ئەڤرۆ نیوز:
خوەپیشاندەرێن بەغدا و هێزێن ئەمنی روو ب روو ئێک بوون و ئالۆزی دناڤبەرا وان دا دروستبوو، هەروەسا کوشتی و بریندار ژی هەنە.
ب ئەگەرێ کەفتنا ئالۆزیان دناڤبەرا خوەپیشاندەران و هێزێن ئەمنی دا ل پرا سنک ل بەغدا هەتا نوکە خوەپیشاندەرەک هاتیە کوشتن و 10 خوەپیشاندەر ژی برینداربووینە.
کۆمیسیۆنا بلند یا مافێن مرۆڤی ل عیراق ئاماژە ب هندێ دایە کو هەتا نوکە پتری 500 کەسان هاتینە کوشتن و ب هزاران کەس ژی بریندار بووینە.
ئەڤرۆ نیوز:
عەبدولخالق مەسعود، سەرۆکێ فیدراسیۆنا تەپا پێ یا عیراقێ دێ دەست ژ کار کێشیت، پشتی زێدەتر ژ شەش سالان کورد دێ وی پۆستی ژ دەست دەن و چارەنڤیسێ کوردان د فیدراسیۆنا تەپا پێ یا عیراقێ دا نە یێ دیارە.
ئەڤرۆ ئەینیێ 17 کانوونا دویێ فیدراسیۆنا تەپا پێ یا عیراقێ ب ئامادەبوونا سەرۆک و جێگر و ئەندامێن وێ فیدراسیۆنێ ژ بلی مالح مەھدی و یەحیا زەغەیەر ل هەولێرێ کۆمبووینە، سەرۆک و ئەندامێن وێ فیدراسیۆنێ بریار دا ناما دەست ژ کارکێشانا خوە پێشکێش بکەن و ئەو نامە ژ ئالیێ عەباس علێوی سەرۆکێ لژنا وەرزش و لاوان ل پەرلەمانێ عیراقێ بهێتە پاراستن، هەتاکو عەدنان درجال سەرجەم سکالایێن خوە ل سەر سەرۆک و ئەندامێن فیدراسیۆنا تەپا پێ یا عیراقێ ل دادگەهێ ڤەکێشیت.
ب ناڤ بژیڤانیا ئەحمەد ریازی وەزیرێ وەرزش و لاوێن عیراقێ ئەڤ رێککەفتنە دناڤبەرا سەرۆک و فیدراسیۆنا تەپا پێ یا عیراق و عەدنان درجال و وێ دەستەیێ هاتیە ئەنجام دان.
پشتی جێبەجێکرنا وێ رێککەفتنێ ژلایێ عەدنان درجالی و سەرۆک و جێگر و گشت ئەندامێن وێ فیدراسیۆنێ ناما دەست ژ کارکێشانا خوە دێ ئاراستەی فیفایێ کەن، داکو رەزامەندی ل سەر بهێتە دان.
عه‌بدولخالق مه‌سعود د ژیێ 64 سالیێ دایە دو جاران بوویە سەرۆکێ فیدراسیۆنا تەپا پێ ل عیراقێ.
ئەڤرۆ نیوز:
ئەڤرۆ پێنجشەمبی شانا راگەهاندنا ئەمنی ل عیراقێ دەستگیرنا سەرکردەکێ رێکخراوا تیرۆرستی یا داعشێ راگەهاند، کو موفتیێ داعشێ بوو ل موسل.
شانا راگەهاندنا ئەمنی ل عیراقێ دیار کر، فەوجا سواتێ یا سەر ب فەرماندا پۆلیسێن نەینەوا پشتەڤانیا زانیاریێن هوور یێ هەوالگیریێ، شیفا نعمەت یێ ناسیار ب ئەبو عەبدولباری، بەرپرسێ شەرعی و موفتیێ داعشێ ل گەرەکا مەنسور یا بەرێ راستیێ یێ موسل دەستگیرکریە.
هەروەسا گۆتیە، ئەبو عەبدولباری ئێک ژ سەرکردێن رێزا ئێکێ یا رێکخراوا داعشێ دهێتە دانان، بەرپرسێ دەرکرنا فەتوایا تایبەت ب سێدارەدانا هژمارەکا زانا و زەلامێن ئایینی بوویە، هەروەسا ئەبو عەبدولباری فەتوایا تەقاندنا مزگەفتا نەبی یونس دایە.
ئەڤرۆ نیوز:
مۆبایل جهەکێ گونجایە بۆ خرڤەبوونا بەکتریایێن زیان بەخش، د ئەنجامدا گەلەک زیانان دگەهینیتە پیستێ دێمێ مرۆڤی و دبیتە ئەگەرێ درۆستبوونا پرسکان.
زانایێن ئەمریکی د ڤەکۆلینەکێ دا دیار کریە: ئەو کەسێن مۆبایلێ ل گەل خوە دبەنە سەرشویێ، ١٠ جاران پتری کەسێن دیتر توشی نەخۆشیێ و بەکتریایان دبن.
رۆژناما Huffington Post راپۆتەک بەلاڤکریە، ئەو مۆبایلێن کو بۆ جهێن وەکو سەرشوویێ و جهێن وەکو وێ دهێتە بکارئینان، گەلەک زیانێن زێدەتر دگەهینیتە پیستێ مرۆڤی.
د. ئیستی ولیامزێ بەحسێ ڤێ چەندێ کریە، ئەو میکرۆبێت ل سەر مۆبایلێ کۆم دبن د دەمێ دەست لێدان و بەرکەفتنێ ل سەر سەر وچاڤان، دبیتە ئەگەرێ گەشەکرنا پرسکان ل سەر دێمێ مرۆڤی.
هەبوونا پرسکان ل سەر دێمێ مرۆڤی، پڕانیا جاران ئەگەرێ وێ مۆبایلە، لەوما پێدڤیە جار جاران شاشێ مۆبایلا خوە ب مادێن پاقژکەر پاقژ بکەی.
ئه‌ڤرۆ نیوز، بارزان مزوورى:
مفاور سه‌ورى نه‌عمان، رێڤه‌به‌رێ هاتنوچوونا ناحیا ئه‌لقۆش بۆ ئه‌ڤرۆ نیوز گۆت: ئه‌ڤرۆ ده‌مژمێر 4:30 ئیڤارى رێكه‌فتى 17/1/2020 ل سه‌ر رێیا سه‌ره‌كیا شێخان بۆ به‌دریكێ و ل نێزیك ناحیا ئه‌لقۆش روودانه‌ك دناڤبه‌را ترۆمبێله‌ك بارهه‌لگر یا توركى و ترۆمبێله‌كا شوفرلێت ئوپته‌را تایبه‌ت روودا و د ئه‌نجام دا دو كه‌سان گیانێ خوە ژ ده‌ست دا دو كه‌س ژى بریندار بوون.
ناڤهاتى خویاكر، ئه‌و ترۆمبێلا تایبه‌ت ب تەمامى هاتیە ژ ناڤبرن و ترۆمبێل ژ كاركه‌فتیە و دناڤ وێ ترومبێلێ دا ژنه‌ك و زه‌لامه‌كى گیانێ خۆ ژ ده‌ست دایە و ژنه‌ك و زه‌لامه‌ك بریندار دبن، هه‌ر چار ژ ئێك خێزان بوون ئاكنجیێن ناحیا داره‌تۆ یا سه‌ر ب قه‌زا به‌رده‌ره‌ش ڤه بوون و ئەو كه‌سێ گیانێ خۆ ژ ده‌ست داى پولیس بوو.
ناڤهاتى گۆت ئه‌گه‌رێ روودانێ ژبه‌ر له‌زاتیا هه‌ردو ترۆمبێلا بوویه رێك نوو هاتیه قێركرن رێكه‌ك سه‌ره‌كى یه به‌لێ گه‌له‌ك یا ته‌سكه.
ئەڤرۆ نیوز، زنار:
شەرێ نافخۆ ل وەلاتێن رۆژهەلاتا ناڤین، ب تایبەت ل سووریێ، یەمەن، لیبیا و عیراقێ، بووینە ئەگەرێ ئاوارەبوونا ملیۆنان کەسان و ژناڤچوونا ئابووری و ژێرخانا وان وەلاتان، هەروەسا وان وەلاتان پێدڤی ب سەدان ملیار دۆلاران هەیە ژ بۆ ئاڤەدانکرنا وان.
لدووڤ ژێدەران تێچوویێ ئاڤەدانکرنا عیراقێ پێدڤی ب 88 ملیار دۆلاران هەیە، سووریێ ب 400 ملیار دۆلاران، لیبیا ب 315 ملیار دۆلاران، ئەفغانستانێ ب 750 ملیار دۆلاران و یەمەنێ ب 300 ملیار دۆلاران.
عیراق ئێکە ژ وان وەلاتان، کو کەمپینا کۆمکرنا هاریکاریان بۆ هاتیە پێکئینان، لدووڤ وی کۆنفرانسێ ل شواتا سالا 2018 ل کوێتی برێڤەچووی، عیراقێ پێدڤی ب 88 ملیار و 200 ملیۆن دۆلاران هەیە ژ بۆ ئاڤاکرنا وی وەلاتی.
ئەڤرۆ نیوز،عەلی حاجی :
ل بەریا دەمەکێ کێم ل تاخێ شەعبانیکێ ل زاخۆ ژ ئەگەرێ کێشەیەکا جڤاکی کەسەک ب ۱۱ گولەیان دهێتە کوشتن و کوژەک بەرەڤ جهەکێ نەدیار رەڤی یە. شاهد حالەکێ روودانێ بۆ ئەڤرۆ نیوز گوت : ئەو روودان ل نێزیکی دەمژمێر ۱:۳۰ێ نیڤرۆ یێ روژا ئەینیێ روودایە دەما ژ ئەگەرێ کێشەیەکا کومەلایەتی کەسەک وەکو تولڤەکرن زەلامەکێ د ژیێ ٥۳ سالی دا ب سێ گولەیان دکوژیت ەڤە د دەمەکێ دا بۆ ئەو کەسێ هاتیە کوشتن دووری ۱۰۰ مەتران ژ مالا وی هاتیە کوشتن و ئەڤ کێشەیە دناڤبەرا هەردو مالان دا ڤەدگەریت بۆ بەریا ۲٥ ساڵان.
سه‌رۆك وه‌زیرێ ئوكرانیا ده‌ست ژ كارڤه‌كێشا
ئه‌ڤرۆ نیوز:
ئولیسكی هونچاروك سه‌رۆك وه‌زیرێ ئوكرانیا ده‌ست ژ كارڤه‌كێشانا خۆ پێشكێشی سه‌رۆكێ ئوكرانیا كر.
ئولیسكی هونچاروك سه‌رۆك وه‌زیرێ ئوكرانیا راگه‌هاند: ده‌مێ پۆستێ سه‌رۆك وه‌زیران من وه‌رگرتی بۆ بجهكرنا به‌رنامه‌یێ سه‌رۆكێ وه‌لاتی بوو، دوێ نێرینێ دا بوم ئه‌ڤ كاره دبیته ده‌ستپێكه‌كا باش بۆ ڤه‌كرنێ و رێكخستنا كارێن حوكمه‌تێ.
سه‌رۆك وه‌زیرێ ئوكرانیا ئه‌و چه‌نده ژی بۆ كه‌نالێن راگه‌هاندنێ دیاركر بۆ لادانا هه‌ر گۆمانه‌كێ ل سه‌ر رێز و باوه‌ریا ته‌ماما سه‌رۆكێ ئوكرانیا من ده‌ست كارڤه‌كێشانا خۆ پێشكێشی سه‌رۆكی كر.
ئولیسكی هونچارۆك سیاسه‌تمه‌دار و پارێزه‌ر دژیێ 36 سالیێ دا 29 هه‌یڤا ئابا 2019 پۆستێ سرۆك وه‌زیرێ وه‌رگرت بڤێ چه‌ندێ بۆ بچووكترین سه‌رۆك وه‌زیرێ ئوكرانیا ل دیرۆكا ئه‌وی وه‌لاتی دا.
ئه‌ڤرۆ نیوز:
گه‌فێن ئیرانێ و میلیشیێن حه‌شدا شه‌عبی ل عیراقێ دژی ئه‌مریكا ب تایبه‌تی پشتی كوشتنا قاسم سلێمانی و ئه‌بو مه‌هدی ئه‌لموهه‌ندس ل به‌غدا د به‌رده‌وامن و ل دووماهی داخۆیانیا خوه دا، سه‌رۆكێ ئیرانێ حه‌سه‌ن روحانی دوهی چارشه‌مبی 15/1/2018 گه‌ف ل سه‌ربازێن ئه‌مریكی ل عیراقێ كرن، ل دووڤ شروڤه‌كاران بنگه‌هێن له‌شكرێ ئه‌مریكی ل هه‌رێما كوردستانێ كو هژمارا وان چار بنگه‌هن د ره‌وشه‌كا ئه‌منی یا باش دانه هه‌مبه‌ركرن ل گه‌ل بنگه‌هێن له‌شكرێ ئه‌مریكی ل ده‌ڤه‌رێن دی یێن عیراقێ.
پشتی كونسۆلخانا ئه‌مریكی ل به‌سرا تووشی هێرشه‌كێ ب مووشه‌كان بووی، ده‌ڤه‌را باشوورێ عیراقێ ب تمامی چۆل ببوو ژ هه‌بوونا ئه‌مریكی ل سه‌ر ئاستێ بنگه‌هێن له‌شكری و نوونه‌رایه‌تیێن دبلوماسی.
سه‌ره‌رای به‌رسڤا ئیرانێ ل سه‌ر وێ هێرشا ئه‌مریكی كو دژی بنگه‌هێ عه‌ینولئه‌سه‌د ل ئه‌نبار وه‌كو تولڤه‌كرنه‌ك بۆ كوشتنا سلێمانی ئه‌نجامدای، به‌لێ میلیشیێن چه‌كدار ل عیراقێ هه‌تا نوكه ژی گه‌فێن تولڤه‌كرنێ ژ كوشتنا وان هه‌ردو كه‌سان و ده‌ركرنا هێزێن ئه‌مریكی ژ بنگه‌هێن ل عیراقێ هه‌ین دكه‌ن.
هژمارا هێزێن ئه‌مریكی ل عیراقێ 6 هزار سه‌رباز كو ل سه‌ر چه‌ند بنگه‌هێن له‌شكری د به‌لاڤكرینه و ل هه‌موو وان بنگه‌هان جهێن تایبه‌ت بۆ فرۆكێن F16 یێن هه‌ین، د ده‌مه‌كی دا پشتی توپبارانكرنا كۆنسولخانا ئه‌مریكی ل سالا 2018 وهه‌تا نوكه چو هه‌بوونا ئه‌مریكی ل هه‌موو ده‌ڤه‌رێن باشوورێ عیراقێ ل سه‌ر ئاستێ بنگه‌هێن له‌شكری و نوونه‌رایه‌تیێن دبلوماسی نینه.
ل دووڤ پێزانینێن دو ئه‌فسه‌رێن عیراقی ل به‌سرا و زیقار، پارێزگه‌هێن به‌سرا و زیقا و هه‌موو پارێزگه‌هێن دی ل باشوورێ عیراقێ د ڤالانه ژ هه‌بوونا له‌شكرێ ئه‌مریكی، تنێ هژماره‌كا كێم یا سه‌ربازێن ئه‌مریكی ل بنگه‌هێ ئیمام عه‌لی یێ له‌شكری ل ناسریه هه‌بوو، به‌لێ ئه‌وژی به‌ری ساله‌كێ یێن هاتینه ڤه‌كێشان، ل به‌سرا ژی تنێ نوونه‌راتیه‌كا دبلوماسی یا ئه‌مریكی لێ هه‌بوو، به‌لێ ئه‌ڤه چه‌ندین هه‌یڤه فه‌رمانبه‌رێن وێ یێن ئه‌مریكی لێ نه‌ماینه.
ل دووڤ هنده‌ك ژێده‌ران ژی شێوێ به‌لاڤكرنا بنگه‌هێن له‌شكرێ ئه‌مریكی و هه‌ڤپه‌یمانیا نێڤده‌وله‌تی ل عیراقێ و گرنگیا وان و ئه‌و گرۆپ و میلیشیێن چه‌كدار ئه‌وێن ژسنوورێ وان بنگه‌هان د نێزیك و به‌رێ چه‌كێن خوه دایه وان بنگه‌هان، ب ڤی شێوه‌یه:
– بنگه‌هێ ئه‌نكادا
مه‌زنترین بنگه‌هێ له‌شكرێ ئه‌مریكی یه ل عیراقێ، دكه‌ڤیته پارێزگه‌ها سه‌لاحه‌دین و رووبه‌رێ وی 30 كلم كو هه‌مان بنگه‌هێ به‌كر یێ ئه‌سمانی یێ عیراقی یه كو ب (بنگه‌هێ ئه‌نكادا) دهێته نیاسین وه‌كو ئاماژه‌ك بۆ فرۆكه‌ڤانه‌كێ ئه‌مریكی كو به‌ری 12 سالان ل وێ ده‌ڤه‌رێ هاتبوو كوشتن و ئه‌و بنگه‌هێ له‌شكری وه‌كو سه‌نته‌رێ كونترۆلێ یه ل سه‌ر فرۆكێن F16 یێن ئه‌مریكی یه وهژمارا سه‌رباز و شیره‌تكارێن ئه‌مریكی ل وی بنگه‌هی دگه‌هیته 500 كه‌سان، زێده‌باری چه‌ندین كه‌سێن دی ژ ره‌گه‌زنامێن جودا جودا، زێده‌باری هه‌بوونا نیڤا فرۆكێن له‌شكرێ عیراقێ و فرۆكه‌ڤانێن وی ل گه‌ل هنده‌ك سه‌ربازێن دی یێن عیراقی كو هژمارا وان دگه‌هیته سێ هزار كه‌سان و گرۆپێن حزبوللا و عه‌سائیب ئه‌لهولحه‌ق و سه‌ربازێن ئیمام عه‌لی نێزیكی وی بنگه‌هی یێن هه‌ین.
– بنگه‌هێ سپایكه‌ر
هه‌بوونا له‌شكرێ ئه‌مریكی ل ڤی بنگه‌هی یا به‌رده‌وام نینه و هه‌ر ئێك ژ میلیشیێن كه‌تائیب حزبوللا و عه‌سائیب ئه‌هلولحه‌ق و سه‌ربازێن ئیمام عه‌لی نێزیكی وی بنگه‌هی هه‌بوون یا هه‌ی.
– بنگه‌هێ عه‌ینولئه‌سه‌د
دهێته هژمارتن ئێك ژ بنگه‌هێن گرنك ل عیراقێ و دكه‌ڤیته پارێزگه‌ها ئه‌نبار ل رۆژئاڤایێ عیراقێ و دهیته هژمارتن بنگه‌هێ دویێ ژ روویێ گرنگیێ، كو مه‌زنترین به‌رپرسێن ئه‌مریكی سه‌ره‌دانا وی بنگه‌هی دكه‌ن وه‌كو دۆنالد ترامپ سه‌رۆكێ ئه‌مریكا ل بێهنڤه‌دانا سه‌رێ جه‌ژنا ژدایكبوونا حه‌رزره‌تێ عیسایێ مه‌سیح ل سالا 2018، هه‌روه‌سا دو سه‌رۆكێن ئه‌مریكی یێن به‌رێ ئه‌وژی هه‌ر ئێك ژ جورج بوشێ كور ل هه‌یڤا 12 سالا 2018 وباراك ئوباما ل نیسانا 2009.
ل دووڤ هنده‌ك ژێده‌رێن عیراقی یێن ئاگه‌هدار ئه‌ڤ بنگه‌هه ب رێژا دو كلم یێ بچووكتره ژ بنگه‌هێ به‌كر، به‌لێ یا گرنگه ژبه‌ر نێزیكیا وی ژ به‌غدا پایته‌خت و هژماره‌كا مه‌زنه شیره‌تكارێن ئه‌مریكی كو هژمارا وان ل گه‌ل سه‌ربازان دگه‌هیته 400 كه‌سان، زێده‌باری هه‌بوونا له‌شكرێ عیراقێ ل وێرێ”. زێده‌باری هژماره‌كا شیره‌تكارێن ئه‌مریكی ب فرۆكێن خوه‌ڤه ل بنگه‌هێ حه‌بانیه، و میلیشیا حه‌شدا عه‌شائیری یا لایه‌نگرا حه‌شدا شه‌عبی یێن ل ده‌وروبه‌رێن وی.
– گه‌یاره
هژمارا مه‌زن یا سه‌رباز و شیره‌تكارێن له‌شكری یێن ئه‌مریكی ل دو بنگه‌هان ل باشوور و ناڤه‌راست مووسلێ یێن هه‌ین كو هژمارا وان دگه‌هیته 700 كه‌سان و چه‌كێ تۆپ هاڤێژ ژی لێ هه‌یه، هه‌روه‌سا سه‌ربازێن هنده‌ك وه‌لاتێن دی ژی یێن لێ هه‌ین و نێزیكترین باره‌گایێ حه‌شدا شه‌عبی تنێ 100 مه‌تران ژ بنگه‌هێ ل ناڤه‌راست مووسل یێ دووره”.
– كه‌ی 1
بنگه‌هێ ئه‌سمانی و له‌شكرێ یێ ئێكانه یێ ئه‌مریكا یه ل كه‌ركووكێ و دهێته هژمارتن بچووكترین بنگه‌هێ له‌شكرێ ئه‌مریكی ل پارێزگه‌هێن عیراقێ یێن رزگاركری ژ ده‌ستێ داعشێ كو 5 فرۆكێن F16 و 150 سه‌رباز و شیره‌تكارێن له‌شكری یێن لێ هه‌ین و باره‌گایه‌كێ گرۆپێ رێكخراوا به‌در یێ سه‌ر ب حه‌شدا شه‌عبی نێزیكی وی بنگه‌هێ له‌شكری یێ ئه‌مریكی یێ هه‌ی.
ل دووماهیا مه‌ها كانوونا ئێكێ 2019 د هێرشه‌كا ب مووشه‌كان ل سه‌ر وی بنگه‌هێ له‌شكری یێ ئه‌مریكی، وه‌لاتیه‌كێ ئه‌مریكی هاته كوشتن ل وچه‌ندین سه‌ربازێن ئه‌مریكی ژی هاتنه برینداركرن.
– فكتوریا
ئه‌ڤ بنگه‌هه دكه‌ڤیته دناڤ بنگه‌هێ ئه‌سمانی یێ ئه‌مریكی ل به‌غدا كو دهێته هژمارتن ئێك ژ بنگه‌هێن له‌شكرێ ئه‌مریكی یێن گرنگ كو دكه‌ڤیته نێزیك بالیۆزخانا ئه‌مریكی ل به‌غدا و جهه‌كێ تایبه‌ت ب دادانا فرۆكان یێ لێ هه‌ی و هزار سه‌رباز و شیره‌تكارێن له‌شكری یێن ل ڤی بنگه‌هی هه‌ین.
ل هنده‌ك شاره‌زا و چاڤدێران ئه‌ڤ بنگه‌هه ئێك ژ دو بنگه‌هێن له‌شكرێ ئه‌مریكی نه ل به‌غدا كو بنگه‌هه‌كێ دی یێ ل ده‌ڤه‌را تاجی ل به‌غدا هه‌ی، به‌لێ پێشبینیا هژمارا سه‌ربازێن لێ هه‌ین یا ب زه‌حمه‌ته ب تایبه‌تی ل گه‌ل پێشڤه‌چوونێن ره‌وشێ عیراقێ، شاره‌زایێ وارێ ئێمناهیێ یێ عیراقی (هیشام ئه‌لهاشمی) هاتنا كاروانه‌كێ له‌شكرێ ئه‌مریكی بۆ سه‌ربازگه‌ها تاجی ل 7/1/2020 و دانانا فرۆكێن له‌شكری ب كه‌لوپه‌لێن زێده‌ڤه ئاشكرا كربوو.
– بنگه‌هێن له‌شكرێ ئه‌مریكی ل هه‌رێما كوردستانێ
چار بنگه‌هێن له‌شكرێ ئه‌مریكی یێن ل هه‌رێما كوردستانێ هه‌ین كو دو ژ وان بنگه‌هان ل هه‌ولێرێ نه كو ئێك ژوان ل نێزیك فرۆكخانا هه‌ولێرێ یا نێڤده‌وله‌تی یه كو ژ بلی ئه‌مریكیان، شیره‌تكار و مه‌شقكار و سه‌ربازێن هه‌ڤپه‌یمانیا نێڤده‌وله‌تی ژی یێن لێ هه‌ین كو توپ هاڤێژ و جهه‌كێ تایبه‌ت بۆ دادانا فرۆكان ژی لێ هه‌یه.
ل دووڤ هنده‌ك شروڤه‌كاران ئه‌ڤ بنگه‌هه دهێته هژمارتن باشترین بنگه‌هێن ئه‌مریكی ل عیراقێ ژ روویێ ئێمناهیێ ڤه و گرنگیا وی بنگه‌هی ژی ئه‌وه كو دهێته بكارئینان وه‌كو سه‌نته‌ره‌كێ پشته‌ڤانیێ بۆ بنگه‌هێن له‌شكری یێن ئه‌مریكی ل ده‌ڤه‌رێن رزگاركری ژ داعشێ، هه‌روه‌سا دهێته هژمارتن وه‌كو بنگه‌هه‌كه‌ك بۆ پاراستنا كونسۆلخانا ئه‌مریكی ل هه‌ولێرێ و هژمارا سه‌ربازێن شیره‌تكارێن تێدا دگه‌هیته 3 هزار كه‌سان.
هه‌روه‌سا بنگه‌هه‌كێ دی یێ ئه‌سمانی یێ ئه‌مریكی ل ده‌ڤه‌را حه‌ریر ل هه‌ولێرێ یێ هه‌ی و ئێك ژی ل زاخۆ و ئێك ژی ل هه‌له‌بجه و هه‌موو ئه‌و بنگه‌هێن له‌شكری یێن ئه‌مریكی ل هه‌رێما كوردستانێ د باره‌كێ باش یێ ئێمناهیێ هه‌مبه‌ركرن ل گه‌ل بنگه‌هێن دی یێن له‌شكرێ ئه‌مریكی ل عیراقێ.
سه‌رۆك بارزانی ب هه‌لكه‌فتا بیست و ئیك سالیا كه‌نالێ كوردستان تیڤی په‌یامه‌كا پیرۆزباهیێ ئاراسته‌ی ستاڤ و كارمه‌ندێن ده‌زگه‌هێ سه‌ته‌لایتا كوردستانێ كر.
د ناڤا وێ په‌یاما سه‌رۆك بارزانی ئاراسته‌ی كه‌نالێ كوردستان تیڤی كری، تێدا هاتیه ته‌له‌فزیونا كوردستان ده‌ستپێكا شوره‌شه‌كا راگه‌هاندنێ بۆ دناڤا میدیایێن كوردستانێ و نمونه‌یا میدیا نه‌ته‌وه‌ی و نیشتمانی بوو، هه‌می گاڤان پێگیری راستگۆی و هه‌ست به‌رپرسیارێ بوویه.
ئه‌ڤا خارێ ژی ده‌قێ په‌یاما سه‌رۆك بارزانی یه:
بۆ رێڤه‌به‌ر و ته‌ڤایا كارمه‌ندێن كوردستان تیڤی
ب هه‌لكه‌فتا بیست و ئێك سالیا ده‌ست بكاربوونا كوردستان تیڤی، گه‌رمترین پیرۆزباهیین خۆ ئاراسته‌ی وه‌یێن به‌رێز و هه‌مو ستاف و كارمه‌ندێن ده‌زگه‌هێ سه‌ته‌لایتا كوردستان دكه‌م و هیڤیا سه‌ركه‌فتنێ بۆ هه‌وه دخوازم.
ته‌له‌فزیونا كوردستان ده‌ستپێكا شوره‌شه‌كا راگه‌هاندنێ بوو دناڤا میدیایێن هه‌رێما كوردستانێ و نمونه‌یا میدیا نه‌ته‌وه‌ی و نیشتمانی بوو، هه‌رتم پێگیری بنه‌ماكێن راستگۆیێ و هه‌ست به‌رپرسیاریێ كریه، كوردستان تیڤی ل ماوه‌یێ كاركرنا خودا رۆل هه‌بوویه ل به‌لاڤكرنا هشیاریا نه‌ته‌وه‌ی و نیشتمانی و پشته‌ڤانیكرنا پێشمه‌رگه‌ی و خێزانێن شه‌هیدان و دڤی بیاڤی دا جهێ ده‌ستێن وان دیاره و ئه‌و رۆلێ وان جهێ پێ زانینێ بوون.
ئه‌و چاڤه‌رێكرنه ژ ده‌زگه‌هێ سه‌ته‌لایتا كوردستان و كوردستان تیڤی هه‌یه كۆ ب ته‌كنیكه‌كا نو، كارێ پرۆفیشنالی تێكه‌لبوونا گیانێ نیشتمان په‌روه‌ری و وه‌لاتپارێزی ب كه‌ته پێشه‌نگ بۆ كار و پیشه‌یێن راگه‌هاندنێ ل كوردستانێ.
دوباره پیرۆزباهیێ ل هه‌وه دكه‌م ب مینن ب خێر و خوشی
مه‌سعود بارزانی
17/1/2020
نيشاندان