زاخۆ، دلۆڤان هالۆ:
پشتی بورینا پتری ٨ سالان، ڕێك ب وەلاتیێن 13 گۆندێن سەر ب ناحیا دەركارێ ڤە ل ئیدارەیا سەربخوە یا زاخۆ هاتنەدان بزڤڕنە سەر جهـ و وارێن خوە، ژبەركو پێشتر ژبەر ئالۆزیێن ل سەر سنۆرێ هەرێما كوردستانێ نە دشیان سەرەدانا گۆندێن خوە بكەن.
حەكیم نووری، وەلاتیەكێ ناحیا دەركارێ یە بۆ ڕۆژناما ئەڤرۆ دیاركر، ئەم گەلەك كەیف خوەشین كو مە جارەكا دی شیا سەرەدانا گۆندێن خوە بكەین، لەوما ئەم سۆپاسیا حكۆمەتا هەرێما كوردستانێ و ئیدارەیا سەربخوە یا زاخۆ و لقێ ٨ یێ پارتی دكەین، كو بزاڤەكا مەزن و بەردەوام كرن ژ بۆ وێ چەندێ كو ڕێك ب مە بهێتە دان ئەم سەرەدانا گۆندێ خوە بكەین.
كامیران حسێن، گەنجەكێ ناحیا دەركارێ یە دبێژیت:»دووبارە زڤڕینا مە بۆ گۆندێ مە یێ باب و باپیران بۆ مە وەكی جەژنەكێ یە و مە باوەر نەدكر دێ جارەكا دی زڤڕینە گۆندێ خوە، چونكی ئەڤە سەرێ چەندین سالانە ئەم ژ خێر و بەرەكەتا گۆندێ خوە بێ بەهر بووین، ئەم سۆپاسیا حكۆمەتێ و هەموو لایەكێ دكەین ب تایبەت مام حكمەت سەلمان ڕۆلەكێ بەرچاڤ دڤی كاری دا هەبوو».
جەهوەر محەمەد، ڕێڤەبەرێ ناحیا دەركارێ ل ئیدارەیا سەربخوە یا زاخۆ، گۆت:»ل ڕێككەفتی 26ی هەیڤا ٦ ڕێك ب وەلاتیێن 13 گۆندێن سەر ب ناحیا دەركارێ ڤە هاتیە دان كو ب شێوەیەكێ تێست بۆ ماوێ هەیڤەكێ ڕۆژانە ژ دەمژمێر ٦ی سپێدێ هەتا دەمژمێر 7ی ئێڤاری سەرەدانا گۆندێن خوە بكەن».
نيشاندان