حازم بلەیی (حازمێ سافیایێ)
تاڕییا شەڤێ وەک پەردەکا گران و بێ ڕەحم ب سەر دیوارێن کۆمەلگەهێ دا هاتبوو خوار. بۆ مریەمێ، ئەڤ ڕەشییە نە تشتەکێ نوی بوو، ب سالان ببوو سیبەرەکا گران ل سەر سینگێ وێ. ئەو ل بەر پەنجەرا خانییێ خۆ یێ کەڤن ڕاوەستیا بوو، دەستێن خۆ یێن زڤر و ماندی ب دارێ پەنجەرێ ڤە نووساندبوون و بەرێ خۆ دا جادەیەکا بێدەنگ. هەشت سالێن تەمام بوون، نە دەنگێ دەهۆل و شادییەکێ لێ بلند ببوو، و نە گرییا ساڤایەکێ، بێدەنگییا وێ یا کوژەک شکاندبوو.
شرینێ، کچا وێ یا گەنج، کو چاڤێن وێ یێن پڕی هزر و تێنیاتییا خواندنێ د دیتن، نێزیکی دایکا خۆ بوو. وێ ب دەستەکێ لەرزی ڤە، قوماشێ ڕەش یێ جلکێن دایکا خۆ گرت، کو وەک شەڤێ بێ دووماهی دیار دبوو. ب دەنگەکێ هێدی و خەمگین پرسی:
– دایێ، بۆچی لڤێرە ناڤێ بابان نەهاتیە بکارئینان؟ بۆچی زارۆک ب ناڤێ دایکێن خۆ دهێنە ناسین؟ و ئەڤە چ نەفرەتیە… بۆچی مە هەمیان جلکێن ڕەش ل بەر کرینە؟
مریەمێ ئاهەکا سۆتکەر ژ ناخێ خۆ کێشا، ب خەمەکا کویر و چاڤێن پڕی ڕۆندک هێفکرە کچا خۆ و گۆت:
– کچا من، لێرە باب ببوو پەیڤەکا قەدەغەکری. دەمێ دەستێن زۆلمێ زەلامێن مە برین، تنێ زارۆکێن ژ دوازدە سالی بچووکتر هێلان و یێن دی هەمی بێسەروشوین کرن. مێر نەمابوون، کچێن مە بێ هەڤژین مان و ژیان ل ڤی وەلاتی وەستییا. هەتا ئەو بچووکێن ماین مەزن بووین، ناڤێ دایکێ ببوو تاکە ناسنامەیا مە، دایک تنێ مان وەک زێرەڤانێن ڤێ ژیانێ.
مریەمێ دەستێ خۆ ب سەر جلکێن خۆ دا ئینا و بەردەوام بوو:
– ئەڤ ڕەنگە، بوویە ناسنامەیا مە، نیشانا وێ تاڕییا کو ب سەر مە دا هاتی. مە هەلبژارد وەک چەکەکێ بێدەنگ، دا جیهان بزانیت کا چ کارەسات ب سەرێ مە هاتیە. هەتا زەلامێن مە نەهێنەڤە، چ ڕەنگەکێ دی یێ ژیانێ نینە.
دەرگەهێن قوتابخانان ژی داخستن، دا مێشکێن هنگۆ تاڕی بکەن و نەهێلن فێری چ ببن و خەونێ ب ئازادیێ ڤە نەبینن.
شرینێ ب چاڤێن پڕی ڕۆندک ڤە بەرێ خۆ دا جادەیێن چۆل و گۆت:
– ئاها… ئانکو ژ بەر هندێیە هەشت سالە چ داوەت و شادی ل ڤێ خاکێ نەبووینە؟
مریەمێ سەرێ خۆ ب خەمگینی ڤە لڤاند و گۆت:
– بەلێ کچا من، هەڤژینی لڤێرە ببوو ئەفسانە. ئەم د ڤێ ڕەشییێ دا بەزر بووینە، دا چ ڕەنگەکێ دی یێ دژوار یێ ڤێ دنیایێ سەرنجا مە نەبەت.
ئەم لێرەینە، کێم دبین بەلێ زێدە نابین. ئەم دێ هەتا دوماهییێ چاڤەڕێی هاتنەڤا بێسەروشوینێن خۆ بین، و هەتا ئەو ڕۆژ دهێت، ئەڤ ڕەشیا مە دێ مینیت وەک هێما و چەک دژی هەمی زۆلمێ.
ل وێ کۆمەلگەهێ، ژیان ببوو جەوهەرەکێ ڕەش، و ژنەکا وەک مریەمێ تێدا قەهرەمان بوو، کو د ناڤ وێ بێدەنگییا گران دا، هیڤییا ڕۆژەکا ڕوون دچاند.
نيشاندان