سەربەست لەزگین، ئەندامێ مەكتەبا سیاسی و بەرپرسێ مەكتەبا ڕێكخستنا پارتی ل بەهدینان، دوهی 8/7/2026 ل بارەگایێ مەكتەبێ پێشوازی ل شاندەكێ ئێكەتیا نڤیسەرێن كورد تایێ دهۆكێ، ب سەرپەرشتیا حەسەن سلێڤانەیی، سەرۆكێ ئێكەتیا ناڤبری كر.
د روونشتنەكێ دا، بەرپرسێ مەكتەبا ڕێكخستنێ پەسنا ڕۆلێ گرنگێ ئێكەتیا نڤیسەرێن كورد د خزمەتكرنا چاند، زمان، دیرۆك و ئەدەبیاتا كوردی و بەلاڤكرنا هزر و ڕەوشەنبیریا نەتەوەیی و نیشتیمانی د ناڤ گەلێ كوردستانێ دا كر.
ژ لایێ خۆڤە، شاندێ ئێكەتیا نڤیسەران خۆشحالیا خۆ ب ڤێ دیدارێ نیشادا و سوپاسیا سەرۆك بارزانی كر بۆ پشتەڤانیا جەنابێ وان بۆ ڤێ توێژێ و بلند هەلسەنگاندنا دیتنا پارتی بۆ پەیڤ و زمان و فەرهەنگا كوردی.
دیسا هەر دوهی 8/7/2026 سەربەست لەزگین، ئەندامێ مەكتەبا سیاسی و بەرپرسێ مەكتەبا ڕێكخستنا پارتی ل بەهدینان، د ڕێوڕەسمەكێ‌ تایبەت دا 10 كادرێن چالاك د بیاڤێ سۆشیال میدیایێ دا خەلاتكرن، كو ژ هەر پێنج لقێن سەر ب مەكتەبا ڕێكخستنێ ڤە بوون.
بەرپرسێ مەكتەبا ڕێكخستنێ د پەیڤەكێ دا ڕۆلێ وان كادران بلند هەلسەنگاند و پشتەڤانیا خۆ و مەكتەبا ڕێكخستنێ بۆ هەمی ئەندام و كادرێن چالاك د ڤی بیاڤێ گرنگ دا نیشادا و داخوازا سەركەفتنێ بۆ وان خواست.

دهۆك، دلۆڤان ئاكرەیی:

رێڤەبەرێ گشتی یێ باژێرڤانیان ل پارێزگەها دهۆكێ دیاركر، ب گوژمێ ملیارەك و 499 ملیۆن دیناران رێكا گۆڕستانا سەرتەنگێ دێ بیتە جۆتساید.
دیار بەحری، رێڤەبەرێ گشتی یێ باژێرڤانیان ل پارێزگەها دهۆكێ بۆ رۆژنامەیا ئەڤرۆ گۆت: «پڕۆژەیێ چێكرنا رێكا 30 مەتری یا جۆتساید یا گۆڕستانا سەرتەنگێ ب درێژاهیا هزار و 100 مەتران ژلایێ باژێرڤانیا سێمێلێ ڤە ل سەر بودجا تایبەت یا پارێزگەها دهۆكێ دهێتە بجهئینان».
گۆت ژی: «كار ب باشی لسەر دهێتە كرن، ب تەمامبوونا ڤێ جادەیێ دێ ئاسانكاری بۆ وەلاتیێن قەستا گۆڕستانا سەرتەنگێ دكەن هێتە كرن، دیسا دێ كارئاسانی ژی بیت بۆ هاتنوچوونا خەلكێ دەڤەرا سێمێلێ، كو ب سەناهیتر بگەهنە جادەیا گشتی».

ب چاڤدێری و ئامادەبوونا د. عەلی تەتەر، پارێزگارێ دهۆكێ و د. نەوزاد عەبدوللا، بەرپرسێ لقێ ئێك یێ پارتی و دەڤەردارێ دهۆكێ و ڕێڤەبەرێ گشتی یێ پەروەردەیا دهۆكێ و پەڕلەمانتار و هەژمارەكا بەرپرسێن دام و دەزگەهێن پارێزگەهێ، دوهی 8/7/2026 ل ژێر درووشمێ «سەمایا ڕەنگێن جودا» خۆلا شەشێ یا گەلەرییا ڕێڤەبەرییا چالاكیێن قوتابخانەیان بۆ 53 مامۆستایێن شێوەكار یێن سنۆرێ پەروەردەیێن دەڤەرداریێن دهۆكێ‌ هاتە ڤەكرن.
پارێزگارێ‌ دهۆكێ‌ پشتی ڤەكرنا خۆلا شەشێ یا گەلەریێ ل گەل ڕێڤەبەرێ گشتی یێ پەروەردەیێ و ڕێڤەبەرێن پەروەردێن سنۆرێ دەڤەردارییان كۆمبوو و گۆهداریا داخوازی و پێدڤیێن كەرتێ پەروەردەیێ كر بۆ باشتركرنا پرۆسێسا خواندنێ.
پشتی بەرهەڤبوویان گەڕیانەك د ناڤ گەلەریێ‌ دا كری، تەماشەی بەرهەم و بەهرەیێن شێوەكاری یێن مامۆستایێن پشكدار كری، پارێزگارێ دهۆكێ د كۆنگرەكێ ڕۆژنامەڤەنی دا دیاركر، سالانە بەرهەمێن مامۆستایێن شێوەكار ژ ڕوویێ كوالێتی و ئاستێ هۆنەری و ناڤەڕۆك و دەربڕین و گەهاندنا پەیامێ ڤە پێشكەفتنێ بخۆڤە دبینن و خواست هەموو جهێن گەشتیاری ل شوونا تابلۆیێن بیانی تابلۆیێن خۆمالی ب كڕن و بدانن، دیسا پشتەڤانییا حكومەتا هەرێما كوردستانێ بۆ مامۆستایێن هۆنەرمەند دوپاتكر.

دهۆك، لەزگین جۆقی:

خالد سەیدۆ، نوونەرێ كۆتایا ئێزدییان ل پەرلەمانێ ئیراقێ بۆ ئەڤرۆ دیار كر، وەزیرێ دارایی رازیبوون نیشا دا بۆ تەرخانكرنا بودجەیەكا بلەز بۆ نۆشدارییا داد، ئەڤە ژی پێنگاڤەكا گرنگە بۆ ب ڕێڤەبرنا دۆسیەیا پشكنینا (DNA) یا تایبەت بۆ قوربانیێن ئێزدی یێن جینۆسایدا شنگالێ‌.
ناڤهاتی گۆت: «ئەم د بزاڤێن بەردەوام داینە بۆ ئاشكراكرنا ناسنامەیا قوربانییان».
ژ لایەكێ‌ دیڤە شاكر مەحمود، ئەفسەرێ دەستەیا ڤەكۆلین و كۆمكرنا بەلگەنامەیان ل پارێزگەها دهۆكێ بۆ ئەڤرۆ دیار كر، هەتا نوكە 500 روفاتێن جینۆسایدا شنگالێ‌ ل بەغدا ماینە و ناسنامەیێن وان ئاشكرا نەبووینە و گۆت: «پڕۆژەكێ نوو هەیە بۆ وەرگرتنا سۆمبلێن خۆینێ ژ كەسوكارێن قوربانیێن جیۆسایدا شنگالێ، داكو ناسنامەیێن روفاتان ئاشكرا بن، هەر رزگاربوویەكێ چوویە دەرڤەی وەلاتی ژی دێ سۆمبلێن خویێ ژێ هێنە وەرگرتن، داكو پشكنینا (DNA) بهێتە كرن بۆ ناسكرنا هەموو روفاتێن ل نۆشداریا داد ل بەغدا».

زاخۆ، دلۆڤان هالۆ:

ب ئامادەبوونا د. سەباح ئیبراهیم، نوونەرێ وەزارەتا خواندنا بلند و ڤەكۆلینێن زانستی و د. ئاری عادل سەرۆكا زانكۆیا پۆلیتەكنیكی یا دهۆك، دوهی 8/7/2026 ل ژێر درووشمێ «وەرچەرخانا دجیتالی د زانكۆیێن زیرەك دا هێزەكە بۆ گەشەپێدانا بەردەوام و ئاڤاكرنا پاشەڕۆژێ» و ب ناڤونیشانێ زانكۆیێن زیرەك و ڕۆلێ وان یێ بجهئینانا ئارمانجێن گەشەپێدانا بەردەوام د بیاڤێن جودا دا، كۆنفرانسێ دووێ یێ نێڤدەولەتی یێ زانستی بۆ ڤەكۆلینێن كرداری و جڤاكی و مرۆڤایەتی ل زانكۆیا پۆلیتەكنیكی یا دهۆك هاتە ئەنجامدان.
ئەڤ كۆنفرانسە ژ لایێ زانكۆیا پۆلیتەكنیكی یا دهۆك ب هەڤكاری ل گەل زانكۆیا سلێمانیێ و زانكۆیا فۆرات یا ناڤەراست و زانكۆیا قوتبە و زانكۆ و بنگەهێ عەرەبی یێ دیموكراتی ل ئەلمانیا و دیوانا وەقفا سنی و سەنتەرێ وەعی یێ ڕاوێژكاری هاتیە ئەنجامدان.
د. ئاری عادل، سەرۆكا زانكۆیا پۆلیتەكنیكی یا دهۆك د گۆتارەكێ دا گۆت: «فەرە بزانین، گۆڕانكاری بەرەڤ زانكۆیێن زیرەك ب تنێ هەلبژارتنەكا تەكنەلۆژی نینە، بەلكو پێدڤیەكا گرنگە بۆ دووبارە ڕێكخستنا سیستەمێ خواندنێ و ڤەكۆلینێن زانستی ب ئاوایەكی كو ل گەل ئارمانجێن هەڤپشك بگۆنجیت بۆ گەشەپێدانا بەردەوام، ئەم یێ د وێ باوەریێ دا، كو ئەڤ كۆنفرانسە دێ بیتە پێگەهەكێ گرنگ بۆ دیالۆگا زانستی و دەرفەتەكە بۆ پێشڤەبرنا هەڤكاریا زانستی و ڤەكۆلینێن هەڤپشك».
ئەڤرۆ ژی ڕۆژا دووێ ژ كۆنفرانسێ دووێ یێ نێڤدەولەتی یێ زانستی بۆ ڤەكۆلینێن كرداری و جڤاكی و مرۆڤایەتی، ب پشكداریا كۆمەكا دی یا ڤەكۆلەر و تایبەتمەندێن بیاڤێن جودا ل هەموو دەزگەهێن حكومی و كەرتێ تایبەت ل هەرێما كوردستانێ و ئیراقێ و وەلاتێن عەرەبی بهێنە پێشكێشكرن.