ئەڤرۆ:
گالیب ئەنساری ئوگلۆ ئەندامێ پەرلەمانێ تورکیا ل سەر لیستا پارتا داد و گەشەپێدان (ئاکپارتی) ژ ئامەدێ د داخۆیانیەکی دا بۆ رۆژناما ئەڤرۆ راگەھاند کو گەلێ کورد ل باشورێ کوردستانێ ب دەھان سالن خەباتەکا مەزن یا ئاشتیانە برێڤە دبەن بۆ بگەھنە مافێن خوە یێن نەتەوی و ئەڤرۆ ژی رەوشا جیھانێ، یا رۆژھەلاتێ ناڤین و نێڤدەولەتی گونجاییە چارەنڤیسێ خوە ب ریفراندومەکی دیار بکەن و گۆت: (ل ھەرێما باشورێ کوردستانێ ب پێشەنگیا بەرێز بارزانی خەباتەکا مەزن و سەرکەڤتی برێڤە دچیت و ئەز باوەر دکەم ھەم حوکمەتا تورکیا و ھەم ژی وەلاتێن ئوروپا دخوازن دەولەتەکا سەربخوە ببینن و راگەھاندنا دەولەتا کوردی مافێ ھەری سروشتی یێ گەلێ کوردە).
ئەنساری ئوگلۆ ھەروەسا راگەھاند ژی پەیوەندیێن وی یێن باش ل گەل بەرپرسێن کوردستانێ ھەنە و وی ھەردەم پشتەڤانی ل مافێن کوردان ل ھەر جھەکی کریە و گۆت: (ئەڤە نێزیکی ٢٥ سالن گەلێ کورد ل ھەرێما کوردستانا عیراقێ خوە برێڤە دبەت و ب سیاسەت و کریارێن خوە یێن سەردەمیانە شیاینە سەرنجێ پرانیا وەلاتێن دیمۆکراتیک راکێشن سەر خوە و ھەکە کورد ئەو ژیانە برایانە یا د ناڤبەرا ھەموو پێکھاتێن دا ب سەرکەڤتی بەردەوام بکەن و بشێن خەتابا خوە یا دبلۆماسی ب ڤی رەنگێ نھا برێڤە ببەن ئەز وەسا دبینم دێ پشتەڤانێن ئاڤاکرنا دەولەتا سەربخوە یا کوردستانێ ژی گەلەک زێدەتر ببن).
ل سەر بەرخوەدانا ھێزێن پێشمەرگە و شەرڤانێن کورد ل دژی تیرۆرستێن داغشێ ژی گالیب ئەنساری ئوگلۆ راگەھاند کو نھا ھەموو جیھان قەبوول دکەت کو ھێزێن پێشمەرگە پێشڤەچوونا چەکدارێن داعشێ راوەستاندینە و شیاینە دەڤەرێن خوە یێن ل ژێر دەستھەلاتا داعشێ ئازاد بکەن و گۆت: (بەرخوەدانا کوردان، ب تایبەت شەرێ دژوار یێن پێشمەرگان د قادا نێڤدەولەتی دا پشتەڤانیا ژ بۆ گەلێ کورد مەزنتر کریە و کوردان وەک پارێزڤانێن ژیانا دیمۆکراتیک و پێکڤەژیانا نەتەو و ئۆل و مەزھەبێن جودا دبینن و ناڤ و دەنگێ کوردان ل جیھانێ بەلاڤ بوویە و ئەڤرۆ پشتەڤانیا بۆ دەولەتەکا کوردی ژی گەلەک زێدە بوویە).
ل سەر قۆناغا ئاشتیێ ل باکورێ کوردستانێ و تورکیا ژی ئەنساری ئوگلۆ راگەھاند کو باوەریا وی ب سەرکەڤتنا قۆناغا ئاشتیێ ھەیە و داخواز ژ حوکمەتا ھەرێما کوردستانێ ژی کر کو د دەمێ پێدڤی دا بۆ سەرکەڤتنا قۆناغێ ھەڤکاریا ھەردو ئالیان بکەت و گۆت: (رۆلێ ھەرێما کوردستانێ ب تایبەت بەرێز بارزانی د دەستپێکرن و بەردەوامیا قۆناغا ئاشتیێ دا رۆلەکا بەرچاڤ و دیارە و ھیڤیدارم بۆ سەرکەڤتنا قۆناغێ بەردەوامیێ بدەنە ھەڤکاریێن خوە).
سەبارەت ب ھەلبژارتنێن پەرلەمانێ تورکیا ژی ئەندامێ پەرلەمانێ تورکیا راگەھاند ئەو وەسا دبینیت دێ (ئاکپارتی) دیسان وەک پارتا یەکەم دەرکەڤیت و حوکمەتێ دروست بکەت و گۆت: (د ناڤا وەلاتیان دا د ھندەک خالان دا ساربوونەک ھەیە، لێ وەلاتی ل گەل ڤێ یەکێ نە ئارامی و تەناھی بەردەوام بکەت و ل سەر پارتا دیمۆکراسیا گەلان ژی مرۆڤ نزانیت بەحسێ چ ئەنجامەکی بکەت، ژ بەر کو وەرگرتنا ١١% ژی بۆ من نە تشتەکی سەیرە و مانا د بن بەندێ ١٠% ژی نە تشتەکی سەیرە، لێ وەسا دیارە ھەکە HDP خوە باش بدەتە ناسکرن و ژ سیاسەتا دژوار دوور بکەڤیت دەلیڤا دەربازکرنا وێ ژ بەندا ١٠% گەلەک زێدە بوویە).
ل سەر نە بەربژار بوونا خوە د ھەلبژاتنێن ھەفتێ حزیرانا ئەڤسالە دا ژی ئەنساری ئوگلۆ دیار کر ئەو بابەتەکا تایبەتە و ناخوازیت ل سەر وێ مژارێ چ داخۆیانیەکی بدەت و گۆت: (بەلکو ئەز د خۆلا بھێت یا پەرلەمانێ دا جھێ خوە نەگرم لێ بلا ھەرکەس بزانیت کو ئەز دێ د ھەموو قادێن ژیانێ دا بۆ چارەکرنا پرسا کوردی و بجە بوونا ئاشتیێ ل وەلات دا بەردەوامیێ بدەمە خەباتێن خوە و چ ژ دەستێ من بھێت بۆ سەرکەڤتنا قۆناغا ئاشتیێ دێ بکەم).

ئەڤرۆ:
نوونەرێ پارتی دیموکراتی کوردستان ل ھەولێرێ دیار دکەت کو دوھی سبێدێ گەریلایێن PKK ھێرشی ھێزەکا پێشمەرگێن مە ل ھەرێما کەلەشینێ کرینە و دو پێشمەرگە شەھید بووینە و چەند کەس ژی بریندارن و گۆت: (مە بزاڤەکا مەزن کر کو ئەم ئالۆزیێ ب دانوستاندنان چارە بکەین، بەس مخابن وێ پارتیێ بەرسڤا مە ب شەری دا و ئەم باوەرین ھەماھەنگیەک د ناڤبەرا ئیران و PKK ھەیە).
محەمەد سالح قادری نوونەرێ پارتی دیموکراتی کوردستان- ئیران ل ھەولێرێ بۆ رۆژناما ئەڤرۆ دیار کر کو ئەو سنۆرێن کو ھێزێن مە تێدا بوون ب سالانە ئەم ل وان سنۆران بووینە و بەری PKK ھەبیت ژی ئەم ل وێرێ بووینە و ھێزێن مە بۆ رێکخستنێ و کارێن پێدڤی ل وێرێ دچنە رۆژھەلاتێ کوردستانێ و ژ بەر ھندێ مافێ چو ھێزەکێ نینە کو ئاستەنگیان ل ھەمبەر پێشمەرگێن مە دروست بکەت و گۆت: (دەمەک بوو ھێزێن PKK ئاستەنگی بۆ ھەڤالێن مە دروست دکرن و نەدخواست ئەو دەرباز ببن، مە ژی ب رێیا ھندەک دۆستان و کەسێن نیشتمانپەروەر بزاڤەکا مەزن کر کو ئەم نەھێلین ئالۆزی بەردەوام بیت و مە خواست ب رێیا دانوستاندنێ چارە بکەین، بەس مخابن دوھی ھێزێن PKK ھێرشی پێشمەرگێن مە کرینە و دو پێشمەرگە شەھید بووینە و چەند کەسەک ژی بریندارن).
ناڤھاتی دیار کر کو PKK دخوازیت شەرێ براکوژیێ ل سەر مە بسەپینیت و ئەم ڤێ یەکێ ب توندی رەد دکەین، چونکو نھا کوردستان د قۆناغەکا گەلەک ھەستیار دایە و مە دڤێت ھەموو پارت و ھێزێن کوردستانی ھاریکاریا ھەڤدو بکەن و نابیت پارتەکا وەک PKK ب کریارەکا وەسا نەخوش ببیتە ئەگەرێ ھندێ کو دلێ دۆژمنان کوردان خوش ببیت.
ل ئالیێ دی چەندین دەزگەھێن راگەھاندنێ یێ سەر ب پارتێن رۆژھەلاتێ کوردستانێ ژی دیار کرن کو پشتی ھێزێن PKK ھێرشی پێشمەرگێن پارتی دیموکراتی کوردستان- ئیران کرینە ھێزێن ئیرانێ ژی ھاتینە وێ دەڤەرێ و تەقە ل پێشمەرگان کرینە و مەکتەبا سیاسی یا پارتی دیموکراتی کوردستان- ئیران ژی دبێژیت کو دیارە ھەماھەنگیەکا د ناڤبەرا ئیرانێ و PKK دا ھەبوویە کو پێکڤە ھێرشی مە بکەن.
ل ئالیێ دی ب سەدان نڤیسەر و رەوشەنبیر و پارتێن سیاسی یێن ھەر چار پارچێن کوردستانێ ب داخۆیانیێن جودا جودا ھێرشا PKK یا ل سەر پێشمەرگێن پارتا دیموکرات یا کوردستان- ئیران شەرمزار کرن و داخواز ژ وێ پارتیێ کرن کو نەبیتە ئەگەرێ دەستپێکرنا شەرێ براکوژیێ، چونکو نھا کورد بەر ب دەولەتبوونێ ڤە دچن و دەلیڤەکا وەسا زێرین کەڤتیە دەستێ کوردان و دڤێت کورد پشتەڤانیێ ل ھەڤدو بکەن و داخواز ژ ھەموو ئالیێن سیاسی و پەرلەمانێ کوردستانێ ژی کرن کو د زووترین دەم ببنە ناڤژیڤان دا شەر بەرفرەھتر نەبیت و بھێتە راگرتن.
ل ئالیێ دی ژێدەرەکێ ژ باژارێ شنۆ یێ رۆژھەلاتێ کوردستانێ ژی بۆ رۆژناما ئەڤرۆ دیار کر کو پشتی شەرێ ل کەلەشینێ ب ھزاران سەربازێن ئیرانێ ل ئورمیێ و دەڤەرێن دی یێن سنۆری ب چەکێن گران ڤە ھاتینە بجە کرن و ھێزێن ئێمناھیێ یێ ئیرانێ دبێژن کو ھندەک ھێز دخوازن شەرەکی ناڤخوەیی ل ئیرانێ دروست بکەن و ئەم ھاتینە دا رێگریێ ل وێ یەکێ بکەین.