دلخاز جەمیل
سوتڤەیەک رویدا
وتو بوویە هەمی تشت
بوویە هەمی ژیانا من
بوویە خەون و هیڤییا من
بوویە دلخۆشییا دلی من
بوویە ئارامییا رێکا من
بوویە ڕۆناهییا ڕۆژێن من
بوویە ساخبونا ژانێن من
بوویە باشترین کەسێ من
بوویە دایکبوونا نوی یا من
بوویە هێز و بریارێن جوانێن من
پالپشت و پشتەڤانێ من
بها و سەنگا ژیانا من
ئەی هەیڤا من یا تمام
ئەی ئەسمانێ من یێ دادپەروەر
ئەی ئەڤینا منا جوان و بها گران.
سالار محەمەد دۆسكی:
7-13
ئەز هاتمە سەر جادێ و هاتم هەتا هاتیمە سەر پرا نێزیك قائیمقامیێ وی دەمی دگۆتنە وێ پرێ پرا سەعدون و دەسپێكا كومبوونێ یە و ژ هەمی ئالیەكی ڤە قوتابیێ دهێن و قوتابیێ دهێن جلكێن فتوە ل بەردانە و چاڤدێریەكا توند یا ل سەر كومبوونێ هەی و كی دهێت و چ لڤین دهێنەكرن، ژ نیشكەكێ ڤە من دیت قوتابخانەكا دهێت و هەر هەمی قوتابیان جلكێ، فتوا ل گەل دانە و مامۆستایێ چاڤدێریێ ل سەر دكەن و هەتا مامۆستا ژی جلكێن رەفیقا كرینێ و مامۆستایەكا ئافرەت ژی ل گەل دا هەبوو و ئەوێ ژی جلكێن رەفیقا كربوونێ و هەر هەمی بەرەف كومبوونێ دچن و ئەز بەرۆڤاژی یێ ژ كومبوونێ دوركەڤم و بەرۆڤاژی هاتنا قوتابیان ژ ناڤ كومبوونێ دەركەڤم، هەمان دەم هەڤالەكێ سندی ژ گەهشتمە من و ئەم بووینە دو كەس كو بەرۆڤاژی قوتابیان دەركەفتین ژ كومبوونێ و من ژ نیشگەكێ ڤە دیت ئەو مامۆستا ئافرەت یا ب جلكێن رەفیقا یا چاڤدێریا من دكەت بەلێ من چ هزر نەكر وی دەمی قوتابیێن پولا شەشێ ئامادەیی ل زاخۆ دهاتنە هژمارتن زانكو چونكە چ قوناغێن هوسا پێشكەفتی نەبوون و قوناغا مە یا دووماهیێ بوو و هاتە بیرا من كو ئەو مامۆستا ئافرەت یا رەفیق بناڤێ نەعیما داود نوكە ل وەلاتێ فەرنسا دژیت هەڤالا وی مامۆستایێ مەیێ رەفیق بوو ئەوێ مە ڤەگوهاستی و هەر یا چاڤدێریا من دكەت ئەز یێ ب عەكسی قوتابیان دەركەڤم ژ مەسیرێ و ئەو سەر بان ژی هەمی دگرتینە ژ زەلامێن ئستخبارت و ئەمنێ و ئەز چوومە مەكوایێ ڤە و من قاتەك بخوە ل مویسل ب 13 دینارا چێكربوو من بربوو مەكەوایێ و ئەز چووم دا قاتا خوە ژ مەكوایێ بینم و مەكوایێ بوومن كرە دناڤ روژنامەكێ دا و پەرتووكێن قوتابخانێ ژی ل گەل من دا بوون و ب رێكا خوە را زڤریمە ڤە و ئێكسەر ئەو مامۆستا رەفیق ل گەل دویێن مغاویر هاتنە بەر سینگێ من و ئێكسەر وێ مامۆستا رەفیق گۆت ئەڤە ئەو كەسە ئەوێ مامۆستایەكێ مە یێ رەفیق قوتای و نوكە ژی یێ ژ مەسیرا سەرۆك سەدام حسێنی درەڤیت و هەر ئێكی دەستەكێ من گرت و من نەشیا باخڤم و ئێكسەر برم هەتا گەهاندیمە ئاڤاهیێ قائیمقامیێ و ئێكێ ئەمنێ یێ ل ئاڤاهیێ قائیمقامیێ رونشتی بوو و گۆتێ ئەڤە ئەوێ خوە ل مامۆستایێ رەفیق دایی و كەسەكێ نەباشە و نوكە ژی یێ ژ كومبوونا پشتەڤانیا سەرۆك سەدامی درەڤیت و مرۆڤەكێ مغربە و گەلەك تشت و ئاخفتن ل دەرحەقی من دا گۆتن و هەر چ نەما نە گۆت و مامۆستا رەفیق ژی ل سەر من بۆ شاهد و گۆت من ب چاڤێن خوە دیتی یە دەمێ ئەڤە ژ كومبوونێ رەڤی و ئەو بخوە ل من ب هێجەت بوون و زانی من چ كریە و من هەڤالەكێ وا بەری سالەكێ ڤەگوهاستیە و ئەز ئەگەر بووم و دیسا چار رۆژا ئامادەیا بێرسفێ هاتبوو گرتن و خوپیشاندانا قوتابیان و چوونا وا بۆ دهۆكێ ئەڤە هەمی ل بەرچاڤا بوون و ل هێجەتەكێ دگەریان و هەمان دەم ئەو مامۆستا رەفیق یا ژن ژی بۆ شاهد ل سەر من ئێكسەر ئەوێ ئەمنێ دانامە بەر شەق و زلهان و گەلەك ئێشاندم و هەر من گۆت هوسا نینە و ب زمانێ عەرەبی گۆت نە ئاخفە و رەفیقا مە ژ خوە وەنابێژیت و نە ئاخفی و ئەز گەلەك ترسیام چونكە ئەو سێ رۆژ بوو ژ بارەگایێ لژنا محلی ل گەلیێ بازێ هاتبووم و كومەكا بەلاڤووكا من ژ جەمال قەدشی ژ گەلیێ بازێ وەرگرت بوون و هندەك ژ ئەوان بەلاڤووكا من ل بێرسفێ و هیزاوا و دەركارێ بەلاڤكربوون و هندەك ژی دناڤ پەرتووكێن من دا بوون ل مال و راستی گەلەك ترسیام چونكە من زانی گونەهێن من بوونە گەلەك و هەمان دەم ژی برایەكێ من دناڤ رێزێن پێشمەرگەی یە و راستی گەلەك ترسیام و ئێكسەر ئینامە بەر دەرگەهێ قائیمقامیێ و دو پولیسێن ل گەل من ئێكسەر پەیوەندی ب ئەمنا زاخۆ كر و گۆتێ بلا ترۆمبێلا ئەمنێ نوكە بهێتە ڤێرە و من پەرتووكێن خوە دانانە سەر ترۆمبێلا پولیسان و من دەست هاڤێـە قەیتانا پێلاڤا خوە گرێدا و من هزرا رەڤینێ كر چونكە من گۆت ئاریشە و كێشا من ل دەڤ حوكمەتێ بووینە گەلەك و یا باشتر ئەوە ب رەڤم و ئێكسەر رەڤیم و هەر دو پولیسان راهێلا من و هەر گۆت راوستە راوستە بزمانێ عەرەبی ئەز كەتمە ناڤ مەسیرێ و ئێدی لایەكێ كومبوونا پشتەڤانیا سەدامی چاڤێ وا ما ل من و هەر ئێكی گۆتە پولیسان هێرڤە چوو هوسا چوو و من مەسیرە ب دووماهی ئینا و بەرەف بازارێن خەیاتا چووم و و بەرەف تاخێ رویتا چووم و دەستێ منێ چەپێ خانیەكێ ئاخێ بوو و دەرگەهێ وێ مالێ یێ ڤەكری بوو و هەمان دەم پێلاڤا من یا بلند بوو و كەعبی بوو و پولیس ب دیف من ڤە و راستی یا نەخوش و ب ترس بوو و ئێكسەر ئەز چوومە وێ مالێ دا و من ژنەك وێ مالێ دا دیت و من گۆتێ خالەت من قورتال بكە و ئەمنا راهێلیتە من و ژوورەك د ژوورەكێ دا بوو و گۆت داو هەرە ژوور و ئەز چوومە ژوورا پشتێ و تەختەكێ داری بوو و ئەز چوومە بن تەختی ڤە و ئەگەر خودێ تشتەكی دبەت و خراب دكەت هوسا یە و دەركەفت ئەو ژن ژی هەڤالا یێن ئەمنێ و دەركەفت و 30 خولەك دەرباز نەبوون و من دیت حەوشا مالا خالەتێ تژی مرۆڤێن ئەمنێ و ئستخبارات و پولیسان بوون و هەر ئێكسەر هاتنە دناڤ ژوور ڤە و ئەز ژ بن تەختی دەرخستم و هوسا دانا من و هەر ئێكی ژ ئالیێ خوە ڤە و هەر جهێ لەشێ من دەستێ وان كەتبایێ شەق و پێن و یا ژ دەستی هاتی ل گەل من كر و ئێكسەر كولانەكێ را دەربازكرم بنگەهێ پولیسان لایێ كەلها زاخۆ بوو و هاڤێتمە دناڤ ژوورەكێ دا و كومبوونا پشتەڤانیا سەدام یا هوسا یە و هند مرۆڤ كوم كرینە و كەسەك نەشێن نە بهێت نە بچیت و نەشێن ل پێش چاڤێن خەلكی من دەرباز بكەن و ببن، پشتی كومبوونا پشتەڤانیا سەدام ب دووماهی هاتی ترۆمبێلەكا ئەمنێ هاتە بەردەرگەهی و دو جەلادێن ئەمنێ دەستێ منێ گرتی و هاڤێتمە ترۆمبێلا ئەمنێ دا و هوسا ئەزێ قوتایم سەرێ ل من پەقاندی و دەمێ ڤەگوهاستیمە ئەمنێ من دیت كورەكێ دژوور ڤە من گۆتێ تە خێرە گۆت خەلكێ كەركووكێ مە ل سەسر سنوری گرتیمە و من ئنیەت بوو بچمە توركیا بەلێ ل سنوری هاتیمە گرتن و پشتی كومبوونا پشتەڤانیا سەدامی ب فەرمی ب دووماهی هاتی جارەكا دی ئەوێن ئەمنێ هەر هەمی هاتنە ئەمنێ و هەر هەمیان پێكڤە دانا من و گۆت دانپیدانێ بكە و پەرێن منێن كەڤن هەمی ڤەكرن و گۆت ئەم زانین ئەو دەنگ و باس تە هنارت بوونە ئێزگەی و دانپیدانێ بكە و ناڤێ تە دهاتە خاندن شەهید و دڤێت تو دانپیدانێ بكەی و دلێ جەلادێن ئەمنێ ژمن یێ تژی بوو و ئەو چەند بوو بخوە ل هێجەتەكێ دگەریان و جورێ، ئەشكەنجەدانێ ل لەشێ من هاتنە بكارئینان هەلاویستن و فەلاقە و جورێن كێبلا و كەهرەبێ و هەر تشتێ ڤیایی ل گەل من دا كر و من دانپیدان نەكر و نێزیكی 20 رۆژا دەرباز بوون و ئەزێ دهێمە ئەشكەنجەدان و ئەو بوو خودێ ئەز نە بربووم و هەمان دەم دایك و باب من ژی یێ بەردەاوم ل من دگەرن و كەسەك نوزانیت ئەز ل كیڤە مە.
زنار تۆڤی
هونەرمەندێ دیاریێ دهۆكێ و كوردستانێ (سالح ئامێدی) ژ ئەنجامێ نەخۆشیەكێ، پشتی پتر ژ (50) سالان خزمەتا سترانا كوردی كری وەغەر کر.
سالح ئامێدی، هونەرمەندەكێ دیار و ناسیار بوو ل دەڤەرا بەهدینان، كو ب گۆتنا سترانێن فولكلۆری یێن رەسەن د سالێن حەفتێبان و هەشتێیان دا رۆلەكێ مەزن هەبوو د خزمەتكرنا سترانا كوردی دا و گەلەك ستران ب دەنگێ خۆ گۆتینە و پاراستینە.
سندس سالح سلێڤانەیی
حەیدەر حەسەن قەبلان، ئەكتەرێ دێرینێ كۆما دەڤەرا ئامێدیێ، ددیدارەكێ دا بۆ رۆژنامەیا ئەڤرۆ گۆت: ل سالێن نوتان ئەز هاتیمە دناڤ رێزێن كۆما پەیاما دەڤەرا ئامێدیێ دا و دەست ب زارڤەكرنێ كریە و ب ڤێ رێكێ گەلەك بەرنیاس بوویمە و زێدەتر خوە دناڤ جڤاكی دا دیتی یە و هاتنا من دناڤ هونەری دا گەلەك دەولەمەند كریمە.
ناڤهاتی گۆت: خۆشترین تەمسیلی بۆ من (حەمێ بەرگڕی) بوو، نەخۆشترین تەمسیلی ژی مە ئەنجامدا سەرێ من تێدا هاتە شكاندن و ئەڤە بۆ من یا نەخۆش بوو، هەروەسا بەحسێ ژیانا خوە یا كەسۆكی كر و دیاركركو ئەو بابێ شەش كوڕ و سێ كچانە و خێزانا وی گەلەك یا ل گەل هاریكارە و تایبەت دڤێ نەخۆشیێ دا و ئەو ژی ئاشكەراكر كو ئەڤە بۆ ماوەكە یێ ژبەر نەخۆشیێ ژ هـــــــــــــــــــــــونەری دووركەفتی یە و دووماهی كارێ وی ل سالا2023 بوویە و جهێ ئاماژەكرنێ یە كـــــــــــــــــــــو هـــــــــــــــونەرمەند حەیدەر حەسەن ئێك ژ ئەندامێن كومپا پەیاما دەڤـــــــــەرا ئامێدیێ بوو و ل پشتی سەرهلدانا پیرۆز رۆلەكێ هەرە كاریگەر دبزاڤا هونەری و پێشخستنا دراما كوردی یا خۆمالی دا دیتی و ماوەكە نەخۆش كەفتیە.
عایشە عەجیب
خودانێ نڤیسنگەهەكا ئامیرەیێن مۆزیكێ ل دهۆكێ دیاركر كو ئەڤە (28) سالن وی مایكا هونەرمەندێ خودێ ژێڕازی (عەبدولواحد زاخۆیی) ل دەف خۆ پاراستی و گەلەك بكڕ دهێنێ، لێ ئەو ب چو ڕەنگان رازی نابیت بفرۆشیت.
وەعەد دهۆكی، خودانێ نڤیسینگەها مهاباد یا مۆزیكێ، دا بۆ رۆژنامەیا ئەڤرۆ گۆت: ل سالا 1994 بەردەوام هونەرمەندێ خودێ ژێڕازی (عەبدولواحد زاخۆیی) د هاتە دەف مە و دو مایك بۆ شەهیانان دبرن، بەلێ ب مخابنی ڤە ئێك یا بەرزەبووی و یا دی دناڤ شوشەیەكێ دا من یا پاراستی، گەلەك خەلك دهێن دبینن و وێنەیان دگەل دگرن، گەلەك ژی دبێژن بفرۆشە مە، لێ ئەز ب چو ڕەنگان رازی نابم و نافرۆشم، چنكو بێهنا شوون دەستێن عەبدولواحدی ژێ دهێت.
هەروەسا گۆت: هەروەسا چەندین جاران مالا هونەرمەندی ژی هاتینە و گەلەك كەیفا وان بڤێ مایكێ هاتیە و وێنە دگەل گرتیە، لەورا ئەڤ مایكە بۆ من گەلەكا بهایە و فرۆتنا وێ
مەحالە.
هەرهین محەمەد
سترانبێژ (سەربەست زاخۆیی) ددیدارەكێ دا بۆ رۆژنامەیا ئەڤرۆ دبێژیت: ژینگەها زاخۆ ب گشتی بۆ هونەرمەندێن زاخۆ جوداهیەكا مەزن هەیە ل گەل باژێرێن مە یێن دی یێن كوردستانێ و ئەگەرێ وێ ژی بۆ خەلكێ زاخۆ دزڤڕیت، چونكو ژ گەلەك پێكهات و عەشیرەتان پێكهاتیە و هەر ئێك ژوان ژی فلكلۆر و دابونەریت و تایبەتمەندیێن خوە هەنە و حەزژێكەرو تاما زاخۆ دبیتە فاكتەرەكێ سەرەكی هونەرمەندێن دەنگ خۆش بەرهەم بینن و ئەگەر ئەم سەحكەینێ ئەیاز و ئەردەوان دو قوتابخانەیێن جودانە ب رەنگێ خوە یێ سترانێ و هەر ئێكێ ستایلێ خوە یێ تایبەت هەبوویە.
هەروەسا گۆت: ئەز وەكو سەربەست زاخۆیی ئەو ناڤێن بەری نوكە من بەحسێ وان كری ئەز شەرم دكەم بێژم هونەرمەندم، دشێم بێژم حەزژێكەرێ سترانێ مە و هەڤالێ هونەرمەندانم و ژوان مامۆستا حەز بۆ من چێبوویە من دەست ب ستران گۆتنێ كریە، خوزی ئەز ژی وەكو وان ببمە هونەرمەند و وەكو وان ناڤدار ببم و هەموو هیڤی و ئومێدێن من ئەون ب رێیا دەنگێ خوە خزمەتا هونەرێ كوردی ل هەر چار پارچەیێن كوردستانێ بكەم، بەلێ ب مخابنی ڤە هەتا نوكە چ گرنگی ب هونەری نەهاتیە دان وەكو پێدڤی و چو رێز نەدایە سترانبێژێ كورد و هینگێ رێز لێ دهێتەگرتن دەمێ وەغەرا دووماهیێ دكەت..
سەرۆك مەسعود بارزانی ب هەلكەفتا 24 سالییا دەرچوونا رۆژنامەیا «مەدا»پەیامەك بەلاڤكر و تێدا دبێژیت: وەك رێزگرتنەك بۆ گەشەیا پیشەیی و نیشتمانپەروەرییا دیار یا هەوە، ب هەلكەفتا 24 سالییا رۆژنامەیا «مەدا»، گەرمترین پیرۆزباهیێ ئاراستەیێ «فەخری كەریم» سەرۆكێ دەزگەهێ راگەهاندن و رەوشەنبیری و هونەری یێ مەدا و دەستەیا نڤیسەرێن رۆژنامەیێ دكەم.
سەرۆك بارزانی گۆت ژی: رۆژنامەیا «مەدا» پشكدار بوویە د دامەزراندنا بهایێن رۆژنامەگەرییا ئازاد، هەستكرن ب بەرپرسیارییا نیشتمانی و دەولەمەندكرنا رەوشەنبیری و میدیایی د ئیراقێ دا.
هەروەسا ڤێ هەلكەفتێ ب شانازییەك ناڤ دكەت بۆ دەزگەهەكێ میدیایی كو پتر ژ 20 سالانە ئامادەیی و كارتێكرنا خۆ پاراستییە، هیڤۆیا سەركەفتن و بەردەوامیێ بۆ «مەدا» و ستافێ وێ ژی دخواست و هیڤیخواست ژی د خزمەتا نیشتمانی و راستییان دا هەر یا بەردەوام بیت.
نێچیرڤان بارزانی سەرۆكێ هەرێما كوردستانێ د سالڤەگەڕا 93 یا رۆژا شەهیدێ ئاشووری دا پەیامەك بەلاڤكر و تێدا دوپاتی ل سەر پاراستنا كولتوورێ پێكڤەژیانێ و هەڤدووقبوولكرنێ ل هەرێما كوردستانێ كر و سلاڤێن رێز و وەفاداریێ بۆ گیانێ شەهیدان و قوربانیێن بێتاوان یێن كۆمكوژییا سێمێلێ هنارتن و راگەهاند كو د سالا 1993ێ دا ئاكنجیێن زێدەتر ژ 60 گوندێن پارێزگەهێن نەینەوا و دهۆكێ بوونە قوربانیێن دەستێ دەستهەلاتا وێ دەمێ یا پاشایەتییا ئیراقێ. دیاركرژی كو ئەڤ هەلكەفتا پڕ ژ ئازار دەرفەتەكە بۆ دوپاتكرنێ ل سەر پاراستن وبهێزكرنا كولتوورێ فرەیی و پێكڤەژیانێ.
سەرۆكێ هەرێمێ دیاركر ژی كو كوردستان هەموو دەمان ب نیشتمانێ هەڤپشكێ هەموویان دمینیت و دڤێت ئەڤ بنەمایێ پێكڤەژیانێ ل هەرێمێ وەكو كولتوورەكێ نەتەوەیی و مرۆڤی بهێتە پاراستن و گەشەپێدان.
مەسرور بارزانی، سەرۆكێ حوكمەتا هەرێما كوردستانێ د چاڤپێكەفتنەكێ دا ل گەل كەنالێ (ئەلجەزیرە) یێ قەتەری دیاركر كو هەرێما كوردستانێ نابیتە پشكەك ژ ململانێیێن دەڤەرێ و پشتەڤانییا حوكمەتا ئیراقێ ژی دكەت بۆ كۆنترۆلكرنا چەكی د بن دەستێ هێزێن فەرمی دا. مەسرور بارزانی د وێ چاڤپێكەفتنێ دا دوپاتكر كو هەرێما كوردستانێ رووبرڕووی زێدەتر ژ هەزار هێرشێن مووشەكی و درۆنی بوویە كو ئەڤ هێرشە راستەوخۆ ژ ئالیێ ئیرانێ ڤە یان ژ ئالیێ چەند گرۆپێن چەكدار یێن ناڤ ئیراقێ ڤە هاتینە ئەنجامدان.
هەروەسا سەرۆكێ حوكمەتا هەرێما كوردستانێ هەبوونا هەر پەیوەندییەكێ د ناڤبەرا هەرێما كوردستانێ و ئیسرائیلێ دا ب تەمامی رەتكر و دوپاتی ل وێ چەندێ كر كو بڕێڤەبرنا سیاسەتا دەرڤە د دەستهەلاتا حوكمەتا فیدڕالی دایە، هەروەسا هەبوونا سەربازێن ئەمریكی ل بنگەهێ هەریر یێ ئەسمانی رەتكر و گۆت» ئەو بنگەهە دەمێ دەهـ سالانە چو هێزێن ئەمریكی تێدا نینن».
سەبارەت پەیوەندیێن هەرێما كوردستانێ ل گەل وەلاتێن دەوروبەر، سەرۆكێ حوكمەتا هەرێما كوردستانێ ئاماژە كر كو پەیوەندیێن وان ل گەل سووریایێ د باشن و بەرەڤ پێشڤە دچن و پەیوەندیێن ل گەل توركیایێ ژی ب گەلەك باش هەمژارتن و ئاماژە ب وێ دا كو هەماهەنگی د ناڤبەرا هەردو ئالییان دا هەیە.
مەسرور بارزانی دیاركر ژی كو چو ئالییەكێ گڤاشتن نەئێخستینە سەر حوكمەتا هەرێما كوردستانێ بۆ چوونا د ناڤ شەڕان دا و رۆهنكر كو ئارمانجا سەرەكی یا وان پاراستنا هەرێما كوردستانێ و دوورئێخستنا وێ یە ژ ئالۆزیێن دەڤەرێ و حوكمەتا هەرێما كوردستانێ ژی بەردەوام د بزاڤان دا بوویە هەڤسەنگییا دیپلۆماسی ب پارێزیت و پەیوەندیێن ئابۆری و سیاسی ل سەر بنەمایێ رێزگرتنا هەڤپشك پێشڤەببەت دا كو هەرێمێ ژ مەترسیێن شەڕێن رۆژهەلاتا ناڤین ب پارێزیت.
سەرۆكێ حوكمەتا هەرێما كوردستانێ د پەیوەندییەكا تەلەفۆنی دا، هەڤخەمی و سەرەخۆشییا خۆ ئاراستەی بەیان سامی عەبدولڕەحمان، شیرەتكارا بلند یا سەرۆكێ حوكمەتا هەرێمێ كر، ژ بەر وەغەركرنا هەڤژینێ وێ.
نڤیسینگەها سەرۆكێ حوكمەتا هەرێما كوردستانێ بەیاننامەیەك بەلاڤ كر و تێدا هاتییە، مەسرور بارزانی، سەرۆكێ حوكمەتا هەرێما كوردستانێ، د پەیوەندییەكا تەلەفۆنی دا، سەرەخۆشی ل بەیان سامی عەبدولڕەحمان، شیرەتكارا بلند یا سەرۆكێ حوكمەتێ بۆ كاروبارێن دەرڤە و گوهۆڕینێن سەقای كر، بۆ وەغەركرنا هەڤژینێ وێ، هونەرمەند و شانۆڤانێ كورد «موزەفەر شافعی».
د راگەهاندنێ دا هاتییە، سەرۆكێ حوكمەتێ بەهیداری و سەرەخۆشی و هەڤخەمییا خۆ گەهاندێ و هیڤیخواست خودایێ مەزن گیانێ وی ب بەهەشتێ شاد بكەت و ئارامی ژی ب بنەمالا وان ببەخشیت.
بەیان سامی عەبدولڕەحمان، سوپاس و پێزانینا خۆ و یا بنەمالا خۆ بۆ پەیوەندی و هەڤخەمییا سەرۆكێ حوكمەتا هەرێمێ دیار كر.
نيشاندان