ئامێدیێ، مەحمود نھێلی:
فرۆكێن شه‌ركه‌رێن لەشکەرێ تورکیا بوردومانکرنا بارەگەھێن په‌كه‌كێ ل چەندین گوندێن جداجدا یێن دەڤەرا ئامێدیێ و ناحیا دێرەلۆک دەست پێکرەڤە.
ل گورئاخفتنا شاهدحالا بوردومانکرنا گوندێن سەر ب قەزا ئامێدیێ تایبەت، دەڤەرا بەرورایا و کانی ماسێ ل دانێ سپێدێ دەستپێکریە و ل دانێ سپێدێ هه‌تا نها ل ھنداڤا دەڤەرا ئامێدیێ، لێ بوردومانا گوندێن سەر بناحیا دێرەلوک دەمژمێر دەھێ ئەڤ شەڤە دەست پێکریه‌.
سەردار عه‌باس ئاکنجیێ سەنتەرێ ناحیا دێرەڵوک بۆ ئەڤڕۆ نيوز خویا کر کو ل دەمژمێر 10:00 شەڤا پێنج شەمبی سەر ئەینی فرۆكێن لەشکەری یێن تورکیا چەندین گوندێن سنورێ ناحیا دێرەڵۆک بوردومانکرن و گۆت: “بوردومانا ڤێ جارێ گوندێ سەرگەلا کەڤن و کورک و بناڤیێ و سەرێ کەڤوتکێ گرتیە و ژبلی زیانین مادی کو ب رەز و بیستانێن وەلاتیان کەفتینە زیانێن جانی نەھاتینە زانین”.
هه‌تا ئامادەکرنا ڤی نوچەی بوردومانکرن یا بەردوامبوو.

بارزان ، نەوزاد زادە ھلوری:
رێبوار رەمەزان رێڤەبەرێ شەھید و ئەنفالکریێن بارزان بو ئەڤرۆ نیوز گۆت : ( وەسا بریار بوو کو وەزارەتا شەھید و ئەنفالکریێن کوردستانێ ب ھەڤکاریا دام و دەزگەھـ و سازیێن دەڤەرا بارزان سالرۆژا جینوسایدا بارزانیان لرۆژا ٢-٨-٢٠١٥ ساخ بکەت ، و ئەڤرو ٣٠-٧-٢٠١٥ ئەم ژلایێ وەزارەتێ ڤە ھاتینە ئاگەھدارکرن کو و ژبەر بلندوبونا پلەیێن گەرماییێ سالرۆژا ساخکرنا جینوسایدا بارزان بو دەمەکێ دن ھاتە پاشئێخستن )
دەبارەی ژڤانێ ساخکرنێ رێڤەبەرێ شەھید و ئەنفالکریان گۆت : ( وەزارەتێ چوو ژڤانێن دن نەداینەمە ،بەلێ گوتیە کو دێ ھەر ھێتە ساخکرن )
دھێتە زانین کو ل رێکەفتی ٣١-٧-١٩٨٨ ھەشت ھەزار بارزانی ژ توخمێ نێرینە ژلایێ رژێما بەعس ب ساخی ھاتنە بن ئاخکرن و وەکو وەفا و رێزگرتنەک بو گیانێ وان قوربانیان سالانە لسەر گورستانا جینوسایدکریان ئەڤ رۆژ دھێتە ساخکرن