ئەڤرۆ:
بڕیارە ئەڤرۆ سەرۆک بارزانی ل گەل لایەنێن سیاسی و نوونەرێن پێکھاتێن ھەرێما کوردستانێ کۆمبیت و نوونەرەکێ تورکومانان ژی دبێژیت، کۆمبوونەکا گرنگە دڤی دەمیدا سەرۆک بارزانی دگەل لایەنێن سیاسی و پێکھاتێن ھەرێمێ کومبوونێ بکەت و دیارکر، ئەم تورکومان نەتەوا دویێ نە ل ھەرێما کوردستانێ و دخوازین ڤێ جارێ جێگرەکێ سەرۆکێ ھەرێمێ بۆمە بیت.
ئایدن مەعرۆف، ئەندامێ مەکتەبا سیاسی یا بەرەیێ تورکومانی و سەرۆکێ لیستا بەرەیێ تورکمانی ل پەرلەمانێ کوردستانێ بۆ رۆژناما ئەڤرۆ گۆت” ئەم ژی وەکو لایەنێ تورکومانی ژلایێ سەرۆکێ ھەرێما کوردستانێ ڤە یێن ھاتینە داخوازکرن بۆ کۆمبوونا ئەڤرۆ یا ل گەل لایەنێن سیاسی یێن ھەرێما کوردستانێ، بەلێ مە گازندە ژڤێ چەندێ یا ھەی، چار لایەنێن تورکومانی یێن سەرەکی یێن ھەین، بەلێ تنێ نوونەرەک بۆ ھەموو نەتەوا تورکومان ھاتیە داخوازکرن ، راستە مە کەسەک دەستنیشانکریە بۆ پشکداریێ د کۆمبوونێ دا، بەلێ ھەر لایەنەکێ تورکومانی نێڕینەک یا ھەی ل دۆر ھەر پرسەکێ و پێدڤی بوو ھەر لایەنەکی نوونەرەک ھەبایە، سوپاسیا سەرۆکێ ھەرێمی َدکەین بۆ مێھفانداریا وی و کۆمبوونەکا گرنگە، چونکە گەلەک پرس یێن ھەین و پێدڤی ب دانوستاندنان ھەیە و بۆچوونا ھەموو لایەکی ژی بھێتە وەرگرتن”.
ئایدنی خۆیاکر”مە وەکی تورکومان چو داخوازی بەرھەڤ نەکرینە بۆ کۆمبوونا ئەڤرۆ، چونکی ب شێوەکێ گشتی دێ دانوستاندن ل دۆر ڤێ رەوشی و دستووری ھێنەکرن”.
ل دۆر بوچوونا وان ل سەر پرۆژێ قانوونا دستوورێ ھەرێما کوردستانێ ، دبێژیت”مە وەکی نەتەوا تورکومان داخوازیێن خوە یێن ھەین بۆ پڕۆژە قانوونا دستوورێ ھەرێما کوردستانێ و ئەم ژی دخوازین ھەرێم ببیتە خوەدی دستوورێ خوە د چوارچۆڤێ عێراقەکا فیدڕالدا، ئەم وەکی نەتەوا دوێی نە ل ھەرێما کوردستانێ و نەتەوا سیێ نە ل عێراقێ، لەوما پێدڤیە حسابەک بۆمە ژی بھێتەکرن و دخوازین جێگرێ دویێ یێ سەرۆکێ ھەرێما کوردستانێ بۆ تورکومانان بیت، چونکی ئەم نەتەوەکا ھەری رەسەنین ل ھەرێما کوردستانێ و داخوازیێن مەژی دناڤ دستووری دا بھێنە بەرچاڤکرن و پۆستەکێ گرنگ بدەنە مە، وەک بەھر ژی بەھرامەیە پۆستەکێ سیادی بۆمە بیت وەکو نەتەوا تورکومان لھەرێما کوردستانێ”.

ئەڤرۆ:
ئەنجوومەنێ نیشتمانیێ کوردێن سووریێ د داخۆیانیەکێ دا دیار دکەت کو داخواز ھاتیە کرن کو ل گەل تەڤدەمێ دانوستاندن بھێنە کرن بۆ چارەکرنا ئاریشێن ھەر دو ئالیان، لێ وان ژی ھندەک مەرجێن خوە دیار کرینە و ھەتا تەڤدەم و ئالیێن سەر ب پەیەدێ وان خالان بجە نەئینن ئەو رازی نابن کو ل گەل وان چو دانوستاندنان بکەن، چونکو دو رێککەڤتن ل ھەولێر و ئێک ژ ل دھۆکێ ھاتە کرن لێ وان ھەموو تشت ژبیر کرن و دخوازن دیسان ل گۆر خوە رۆژئاڤایێ کوردستانێ برێڤە ببەن و ئەو یەک ژی ناھێتە قەبوول کرن.
فەیسەل ئیسماعیل ئەندامێ سەرکردایەتیا پارتی دیموکراتی کوردستان-سووریا کو پارتا وان ئێکە ژ پارتێن مەزن د ناڤ ئەنجوومەنێ نیشتمانی یێ کوردێن سووریێ بۆ رۆژناما ئەڤرۆ دیار کر کو بەر دەمەکێ رێکخراوا ئاشتی یا جیھانی کو ناڤەندا وێ ل سویسرایە داخواز ژ مە کربوو کو ئەم ل گەل تەڤدەمێ دەست ب دانوستاندنان بکەین دا کو پرسێن د ناڤبەرا ھەر دو ئالیان دا بھێنە چارەکرن و گۆت: (مە بۆ وان دیار کر کو ھەتا نھا چەندین جاران مە رێککەڤتن ل گەل تەڤدەمێ و پەیەدێ کریە بەس ئەو سۆزێن خوە زوو ژ بیر دکەن و پێگیریێ ب رێککەڤتنان ناکەن و ژ بەر ھندێ ژی ھەکەر ھەوە تشتەکا وەسا دڤێت مە مەرجێن خوە ھەنە و ھەرن ل گەل تەڤدەمێ گەنگەشە بکەن. ھەکەر ئەو مەرجێن مە قەبوول بکەن و بجە بینن ئەم ژی دێ بەرھەڤ بین کو جارەکا دی دەست ب دانوستاندنان بکەین).
سەبارەت ب مەرجێن وان بۆ دانوستاندنان ژی ناڤھاتی دیار کر کو دڤێت ئەو لیژنێن ھەڤپشک کو ھاتیە پێکئینان کارێ خوە بکەن و تەڤدەم و پەیەدە چو ئاستەنگیان ل ھەمبەر کارێ وان دروست نەکەن، خالا دی دڤێت سەربازیێ ئیجباری ب تەمامی بھێتە راگرتن و ئەو کەسێن کو ژیێ وان ل ژێر ١٨ سالیێ دایە ب زۆرێ ھاتینە برن ژی ڤەگەرنە مالێن خوە، ھەروەسا دڤێت ھەموو گرتیێن سیاسی ل رۆژئاڤایێ کوردستانێ بھێنە ئازاد کرن و گۆت: (خالەکا دی یا گرنگ ژی ھەیە. مە دڤێت ئەو ھەلبژارتنێن بەری نھا ل کانتۆنا جزیرێ کو پەیەدێ ب سەرێ خوە کربوو بھێنە ھلوەشاندن، چونکو ئەو یەک ل دژی رێککەڤتنا دھۆکێ یە. واتە مە دڤێت تشتێن کو ل رێککەڤتنا دھۆکێ دا وان ژی ئیمزا کریە ئەو بجە بینن و ھەتا ئەو یەک نەھێتە کرن ئەم رازی نابین چو دانوستاندنان ل گەل وان بکەین. چونکو براستی ژی دانوستاندن ل گەل وان چو ئەنجامێن خوە نابن).
ناڤھاتی د دووماھیا ئاخڤتنا خوە دا ئەو یەک ژی دیار کر کو د ئاستێ نێڤدەولەتی دا پشتەڤانیەکا مەزن بۆ ئەنجوومەنێ نیشتمانی یێ کوردێن سووریێ ھەیە و ھەروەسا تەڤدەم و پەیەدە ژی رۆژ ب رۆژێ ژ بەر کریارێن خوە و سیاسەتا خوە یا شاش تەنگاڤ دبن و ھەکە براستی ژی وان دڤێت ل رۆژئاڤایێ کوردستانێ سیستەمەکێ دیموکراتیک دروست بکەن دڤێت ل گەل ئەنجوومەنێ نیشتمانی کار بکەن، چونکو ئەزموونێن بەری نھا ژی نیشا دایە ئەو ب تنێ نەشێن رۆژئاڤایێ کوردستانێ ب پارێزن و برێڤە ببەن.