیت و گۆت: (مە دڤێت سەرۆک ئاپۆ د کۆنگرەیێ هلوەشاندنا پەکەکێ دا پشکدار بیت، دڤێت رێ بۆ پشکداریا وی بهێتە خوەشکرن، بابەت تنێ ئەو نینە ب نامەیەکێ ئەم دووماهیێ ب خەباتا ٥٠ سالان بینین، ئەو یەک وەسا ساناهی نینە، بەلکو دڤێت ل هەمبەر دا دەولەتا تورکیا ژی ئەرکێن خوە بجه بینیت دا وەسا رەوشەکا نوو بهێتە پێش، بێگومان ب ئاشتیێ و دیموکراسیێ نە تنێ پرسا کوردی بەلکو دێ هەموو پرسێن تورکیا هێنە چارەسەر کرن).
سەرۆک وەزیرێن ئسرائیلێ جارەکا دی دیار کر، وان شیا دربێن کوژەک ل حەماسێ و حزبوللا بدەن و هەروەسا وان رژێما بەشاری ژناڤبر و زیانێن گەلەک مەزن ژی گەهاندنە لەشکرێ سووریێ، ئسرائیل رێ نادەت دوژمنێن وێ ل دەڤەرێ بهێز کەڤن و ئسرائیلێ دڤێت ل گەل ئەمریکا نەخشێ رۆژهەلاتا ناڤین ب تەمامی بگوهۆڕیت.
بنیامین نەتانیاهۆ ئەو یەک ژی دیار کر، دەستهەلاتا نها یا شامێ دخوازیت زیانێ بگەهینتە کوردان و دورزیان، لێ وەکو ئسرائیل ئەو رێ نادەن شام تشتەک وەسا بکەت، ئسرائیل دێ ب هەموو شیانێن خوە کوردان و دورزیان پارێزیت و هەکە شام ئالۆزیان دروست بکەت دێ ب توندی بەرسڤا دەستهەلاتا نوو یا شامێ ژی هێتە دان، ئێدی نابیت جارەکا دی ل سووریێ زۆرداری ل کوردان، دورزیان و پێکهاتەیێن دی بهێتە کرن.
دۆنالد ترامپ سەرۆکێ ئەمریکا دیار کر رۆسیا بەرهەڤە دووماهیێ ب شەڕی بینیت و قۆناغەکا نوو دەستپێ بکەت، لێ بەری نها زیلێنسکی بەرهەڤ نەبوو، وی دڤیا وەکو سەردەمێ بایدنی دیسان ب پارەیێ ئەمریکا شەڕێ رۆسیا بکەت، لێ ئێدی تشتەک وەسا نەما و ئەز ب باوەرم نها ئۆکرانیا ژی یا بەرهەڤە ل گەل رۆسیا دانوستاندنان بکەت و ئەم وەکو ئەمریکا د رژدین شەڕێ هەی ب دووماهی بینین.
ترامپی د پشکەکا دی یا ئاخڤتنا خوە دا جارەکا دی ب توندی ئێرشی جۆ بایدنێ سەرۆکێ بەرێ یێ ئەمریکا کر و دیار کر، بایدن خرابترین سەرۆکێ ئەمریکا یە، وی زیانێن گەلەک مەزن گەهاندنە بەرژەوەندیێن ئەمریکا، لێ نها قۆناغەکا نوو دەستپێکریە، ئەم رێ نادەین زیان بگەهنە بەرژەوەندیێن ئەمریکا، ژ بۆ بهێزکرنا پێگەهێ ئەمریکا ئەم کار دکەین و دێ یا پێدڤی ژی هێتە کرن و مە دڤێت جارەکا دی ئەمریکا د هەموو بیاڤان دا ببیتە هێزا هەری مەزن و کاریگەر ل جیهانێ.
تورڤان محه‌مه‌د، ئه‌كته‌رێ دراما (ده‌رگه‌هـ) یا كو ل مه‌ها ره‌مه‌زانا پیرۆز ل شاشه‌یا دهۆك تیڤی دهێته په‌خشكرن د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: دراما ده‌رگه‌هـ ئێكه‌م كارێ من یێ ئه‌كته‌ریێ یه و هه‌موو كه‌س حه‌زدكه‌ن رولێن سه‌ره‌كی د درامایێ دا، یان فلماندا ب گێرن، به‌لێ ئه‌ڤه هه‌موو ل سه‌ر ده‌رهێنه‌ری دمینت و ئه‌و بریارێ دده‌ت كا كیژ رۆل دێ بۆ مرۆڤی كه‌ڤیت دشێم هه‌موو رۆلان بگێرم، به‌لێ رۆلێن كومێدی هنده‌ك ژوان نه‌هه‌میان و گه‌له‌ك ژ ئه‌كته‌ریا خوه یێ رازیمه و هه‌كه ئه‌و درازی بن جهێ دلخۆشیامنه و رازیبوونا وان دێ بیته پشته‌ڤانیه‌ك كۆ یێ به‌رده‌وام بم ل سه‌ر زارڤه‌كرنێ و چونكو زارڤه‌كرنه و من چ ئاریشه نین هه‌كه ده‌رهێنه‌ر چ رۆلی بده‌ته من، به‌لێ ب مه‌رجه‌كی ئه‌و رولێ ئه‌ز دكه‌م بزانم كه‌سێ نائێشینم و ناشكێنم و ره‌وشتێ كوردان ب گشتی خراب ناكه‌م و هه‌كه بزانم ئه‌ڤ هه‌رسێ تشته تێدانین یێ ئاماده‌مه وی رولی بگێرم و من چ ئاریشه ل گه‌ل چ رولان نینه، چونكو هێشتا ئه‌ز سینگلم و مالا من گه‌له‌ك پشته‌ڤانیا من دكه‌ن، چونكو ئه‌و گه‌له‌ك دكه‌ڤنن د هونه‌ری دا ب تایبه‌تی هه‌ر دو برایێن من ده‌رهێنه‌ر هوزان و مشتاق ژی مونتێره هه‌ر دوو گه‌له‌ك دبه‌رنیاسن ژی.
تورڤانی گۆت ژی: د دراما ده‌رگه‌هـ دا رولێ خالێ دگیرم كو یێ ده‌رڤه‌ی وه‌لاتی هاتیه مالا خۆشكا خۆ ب سه‌ره دان و تێكه‌لی ئاریشه‌یێن مالا خۆیشكا خۆ خارزایێن خوه دبم باوه‌ردكه‌م روله‌كێ گه‌له‌ك یێ جوانه و ده‌می پارچه‌یێن وی دسوشیال میدیایێ دا به‌لاڤ بووین خه‌لكی گه‌له‌ك حه‌ز ژ زارڤه‌كرنا من كر و ده‌ستخوەشی ب كومێنت و ته‌له‌فۆنا ل من كرن و هیڤیا به‌رده‌وامیێ بۆ من خواست.
ل دووماهیێ ژی گۆت: مامۆستامه و ده‌رچوویێ پشكا مۆزیكێ مه ل په‌یمانگه‌ها هونه‌رێن جوان و ب درێژاهیا سالان ژی من كارێ وێنه‌گرتنێ و مۆنتاژێ كریه و هه‌ر دیسان من گه‌له‌ك په‌یڤ و ئاواز داینه سترانبێژان ئه‌ڤه بۆ ده‌مه‌كێ درێژه دسوشیال میدیایێ دا مه و هه‌تا رادەكی یێ به‌رنیاسم، به‌لێ كارێ زارڤه‌كرنێ ژ زارۆكینی حه‌زا من بوویه و من دڤیا تاقی بكه‌م و هه‌كه تێدا ب سه‌ربكه‌ڤم دایێ تێدا به‌رده‌وام بم و حه‌ز ژ زارڤه‌كرنا پاقژ دكه‌م و بتنێ بزانم هه‌ركاره‌ك دێ بیته جهێ خزمه‌تا گه‌ل و وه‌لاتێ من ب خوەشحالیڤه دێ یێ ئاماده و به‌رده‌وام بم ل سه‌ر وی كاری.
سندس سالح سلێڤانەی:
د ڤان سالێن دووماهیێ دا، زیرەکییا دەستکرد (AI) وەک شۆڕەشەکا مەزن دناڤ وارێ تەکنولوژیایێ دا خۆیا دبیت. ئەڤ تەکنولوژیایا نوی کارتێکرنا خۆ لسەر هەمی لایەنێن ژیانا مە دکەت، ژ کارێن ساخلەمیێ هەتا پەروەردە، ژ ئابوری هەتا گەشتیاری.زیرەکییا دەستکرد چییە؟ ب ساناهی، ئەڤە پرۆگرامێن کۆمپیوتەرێ نە کو دشێن هندەک کاران بکەن کو مرۆڤ دکەن، وەک فێربوون ژ ئەزموونا، ناسینا دەنگان، و بریاردان. سیستەمێن زیرەکییا دەستکرد دشێن داتایێن مەزن ب لەز پرۆسێس بکەن و ئەنجامێن گەلەک باش بدەن کو دبیت جاران ژ مرۆڤان ژی باشتر بن.د وارێ تەندروستیێ دا، زیرەکییا دەستکرد دهێتە بکارئینان بۆ ناسینا نەخۆشییان ب رێکەکا بلەز و دروست. پشکنینێن دکتۆران دهێنە چێکرن ب هاریکاریا زیرەکییا دەستکرد بۆ دیتنا نیشانێن نەخۆشییان بەری کو نەخۆشی بهێتە پێشڤە. ئەڤ چەندە ژیانا گەلەک خەلکی رزگار دکەت.
د وارێ پەروەردە دا، قوتابی دشێن پرۆگرامێن زیرەکییا دەستکرد بکاربینن بۆ فێربوونێ ب شێوەکێ تایبەت کو لگەل رێکێن وان یێن فێربوونێ بگونجیت. ماموستا ژی دشێن هاریکاریا ژ ڤان سیستەمان وەرگرن بۆ درووستکرنا پلانێن وانەیان و نیشاندانا کێماسییان دناڤ فێربوونا قوتابیان دا.
د وارێ ئابووری دا، کۆمپانی دشێن زیرەکییا دەستکرد بکاربینن بۆ چاڤدێریکرنا بازارێ، پێشبینیکرنا گوهۆڕینێن نرخان، و دروستکرنا ستراتیژیێن باشتر بۆ فرۆتنێ. ئەڤ چەندە دشێت بەرهەمهێنانێ زێدەتر بکەت و مەسرەفان کێم بکەت.
لێ دگەل ڤێ هەمیێ فایدێ، زیرەکییا دەستکرد هندەک مەترسی ژی دئینیت. ئێک ژ وان مەترسییان ئەوە کو هندەک کار دێ ژ ناڤ چن چونکە سیستەمێن زیرەکییا دەستکرد دشێن جهێ مرۆڤان بگرن دناڤ گەلەک پیشەیان دا. گەلەک خەلک نیگەران ژی هەنە دەربارەی پاراستنا داتایێن کەسی، چونکە ئەڤ سیستەمە دخەبتن لسەر داتایێن مەزن یێن کەسی کو دبیت نهێنی پاراستن ب باشی.
هەروەسا، چەندین پرسێن ئەخلاقی و یاسایی هەنە دەربارەی کا کی بەرپرسە ژ کریارێن زیرەکییا دەستکرد. بۆ نموونە، دەمێ سیستەمەک برێڤەبەریا ئوتومبێلەکێ دکەت و روودانەک چێدبیت، کی دێ بەرپرس بیت؟
د کوردستانێ دا، بکارئینانا زیرەکییا دەستکرد هێدی هێدی زێدە دبیت. گەلەک کۆمپانیێن کوردی، بتایبەت د وارێ تەکنولوژیایێ دا، دەست ب ئینڤێستمەنتێ د ڤی واری دا کرییە. هەروەسا، زانکۆیێن کوردستانێ ژی دەست ب بەلاڤکرنا زانینا دەربارەی زیرەکییا دەستکرد کرییە ژ رێیا کۆرسێن تایبەت و وۆرکشوپان.
پێتڤییە حکومەتا هەرێما کوردستانێ پلانەکا باش دانیت بۆ بکارئینانا زیرەکییا دەستکرد د وارێن جوودا دا. هەروەسا، دڤێت یاسایێن تایبەت بهێنە دانان بۆ رێکخستنا بکارئینانا ڤێ تەکنولوژیایێ و پاراستنا تاکەکەسان ژ بکارئینانا خراب یا ڤێ تەکنولوژیایێ.
داهاتییا زیرەکییا دەستکرد د جیهانێ دا گەلەک مەزنە، و تێکنیکێن نوی هەمی رۆژ تێنە ئافراندن. رۆبۆتێن زیرەک، سیستەمێن ناسینا دەنگان و وێنەیان، و سیستەمێن وەرگێرانێ ئێک ژ نموونێن بکارئینانا زیرەکییا دەستکرد نە کو ئەڤڕۆ د ژیانا مە دا هەنە.ل دووماهیکێ دا، زیرەکییا دەستکرد نە ب تنێ تەکنولوژیایەکا نوی یە، بەلکو گوهۆڕینەکا مەزن د شێوازێ ژیانا مە دا یە. دڤێت هووشیارییا مە هەبیت دەربارەی کارتێکرنێن ڤێ تەکنولوژیایێ لسەر ژیانا مە و تێگەهیشتنا مە بۆ جیهانێ. گرنگە کو ئەم ڤێ تەکنولوژیایێ ب رێکەکا ئەخلاقی و بەرپرس بکاربینین، دا کو سوودا وێ بۆ مرۆڤایەتیێ مەزنتر بیت ژ زیانا وێ.
ڤه‌كۆلینه‌كا ئه‌مریكی راگه‌هاند كو بكارئینانا مۆبایلێن زیره‌ك بۆ ماوێ زێده‌تر ژ دو ده‌مژمێران د ماوێ شه‌ڤ و رۆژه‌كێ دا دبنه ئه‌گه‌رێ تووشبوونا مرۆڤی ب نه‌خۆشیا كێمبوونا نه‌مانا سه‌رنج و كێمبوونا چالاكیا (ADHD) د ناڤ مه‌زن و زارۆیان دا.
ئه‌ڤ ڤه‌كۆلینه د رۆژناما جورنال یا كۆمه‌لا نوشداری یا ئه‌مریكی به‌لاڤ بوویه، ئاشكه‌را كریه كو ئه‌و كه‌سێن رۆژانه دو ده‌مژمێران یان زێده‌تر مۆبایلێن زیره‌ك بكاردئینن، ئه‌گه‌رێ تووشبوون ب نه‌خۆیا كێمیا سه‌رنجدانێ (ADHD) ب رێژا 10%ێ زێده‌تره.
ئه‌ڤێ نه‌خۆشیێ ب پلا ئێكێ په‌یوه‌ندی یا ب زارۆیان ڤه هه‌یی، به‌لێ ئه‌و مژوولكرنا ژ لایێ مۆبایلێن زیره‌ك ڤه دروست دبیت، وه‌كو سوشیال میدیا، نامه هنارتن، میوزیك، فلم یان تله‌ڤزیۆن، كێمبوونا سه‌رنجێ د ناڤ زه‌لامان دا كێم دكه‌ت.
ڤه‌كۆله‌ر وه‌سان هزر دكه‌ن كو سوشیال میدیا ب پێزانینێن به‌رده‌وام خه‌لكی لاواز دكه‌ت، ئه‌ڤه ژی دبیته ئه‌گه‌رێ وێ چه‌ندێ به‌رده‌وام بهێنڤه‌دانێ ل سه‌ر ئه‌ركێن خوه وه‌ربگرن دا كو بچنه د ناڤ مۆبایلێن خوه دا.
دشێین بێژین ئه‌و كه‌سێن ل ده‌مێ به‌تال خوه ب ته‌كنۆلۆژیایێ ڤه مژوول دكه‌ن، رێ ناده‌م مێشكێ وان بهێنڤه‌دانێ بده‌ت و سه‌رنجێ وان ئێك ل سه‌ر ئێكێ دبیت، مژوولكرنا وان دبیته ئه‌گه‌رێ وێ چه‌ندێ كو ماوێ سه‌رنجدانا مه‌زنان یێ كێم بیت و ب ساناهی مژوول ببن.
جون راتی هاریكارێ مامۆستایێ ده‌روونی یێ قوتابخانا نوشداری یا هارڤارد دبێژیت: “مرۆڤ به‌رده‌وام خوه د هاڤێژنه گه‌له‌ك كاران دا د كۆمه‌لگه‌ها ئه‌ڤرۆ دا، بكارئینانا به‌رفره‌ها ته‌كنۆلۆژیایێ دشیان دایه ببیته ئه‌گه‌رێ ئالوده‌بوونێ ب شاشێ، ئه‌ڤه ژی دبیته ئه‌گه‌رێ كورتبوونا وێ سه‌رنجدانێ“.
رۆسیل رامسی هه‌ڤپشكێ دامه‌زرێنه‌رێ پرۆگرامێ پێن بۆ چاره‌سه‌ركرن و ڤه‌كۆلینا (ADHD) یێ مه‌زنان ل قوتابخانا نوشدار یا پێرێلمان ل زانكۆیا په‌نسلڤینیا دبێژیت: “تها نێزیكی 366 میلۆن كه‌سێن پێگه‌هشتی ل سه‌رانسه‌ری جیهانێ تووشی بوویه‌نه“.
ب گۆره‌یی ڤه‌كۆلینێن به‌لگه‌یێ ئاماژێ ب وێ چه‌ندێ دكه‌ن كو ته‌كنۆلۆژیایێ كارتێكرن یا ل سه‌ر ره‌فتارێن مێشكی هه‌یی، ئه‌ڤه ژی دبیته ئه‌گه‌رێ زێده‌بوونا نیشانێن تووشبوون ب نه‌خۆشیا (ADHD) ژ وان خرابیا ده‌ستكرد یا سوزداری و جڤاكی و ئالوده‌بوون ب ته‌كنۆلۆژیایێ و دابڕینا جڤاكی، خرابیا گه‌شه‌كرنا مێشكی و تێكچوونا خه‌وێ.
قەیس وەیس:
چاڤەڕێ دهێتە كرن سوبەهی یاریێن گەڕا 21ێ ژ هەڤڕكیێن خولا پلا نایابا كوردستانێ ل یاریگەهێن جودا یێن هەرێمێ بهێنە ئەنجامدان، ئاكرێ و زاخۆ دێ بەرانبەر یانەیێن هەولێرا پایتەخت ڕاوەستیێن و شەڕێ سێ خالێن یاریێ كەن، ئەوا بڕیارە هەموو یاری ل دەمژمێر 2:30 پشتی نیڤرۆ بهێنە كرن.
تیما یانەیا زاخۆ دێ ل یاریگەها دەلال دناڤ ئەرد و جەماوەرێ خوە دا دێ مێڤاندارییا یانەیا پێشكەرگەییا هەولێر كەت ئێك ژ یاریێن ب هێز و ئاگرین بۆ هەردو یانەیان، كوڕێن خابووری خودان 35 خالان ژ نەهـ سەركەفتن، هەشت وەكهەڤی و دو خوسارەتییان رێزا سێیێ دهێـت، ژلایێ خوەڤە پێشمەرگەیا هەولێر 39 خال كۆمكرینە ڕێزا دویێ دهێت، زاخۆ دێ بزاڤێ كەت بۆ سەركەفتنێ پێخەمەت زێدەتر خوە نێزكبوون بۆ سەرێ لیستێ، د بەرانبەردا تیما مێڤان خوە ب دەستڤەبەرنادەت و دێ هێت ب هەمان هیڤی و ئارمانج ئەوژی سەرێ لیستێ یە.
ژلایێ خوەڤە تیما یانەیا ئاكرێ دێ ل یاریگەها خوە یانەیا برایەتی مێڤانكەت و هیڤیێن وێ زێدەتر پێشڤەبچیت ئەوا د نوكە دا 26 خال كۆمكرین ل رێزا پێنجێ دهێت ژ هەشت سەركەفتن، دو وەكهەڤی و هەشت خوسارەتی، مێڤانا وێ برایەتی ب جووداهییا یارییا سەركەفتن دناڤبەرا واندا ل رێزا شەشێ دهێت ب حەفت هەمان خالان، هەڤڕكی و ناكۆكی بۆ سێ خالان كێمتر نابیت ژ یارییا زاخۆ و پێشمەرگە.
ژ یاریێن دی، ئەینیێ، هندرین- پێشەسازی، رۆژا شەمبی، شەقلاوە- سیروانی نوو، هەولێر- شێروانە، ڕانیە- چوارقۆرنە، بۆ زانین ژبەر خوەڤەكێشانا یانەیا سەیدسادق ژ خولێ د یارییا ڤێ حەفتیێ دا هاتە هژمارتن خوسارەت ب سێ گۆلان بێ بەرانبەر دگەل یانەیا دەربەندیخان.
لیستا گشتی یا خولێ بەری دەستپێكرنا هەڤڕكیێن گەڕا 21ێ.
1- شێروانە 40 خال.
2- پێشمەرگەیا هەولێر 39 خال.
3- زاخۆ 35 خال.
4- ڕزگاری 27خال.
5- ئاكرێ 26 خال.
6- برایەتی 26 خال.
7- هەولێر 24 خال.
8- هندرین 23 خال.
9- دەربەندیخان 23 خال.
10- سیروانی نوو 23.
11- پیشەسازی 23 خال.
12- ڕانیە 23 خال.
13- چوارقۆرنە 19 خال.
14- شەقلاوە 16 خال.
15- سەید سادق پێنج خال.
نيشاندان