ئه‌ڤرۆ نيوز:

بهايێ پترۆلێ د دو رۆژێن بۆرى دا ئاسته‌كێ پيڤايى يێ نوو د بلندبوونێ دا تۆماركر و بهايێ وێ ژ رۆژا پێنجشه‌مبيا بۆرى ب رێژا 19% و دوهى ژى ب رێژا 6% بلند بوو و ب ڤێ چه‌ندێ ژى ب تنێ د ماوێ دو رۆژێن بۆرى دا نێزيكى 17% ژ بهايێ وێ بلند بوو.

بلندبوونا بهايێ په‌ترۆلێ پشتى وێ چه‌ندێ دهێت كو بۆرسه‌ د سێ رۆژێن بۆرى دا ب ره‌نگه‌كێ گه‌له‌ك به‌رچاڤ بلند بووينه‌ و حوكمه‌تا چينێ ژى بڕيارا چاڤخشاندنێ د ره‌وشا ئابوورى يا وه‌لاتێ خوه‌ دا كريه‌.

د دووماهى مامه‌لا بهايێ په‌ترۆلا ئه‌مريكى دا ب رێژا 6.25 ل بازاران بلند بوويه‌ و هه‌ر به‌رميله‌ك ل ئاستێ 45 دۆوار و 22 سه‌نتان دا مامه‌له‌ پێ هاتيه‌ كرن.

بهايێ هه‌ر به‌رميله‌كا په‌ترۆلا خاڤ يا برێنێت ژى ل بازاران ب بهايێ 5.24 گه‌شه‌كريه‌ و ئێك به‌رميل ب 50 دولار و 5 سه‌نتان مامه‌له‌ پێ هاتيه‌ كرن.

ئه‌ڤرۆ نيوز:

بڕیاردەرێ لیژنا دارایی و ئابووریا پەرلەمانێ عێراقێ دیار کر، بەرھەڤیێن پڕۆژە قانوونا بودجەیێ سالا ٢٠١٦ یێ عێراقێ دەستپێکریە و چەندین کۆمبوون ھاتینە گرێدان، بەلێ نوونەرێ ھەرێما کوردستانێ پشکداری کۆمبوونێن بەرھەڤکرنا بودجەی نەکریە، ھەروەسا ئاشکراکر، د کۆمبوونێن بۆری دا عیراق یا رژدبوو بۆ سالا داھاتی ژی ھەرێم رۆژانە ٥٥٠ بەرمیلێن رۆژانە ب رێیا سۆمۆ ب ھنێریتە دەرڤە.
ئەحمەد حاجی رەشید، بڕیاردەرێ لیژنا دارایی و ئابووریا پەرلەمانێ عێراقێ بۆ رۆژناما ئەڤرۆ گۆت” ل گۆرەی قانوونا ئیدارا مالی ل نیڤا ھەموو سالەکێ دەست ب بەرھەڤکرنا پڕۆژە قانوونا بودجێ سالا داھاتی دھێتە کرن، ھەتا نوکە سێ کۆمبوون بۆ بەرھەڤکرنا بودجێ موئازنەی ھاتینەکرن و ئەز وەکی نوونەرێ پەرلەمانێ عێراقێ تێدا پشکدار بوویمە، قۆناغێن دەستپێکی بۆ بەرھەڤکرنا پڕۆژە قانوونا بودجێ سالا ٢٠١٦ ب دووماھی ھاتینە.
زێدەتر گت: ئاریشە ل ڤێ چەندێ بوو دەمێ ستراتیژیا بودجەی ھاتیە بەرھەڤکرن، نوونەرێ ھەرێما کوردستانێ تێدا بەرھەڤ نەبوو، من ئەف گازندەکر بۆچی نوونەرێ ھەرێما کوردستانێ بەرھەڤ نەبوویە، بەلێ لایەنێن حوکمەتا عێراقێ ئەڤ چەندە پشتڕاستکر، نوونەرێ وەزارەتا سامانێن سروشتی و دارایا ھەرێما کوردستانێ ھاتینە گازیکرن، بەلێ ب تنێ نوونەرێ وەزارەتا دارایی بەرھەڤبوویە و نوونەرێ سامانێن سرۆشتی بەرھەڤ نەبوویە، ئەڤا بۆ ھەرێمێ ھاتیە دیارکرن وەکی سالا بۆریە و دڤێت ھەرێم رۆژانە ٥٥٠ ھزار بەرمیلێن پترۆلێ ب ھنێریتە دەرڤە، مخابن نوونەرێ سامانێن سرۆشتی بەرھەڤ نەبوو د کۆمبوونێ دا، ھەتا بەڕەڤانیێ ژ ھەرێما کوردستانێ بکەت، چونکو ڤێ چەندێ پێدڤی ب رێکەفتنەکا نوو ھەیە”.
بڕیاردەرێ لیژنا دارایی گۆت ژی” بۆ ئەڤ سالە ژی بھایێ ئێک بەرمیلا پتڕۆلێ ب ٦٠ دۆلاران ھاتیە خەملاندن، ئەڤە ژی ئێکە ژ ئاریشێن بودجەیێ عێراقێ، ژ بەر کو نوکە بھایێ ئێک بەرمیلا پترۆلێ ٤٦ دۆلارن، دڤێت ھەرێما کوردستانێ د دەمێ بەرھەڤکرنا بودجەیێ عێراقێ رازیبوونا خوە دیاربکەت، کو کێمیەکا پترۆلێ ب رێیا عێراقێ ب ھنێریتە دەرڤە، دووبارە دێ دانوستانێن دناڤبەرا ھەرێما کوردستانێ و حوکمەتا بەغدا دەستپێکەن و رێکەفتن بھێتەکرن، ئەگەر بھێت و ھەرێم بەرھەڤی بودجەی نەبیت، ئەڤە دێ ھەرێم ل قانوونا بودجەیێ سالا داھاتی ٢٠١٦ێ ھێتە بێ بەھرکرن ژ داھاتێن عێراقێ و چو مافەک نابیت”.
حاجی رەشید دیار کر” ھەگەر ھەرێم بخوازیت پشکدار بیت ل ھنارتنا پترۆلێ ب رێیا بەغدا، ئەڤە یا فەرە دەمەکێ زوو بەرھەڤیا خوە نیشان بدەت دێ چەند پترۆلێ ھنێریت دگەل عێراقێ، د ھەمان دەم دا ئەگەر ھەرێمێ باوەری ب سەربخۆیا ئابووری ھەیە، دشێت پترۆلا خوە بفرۆشیت ب مەرجەکی بشێت ب رێیا فرۆتنا پترۆلا خوە داھاتێ ھەرێمێ ب مەزێخیت، چونکە عێراق نەشێت رێ ل ھەرێما کوردستانێ بگریت ل فرۆتنا پترۆلێ ب شێوەیەکێ سەربخوە، ئەگەر عێراق شیابا رێ بگریت، ئەڤە بەری نوکە دا رێ ل ھنارتنا پترۆلا ھەرێمێ گریت ب شێوەیەکێ سەربخۆ، ئەڤ چەندە بۆ لاوازی و ھێزیا ھەرێمێ ڤەدگەڕیت، ھەرێما کوردستانێ یا بھێز بیت دێ شێت پترۆلا خوە فرۆشیت و داھاتێ وێ پترۆلێ بۆ ھەرێما کوردستانێ بکار ئینیت”.