سەرۆك مەسعود بارزانی پەیامەك ب هەلكەفتا سالڤەگەرا 34 یا سەرهلدانا خەلكێ كوردستانێ ل سالا 1991 بەلاڤكر و ئاماژە ب وێ چەندێ كر» سەرهلدان ئێك ژ سەروەری و دەستكەفتێن بها یێن گەلێ كوردستانێ بوو. ب ئیرادەیا ئازادیخوازییا گەلێ كوردستانێ و قەهرەمانییا پێشمەرگەی و ئێكڕێزییا ئالیێن ناڤ بزاڤا رزگاریخوازا گەلێ كوردستانێ سەرهلدانێ هاتە كرن و سەركەفتن ب دەستڤەئینا».
سەرۆك بارزانی دوپاتكر ژی» سەرهلدانا دژی دەزگەهێن ستەمكار و داگیركەر، پەیامەكا رۆهن بوو كو سەرەرای هەبوونا ستەمێ و سەركوتكرنێ، گەلێ كوردستانێ یێ زیندییە و ئازادیێ و سەربەستیێ دڤێت».
سەرۆك بارزانی گۆت ژی» ب ڤێ هەلكەفتا پیرۆز دوپاتیێ ل بهایێن پیرۆز یێن سەرهلدانێ و پەیاما ئاشتیێ و برایەتیێ و پێكڤەژیانا گەلێ كوردستانێ دكەین».
دەقێ پەیاما سەرۆك بارزانی ب هەلكەفتا سالڤەگەڕا 34 یا سەرهلدانا پیرۆز:
ب هەلكەفتا سالڤەگەرا 34 یا سەرهلدانا مەزن یا گەلێ كوردستانێ پیرۆزباهیێ ل مالباتێن سەربلندێن شەهیدان و پێشمەرگێن قەهرەمان و هەموو خەباتكەر و ئازادیخواز و نیشتمانپەروەران و هەموو خەلكێ كوردستانێ دكەم.
سەرهلدان ئێك ژ سەروەری و دەستكەفتێن بها یێن گەلێ كوردستانێیە. ب ئیرادەیا ئازادیخوازییا گەلێ كوردستانێ و قەهرەمانییا پێشمەرگەی و ئێكڕێزییا ئالیێن دناڤا بزاڤا رزگاریخوازا كوردستانێ سەرهلدان هاتە كرن و سەركەفتن ب دەستڤەئینا. سەرهلدان ل دژی دامودەزگەهێن ستەماكر و داگیركەر، پەیامەكا رۆهن بوو كو سەرەرای هەبوونا ستەمێ و سەركوتكرنێ، گەلێ كوردستانێ یێ زیندییە و ئازادی و سەربەستی دڤێت. سەرهلدانێ ئەو راستییە سەلماند كو داگیركاری و ستەم چەند ب هێز ژی بن، ئەنجام هەر دێ ب دوماهی هێت و ئیرادە و هێزا گەلێ كوردستانێ دێ یا سەركەفتی بیت.
ب ڤێ هەلكەفتا پیرۆز دوپاتیێ ل بهایێن پیرۆز یێن سەرهلدانێ و پەیاما ئاشتیێ و برایەتیێ و پێكڤەژیانا گەلێ كوردستانێ دكەین. سلاڤ بۆ گیانێ بلند یێ شەهیدێن سەرهلدانێ و هەموو شەهیدێن خەباتا رزگاریخوازا كوردستانێ دهنێرین، كو ب خوونا خوە یا پاقژ ئازادی و سەربەستی بۆ گەلێ مە ب دەستڤەئینا.

نێچیرڤان بارزانی، سەرۆكێ هەرێما كوردستانێ ب هەلكەفتا سالڤەگەرا 34 یا سەرهلدانا پیرۆز یا گەلێ كوردستانێ ل سالا 1991 پەیامەك بەلاڤكر و تێدا دبێژیت: فیدرالی و دەستكەفتێن دستووری و كاریگەرییا ئەڤرۆ یا كوردستانێ بەرهەمێن سەرهلدانێ نە.
نێچیرڤان بارزانی د پەیاما خوە دا گۆت» ب رێز ڤە سالڤەگەرا سەرهلدانا ئادارا 1991 ساخ دكەین، ب ڤێ هەلكەفتێ پیرۆزباهیێ ل خێزان و كەسوكارێن سەربلندێن شەهیدان، پێشمەرگێن قەهرەمان و هەموو گەلێ كوردستانێ، ب هەموو پێكهاتەیێن خوەڤە دكەم».
سەرۆكێ هەرێما كوردستانێ گۆت ژی» سەرهلدان ویستگەهەكا دیرۆكی و چارەنڤیسساز و خواستا كوردستانییان بوو د بەرهنگاربوونا دیكتاتۆریەتێ و ستەمكاریێدا. گەلێ كوردستانێ ب باوەرییا ب هێز و ب دادپەروەرییا دۆزا خوە، ئێكڕێز و ئێكگرتی، ل سەر بنەمایێ ئازادی، دادپەروەری، سەرهلدا و دەرگەه ب روویێ پاشەڕۆژەكا نوو ڤەكر. بەرهەمێ خەباتەكا دوور و درێژ و قوربانیدانا مەزن یا پێشمەرگەی و گەلێ كوردستانێ بوو بەر ب چەسپاندنا مافێن خوە یێن رەوا د ئیراقا نوودا».
رۆهنكر ژی» فیدرالی و دەستكەفتێن دستووری و بەرهەڤی و كاریگەرییا ئەڤرۆ یا كوردستانێ، بەرهەمێن ڤێ سەرهلدانا مەزنن، لەوما، پاراستنا دەستكەفتان و مسۆگەركرنا مافێن نڤشێن مە یێن داهاتی، ب ئێكڕێزی، ئێكگرتن و تێكگەهشتنا هەموو هێز و پێكهاتەیان دهێتە كرن. رەوشا هەرێمی و ئاستەنگێن ناڤخوەیی و دەرەكی، ژ مە هەموویان دخوازیت ب گیانێ بەرپرسیارەتییا هەڤپشك كار بكەین، ژ وانێن بۆری فێر ببین و بەرژەوەندییا گشتییا گەلێ مە بپارێزین».
ل دوماهیێ گۆت» بد ڤێ هەلكەفتا پیرۆزدا، دوپات دكەین كو دێ بەردەوام بین د كاركرنێدا بۆ ب دەستڤەئینانا ئارمانجێن بلند یێن سەرهلدانێ و خەاتا ئاشتییانە و دیپلۆماسی بۆ پاراستنا مافێن گەلێ كوردستانێ. بۆ وێ چەندێ خواست و هیڤیێن كوردستانییان بۆ پاشەڕۆژەكا باشتر و پیشكەفتنێ ب دەستڤەبینین، دڤێت بنەمایێن پێكڤەژیانا ئاشتییانە، ب هێزكرنا كەلتوورێ هەڤدوقەبوولكرنێ، چەسپاندنا دیموكراسیێ و كارێ هەڤپشك ب گیانێ بەرپرسیارەتییا نیشتمانی ب هێز بكەین. ئەم هەموو، نڤشێ پشتی سەرهلدانێ، نڤشێ نوكە و یێ داهاتی ژی دڤێت ب پێزانین و مفاوەرگرتن ژ بۆری، ب باوەری و ئومێد ڤە پێنگاڤان بەر ب پاشەڕۆژێ ب هاڤێژین».

سەرۆكێ حوكمەتا هەرێما كوردستانێ ب هەلكەفتا سالڤەگەرا 34 یا سەرهلدانا پیرۆز ل ئادارا 1991 پەیامەك بەلاڤكر و تێدا ئاماژە ب وێ چەندێ كر، ئەستەمە خەلكێ كوردستانێ ل بن هیچ فشار و گەفەكێدا دەست ژ مافێن خوە یێن رەوا بەردەت.
مەسرور بارزانی، سەرۆكێ حوكمەتا هەرێما كوردستانێ د پەیاما خوە دا گۆت» ئێك ژ سەروەریێن مەزن یێن گەلێ كوردستانێ كو هەردەم جهێ شانازییا مەیە، سەرهلدانا سەرانسەرییا گەلێ كوردستانێیە، كو هەموو پێكهاتەیێن گەلێ مە پشكداری تێدا كر» .
مەسرور بارزانی ئاماژە ب وێ چەندێ ژی كر» ژ ئەنجامێ ئێكڕێزی و ئێكگرتنا گەلێ كوردستانێ و هێز و ئالیێن كوردستانی، هەرێما كوردستانێ ژ ستەمێ و داگیركاریێ هاتە ئازادكرن، ژ ئەنجامێ هەلبژارتنێن ئازاد و دیموكراسی ژی پەرلەمان و حوكمەتا هەرێما كوردستانێ هاتنە دامەزراندن».
د پشكەكا دی یا پەیاما خوەدا، سەرۆكێ حوكمەتا هەرێما كوردستانێ گۆت» ژ هەموو دەمەكی دی مە زێدەتر پێدڤی ب ئێكڕێزیێ و هەڤهەلوەستیێیە ل سەر داكۆكیكرنێ ژ قەوارەیێ دستووری و دەزگەهێن قانوونی و شەرعی یێن هەرێما كوردستانێ و ئەو دەستكەفتێن ژ ئەگەرێ خەبات و قوربانیدان و گیانفیداییا پێشمەگێن قەهرەمان و خوونا گەش یا شەهیدێن مە یێن سەربلند مە ب دەستڤەئیناین، كو ئەستەمە خەلكێ كوردستانێ، ل بن هیچ فشار و گەفەكێدا، دەست ژ مافێن خوە یێن رەوا بەردەت».

مەكتەبا سیاسییا پارتی دیموكراتی كوردستان بەیاننامەیەك ب هەلكەفتا سالڤەگەرا 34 یا سەرهلدانا پیرۆز بەلاڤكر كو تێدا هاتیە: خەباتا گەلێ مە یێ خوراگر ب هەموو تەخ و چین و پێكهاتێن خوەڤە بۆ گەهشتنێ ب ئارمانجێن مە یێن رەوا هەردەم جهێ شانازیێ بوو.
دەقێ پەیاما مەكتەبا سیاسییا پارتی دیموكراتی كوردستان ب هەلكەفتا سالڤەگەرا 34 سا سەرهدانێ..

ئەڤرۆ هەلكەفتەكا پڕ مەزنە د دیرۆكا سەرفەرازی و سەروەرییا بزاڤا رزگاریخوازا گەلێ مە، بەری 34 سالان جەماوەرێ كوردستانێ بەر ب ستەمێ و سەركوتكرنێ سەرهلدا و بەرپەرێ نوو یێ خەباتا خوە نڤیسی.
دیرۆكا درێژخایەنا خەباتا گەلێ مە یێ خۆڕاگر ب هەموو تەخ و چین و پێكهاتەیێن خوەڤە بۆ گەهشتن ب ئارمانجێن مە یێن رەوا و ب دەستڤەئینانا مافێن مە یێن پێشلێكری، هەردەم جهێ شانازیێ بوو بۆ نەتەوە و بزاڤا سیاسی و نڤش ل دووڤ نڤشی.
دیرۆكا مە یا نەتەوەیی و نیشتمانی ب قوربانیدانێ و هەلوەست و ئیرادەیا رۆل و وەفادار و دلسۆزان یا هاتیە نەخشاندن، ئەو هێزە هەردەم قەلغان بوو ل پێشبەری ستەمێ و زۆرداریێ و سەركوتكرنێ بوو، ژ وێ روانگەهێ ژی سەلماند كو هێزا گەلی مل ب ملێ هێزا پێشمەرگەی، هێزا راستەقینەیا شۆڕەش و بەرخودانێ و سەرهلدانێ بوو.
ئێك ژ زنجیرەیێن هەرە چارەنڤیسسازێن خەبات و بەردەوامبوونا خەباتا مە، سەرهلدانا پیرۆز یا (5 ئادارا 1991) بوو كو ب هیمەت و پشكدارییا جەماوەرێ دلسۆز و خەلكێ خەباتكەر و بڕیارا سەركردایەتییا سیاسییا بەرەیێ كوردستانی و هێز و ئالیێن سیاسی یێن كوردستانێ ل باژێرێ رانیە دەرگەهێ سەرهلدانێ، هاتە هەلكرن.
زنجیرەیا بەرخودان وسەرهلدانێ، وەكو یەیامەكا رەوا و هەقیانەیا گەلێ مە و پێدڤییەكا قۆناغێ پەیدابوو، هێڤێن و پێنگاڤەكا مەزن و هیڤیبەخش بوو بۆ دروستكرنا ئەزموونەكا نوو یا حوكمڕانیێ ل سالا 1992 ئەوژی پەرلەمان و حوكمەتا هەرێما كوردستانێ بوو كو بوویە رەنگڤەدانا راستەقینەیا خواستا جەماوەرێ سەرهلدایێ كوردستانێ.
رێكا ب دەزگەهكرنێ و ئاڤاكرن و ئاڤەدانكرنێ رێكەكا ب ساناهی نەبوو، بەلكو هەتا ئەڤرۆ ژی كۆمەكا كێشە و گیروگرفت و قەیرانان ل سەر هەردو ئاستێ ناڤخوەییا هەرێمێ و دەرڤە بەر ب ڤی قەوارەیێ سیاسیێ هەرێمێ دبن، هەر ژ روویێ سیاسی و ئابووری و ئەمنیڤە هەتا بزاڤێن نەزۆكێن لاوازكرنا وی، بەلێ ب باوەرییا ب هێز و خۆڕاگری و دلسۆزییا رۆلێن گەلێ مە و هێزێن سیاسی یێن وی یێن نیشتمانی و ب رەنج و قوربانییا پێشمەرگێن قەهرەمان، وەلاتێ مە هەردەم ئارام و ئاڤەدان و پاراستی ما و دێ مینیت، سەرەرای هەموو فشار و پیلانان.
ب ڤێ هەلكەفتێ مەزن دا، ئەم ل پارتی دیموكراتی كوردستان، وەكو هەردەم ل سەر هەمان پرەنسیپ و پەیاما راست و دروست یا پارتا مە دوپاتیێ ل سەر رێكخستنا ناڤمالا كوردستانی دكەین ب جۆرەكی ب مە هەموو ئالییان ل سەر پرسێن ستراتیژیێن كوردستانی، د داكۆكیكرنێ ژ مافێن مە یێن رەوا و دستووری د ئاخا مە دا ژ دەستكەفت و قەوارەیێ مە یێ نیشتمانی، هەڤئاراستە و هەڤگۆتار بین و هەموو بزاڤێن رژد و دلسۆزانە بكەین ژ پێخەمەت چارەسەركرنا كێشەیان و ئەم هەموو ئالی بەرپرسیارانە بەرژەوەندییا گشتییا خەلكێ كوردستانێ ل بەرچاڤ بگرین و ئەركێ مە یێ بەراهیێ پاراستنا ئاخ و خەلكێ كوردستانێ و ڤێ قەوارەی و دەستكەفتێن مە بیت.
هەڤدەم ل گەل سالڤەگەرا سەرهلدانێ، رەوشا سیاسییا دەڤەرێ ب گشتی و ئیراقێ ب تایبەتی د قۆناغەكا هەستیار و گرنگ دایە، گوهۆڕینێن دیار و بەرچاڤ یێن رووداین، لەوما پێدڤییە هەموو ئالی ل سەر ئاستێ سیاسی و حوكمڕانییا هەرێما كوردستانێ ژ ئالییەكی دوپاتیێ ل سەر ئارامی و پاراستنا دەستكەفتێن مە بكەین، ژ ئالییەكی دی ب هەموو شێوەیەكی كاری بۆ چارەسەركرنا كێشەیێن د ناڤبەرا هەرێما كوردستانێ و حوكمەتا فیدرالیدا بكەین، كو مافێ خەلكێ كوردستانێ و قەوارەیێ دستووریێ هەرێمێ و ماف و موستەحەقاتێن وێ و چەندین پرسێن دی، كو ب گۆڕەی دستوور و قانوونێن فیدرالی دانپێدان پێ هاتیە كرن، لەوما ئەڤرۆ مە زێدەتر پێتڤی ب هەماهەنگیێ و ئێكدەستیێە ل سەر ئاستێ هەرێما كوردستانێ و بەردەوامییا گەنگەشێ و دانوستاندنان ل گەل بەغدا پایتەختا فیدرالی بەر ب چارەسەركرن و ئێكلاكرنا گیروگرفتان تاكو جارەكادی كێشە و قەیران دوبارە نەبن.
ب ڤێ هەلكەفتێ و د ڤی دەلیڤەیێدا جارەكادی ب پشتڕاستیڤە سۆزێ د دەین و پێداگیریێ ل سەر بەرژەوەندیێن بلند یێن گەلێ مە و بەردەوامبوون ل سەر كارنامە و ئەركێن مە یێن نەتەوەیی و نیشتمانی بۆ داكۆكیكرنێ ل بنەمایێن دیموكراسی و فیدرالیو فرەهییا سیاسی، هەروەسا خزمەتگەهاندن و دابینكرنا مافێن خەلكی و باشتركرنا بارێ ئابووری و رەوشا ژیارا وان یا رۆژانە.
ل سالڤەگەرا سەرهلدانا پیرۆز یا كوردستانێ، سەرێ رێزێ بۆ شەهیدێن كورد و كوردستانێ و سەروەرێن وان بارزانیێ نەمر و كاك ئدریسێ هەردەم ل بیر د چەمینین.