ئه‌ڤرۆ:

شیره‌تكارێ سه‌رۆكێ هه‌رێما كوردستانێ بۆ كاروبارێن له‌شكری راگه‌هاند، ئه‌مریكا ڤێجارێ وه‌كو سالا 2011 ئیراقێ ب تنێ ناهێلیت و خوه‌ ڤه‌ناكێشیت، چونكی وی ده‌می كو خوه‌ ژ ئیراقێ ڤه‌كێشای زیانێن مه‌زن گه‌هشتنه‌ ئیراقێ و ره‌وشا ئه‌منی یا ئیراقێ ب تمامی تێكچوو، ئاماژه‌ ب وێ چه‌ندێ ژی كر، هه‌رێما كوردستانێ ل رۆژهه‌لاتا ناڤین بۆ ئه‌مریكا گه‌له‌ك یا گرنگه‌ و هه‌كه‌ ئه‌مریكا خوه‌ ژ ئیراقێ ڤه‌كێشیت ژی، دێ ل هه‌رێما كوردستانێ مینیت.

بابه‌كر زێباری، شیره‌تكارێ سه‌رۆكێ هه‌رێما كوردستانێ بۆ كاروبارێن له‌شكری گۆت” ده‌مێ ئه‌مریكا ل سالا 2011 هێزێن خوه‌ ژ ئیراقێ ڤه‌كێشاین زیانه‌كا مه‌زن گه‌هشته‌ ئیراقێ، د ده‌مه‌كی دا بریاربوو له‌شكرێ ئیراقێ تاكو سالا 2010 خوه‌ رێك بێخیت، به‌لێ نه‌شیا وی كاری بكه‌ت به‌لكو ره‌وشا ئیراقێ ژ روویێ ئه‌منی ڤه‌ گه‌له‌ك خراب بوو و ب تمامی تێكچوو.

بابه‌كر زێباری گۆت ژی” وی ده‌می ئه‌مریكا به‌ری خوه‌ ژ ئیراقێ ڤه‌كێشیت، هه‌موو هاریكاری ژ روویێ مه‌شق و راهێنانێ و پرچه‌كرن و پێدڤیێن لوژستی بۆ هێزێن ئیراقی دابین كرن، به‌لێ فشارێن مه‌زن یێن وه‌لاتان ل سه‌ر ئیراقێ هه‌بوون كو درژد بوون ل سه‌ر وێ چه‌ندێ ئه‌مریكا خوه‌ ژ ئیراقێ ڤه‌كێشیت”.

زێده‌تر گۆت” ب دیتنا من ئه‌مریكا هه‌مان سیناریۆیا سالا 2011 دوباره‌ ناكه‌ت و خوه‌ ژ ئیراقێ ڤه‌ناكێشیت، چونكی نوكه‌ فشارێن كێمتر ل سه‌ر ئیراقێ یێن هه‌ین، هه‌روه‌سا ئه‌مریكا به‌رده‌وام هاریكاریا ئیراقێ و هه‌رێما كوردستانێ ژی دكه‌ت د هه‌موو بواران دا وه‌كو ئه‌سمانی و هه‌والگیری و پرچه‌كرن و مه‌شق و راهێنانان، ژبلی وێ چه‌ندێ هاریكاریا ئیراقێ و هه‌رێما كوردستانێ دكه‌ت ژ روویێ سیاسی و ئابووری ڤه‌”.

دیاركر” هه‌رچه‌نده‌ ئه‌مریكا خوه‌ ژ ئیراقێ ڤه‌ناكێشیت، به‌لێ هه‌كه‌ هات و خوه‌ ژ ئیراقێ ژی ڤه‌كێشیت، دێ ل هه‌رێما كوردستانێ مینیت، چونكی ئه‌ز ب خوه‌ گه‌له‌ك جاران ل گه‌ل ئه‌مریكیان یێ روونشتیم و به‌حسێ وێ چه‌ندێ كریه‌ كو هه‌رێما كوردستانێ بۆ وان گه‌له‌ك یا گرنگه‌ ژ هه‌موو رۆژهه‌لاتا ناڤین و دیاركرن ژی كو خه‌لكێ هه‌رێما كوردستانێ ژی ئه‌و خوه‌ش دڤێن، ژبلی وێ چه‌ندێ ژی جهێ هه‌رێما كوردستانێ كو دكه‌ڤیته‌ د ناڤبه‌را چه‌ندین وه‌لاتان دا، ئه‌ڤێ چه‌ندێ ژی گرنگیه‌كا زۆر بۆ وان یا هه‌ی”.

شیره‌تكارێ سه‌رۆكێ هه‌رێما كوردستانێ بۆ كاروبارێن له‌شكری خویاكر ژی” ئه‌و هێرشێن ل سه‌ر بنگه‌هێن هه‌ڤپه‌یمانان ژلایێ میلیشیێن ئیراقی ڤه‌ دهێنه‌ كرن، هاریكاریێ ژلایێ حوكمه‌تا ئیراقی ڤه‌ وه‌ردگرن، به‌لێ حوكمه‌تا ئیراقێ ده‌ستهه‌لات ل سه‌ر وان نینه‌، ئه‌ڤه‌ ژی مه‌ترسیه‌ ل سه‌ر حوكمه‌تا ئیراقێ و رامانا وێ چه‌ندێ دده‌ت كو هێشتا ئیراقێ پێدڤی ب ئه‌مریكا یا هه‌ی”.

بابه‌كر زێباری رۆهنكر ژی” ئه‌مریكا ژی هه‌تا نوكه‌ وه‌كو پێدڤی كارڤه‌دان نه‌بوو به‌رانبه‌ر وان هێرشێن ل سه‌ر بنكێن وان دهێنه‌ كرن و ئیدارا ئه‌مریكی یا نوو هنده‌كێ یا جوداتر و سستره‌ ژ ئیدارا بۆری، له‌وما پێدڤی بوووان ژی كارڤه‌دان هه‌بیت به‌رانبه‌ر وان هێرشێن ژلایێ میلیشیان ڤه‌ ل سه‌ر بنكێن وان دهێنه‌ كرن”.

ئه‌ڤرۆ:

سه‌رۆكێ حوكمه‌تا هه‌رێما كوردستانێ راگه‌هاند، ژ ڤێ هه‌یڤێ دێ ده‌ست ب به‌لاڤكرنا مووچێن فه‌رمانبه‌رێن هه‌رێما كوردستانێ ب تمامی و بێ لێبرین دێ هێته‌ كرن.

مه‌سرور بارزانی، سه‌رۆكێ حوكمه‌تا هه‌رێما كوردستانێ و قوباد تاله‌بانی جێگرێ سه‌رۆكێ حوكمه‌تێ، دوهی ئێكشه‌مبی 25 ته‌مووزێ ب شێوێ ئۆنلاین ل گه‌ل جڤاتا بلند یا ئابووری ل هه‌رێما كوردستانێ كۆمبوون، پشتی كۆمبوونێ، مه‌سرور بارزانی سه‌رۆكێ حوكمه‌تا هه‌رێمێ د گۆتاره‌كا ته‌له‌ڤزیۆنی دا راگه‌هاند، مووچێ ڤێ هه‌یڤێ بێ لێبرین دێ هێته‌ به‌لاڤكرن.

مه‌سرور بارزانی د گۆتارا خوه‌ یا ته‌له‌ڤزیونی دا گۆت” من پێخوه‌شه‌ ب مووچه‌خۆرێن هه‌رێما كوردستانێ رابگه‌هینم كو بریارا جڤاتا بلند یا ئابووری و بریارا جڤاتا وه‌زیران ژی یه‌ كو ژ ڤێ هه‌یڤێ لێبرینا مووچه‌ی نامینیت و بێ لێبرین دێ مووچه‌ هێته‌ به‌لاڤكرن”.

سه‌رۆكێ حوكمه‌تا هه‌رێما كوردستانێ ئاماژه‌ ب وێ چه‌ندێ دا كو ئه‌ركێ سه‌ره‌كیێ حوكمه‌تێ دابینكرنا مووچه‌ی بوو و هه‌كه‌ حوكمه‌تا فیدرالی ژی به‌رده‌وام بیت ل سه‌ر بجهئینانا سۆزا خوه‌ و هنارتنا وێ پشكا بودجه‌ی كو د چارچۆڤێ قانوونا بودجا فیدرالی ل سه‌ر رێككه‌فتین، دێ حوكمه‌تا هه‌رێما كوردستانێ ژی به‌رده‌وام بیت ل به‌لاڤكرنا مووچان ل ده‌مێ خوه‌ و ب تمامی.

به‌لاڤكرنا مووچه‌ی بێ لێبرین بۆ هه‌یڤێن داهاتی، وه‌كو مه‌سرور بارزانی به‌حس كری” دێ پتر مینیت ل سه‌ر وێ ئێكێ كو ئایا حوكمه‌تا فیدرالی دێ سۆزا خوه‌ بجهئینیت یان نه‌” گۆت ژی” هیڤیدارین بشێین ل پاشه‌رۆژێ بێ لێبرین مووچه‌ بهێته‌ به‌لاڤكرن”.

هه‌ر د گۆتارا خوه‌ یا ته‌له‌ڤزیۆنی دا، مه‌سرور بارزانی ل دۆر كورۆنایێ ئاخڤت و گۆت” تووشبوون یا زێده‌بووی” داخواز ژ وه‌لاتیێن هه‌رێما كوردستانێ ژی كر” پێگیریێ ب رێنمایێن ساخله‌میێ بكه‌ن و فاكسینێ ژی بدانن”.

سه‌رۆكێ حوكمه‌تا هه‌رێما كوردستانێ گۆت ژی” ئه‌ڤه‌ ئه‌ركه‌كه‌ و داخوازێ ژ هه‌وه‌ دكه‌م ب جدی وه‌ربگرن و له‌زێ د فاكسیندانانێ دا بكه‌ن” هه‌روه‌سا داخواز ژ وه‌زاره‌تا ساخله‌میێ كر ب له‌ز فاكسینێ دابین بكه‌ن بۆ وێ چه‌ندێ هه‌كه‌ هه‌موو خه‌لكێ هه‌رێما كوردستانێ ژی نه‌بیت، پتریا خه‌لكی فاكسینێ وه‌ربگرن.

خوه‌پاراستن ژ كورۆنایێ، وه‌كو مه‌سرور بارزانی گۆتی” ئه‌ركه‌كێ هه‌ڤپشكه‌ و تنێ گازندێ ژ حوكمه‌تێ نه‌كه‌ن و پێدڤیه‌ هوون ب خوه‌ وێ به‌رپرسیاره‌تیێ ل ستۆ بگرن”.

ئه‌ڤرۆ:

دانوستاندنێن ئه‌مریكا و ئیراقێ چووینه‌ د قۆناغه‌كا نوو دا، سه‌ركردێن ئیراقی ل بن فشارێن گرۆپێن چه‌كدار و میلیشیان دانه‌ كو داخوازا ڤه‌كێشانا ئه‌مریكا ژ ئیراقێ دكه‌ن و گه‌رێ چارێ یا دانوستاندنێن ستراتیژی د ناڤبه‌را ئه‌مریكا و ئیراقێ دا دێ دهێنه‌ كرن، سوباهی 28 ته‌مووزێ، مسته‌فا كازمی سه‌رۆك وه‌زیرێن ئیراقێ وه‌كو سه‌رۆكێ شاندێ ئیراقێ دێ چیته‌ واشنتون و چار كورد د گه‌لدانه‌ ئه‌وژی فوئاد حسێن وه‌زیرێ ده‌رڤه‌یێ ئیراقێ و فه‌وزی هه‌ریری، نوونه‌رێ سه‌رۆكایه‌تیا هه‌رێما كوردستانێ و ئامانج ره‌حیم سكرتێرێ جڤاتا وه‌زیرێن هه‌رێمێ.

فوئاد حسێن، وه‌زیرێ ده‌رڤه‌یێ ئیراقێ راگه‌هاند” هێزه‌كا ئه‌مریكی یا كێم ل ئیراقێ یا هه‌ی و بریاره‌ ب گۆره‌ی خشته‌كێ ده‌مكی بهێنه‌ ڤه‌كێشان، ل گه‌ل وێ چه‌ندێ په‌یوه‌ندیێن ئابووری پرسه‌كا گرنگه‌ د ناڤبه‌را وان و هه‌رێما كوردستانێ ژی لایه‌نه‌كێ سه‌ره‌كیێ وان دانوستاندنایه‌”.

عه‌لی حسێن، ئه‌ندامێ سه‌ركردایه‌تیا پارتی دیموكراتی كوردستان و به‌رپرسێ په‌یوه‌ندیێن ئیراقی و كوردستانی یێن پارتی، ل دۆر ڤێ پرسێ،  دبێژیت” هه‌رێما كوردستانێ پشكه‌كه‌ ژ ئیراقێ و ئه‌مریكا ژی وه‌كو پشكه‌ك ژ ئیراقێ ره‌فتارێ ل گه‌ل دكه‌ت، به‌لێ واقعێ هه‌رێما كوردستانێ د به‌رهنگاریا تیرۆرێ و داعشێ و مامه‌لا دبلۆماسی و ئارامیا كوردستانێ وه‌كریه‌ كو تایبه‌تمه‌ندیا خوه‌ هه‌بیت و بابه‌تێ ڤه‌كێشانا ئه‌مریكا ژ ئیراقێ په‌یوه‌ندی ب رێككه‌فتنا واشنتۆن – به‌غدا ڤه‌ هه‌ی”.

زێده‌تر گۆت” پێدڤیه‌ ئه‌م هه‌موو ئه‌گه‌ران ل به‌رچاڤ وه‌ربگرین، به‌دیلی بۆ ب دانین و بزانین هه‌كه‌ ئه‌مریكا خوه‌ ڤه‌كێشا، دێ به‌دیلێ مه‌ چ بیت و چاوان دێ مامه‌لێ كه‌ین؟ یا گرنگه‌ چاڤێ مه‌ ل سه‌ر وێ چه‌ندێ بیت كو زلهێزێن جیهانێ وه‌كو چین و بریتانیا و وه‌لاتێن ئۆروپی و رووسیا به‌رده‌وام چاڤدێریا ره‌وشا ئیراقێ دكه‌ن و ل ده‌مێ ڤه‌كێشانا ئه‌مریكا ژی یا گرنگه‌ رۆلێ وان وه‌لاتان به‌رزه‌ نه‌بیت ل ده‌ڤه‌رێ و ئارامیا كوردستانێ و ئیراقێ ژی بۆ ده‌ڤه‌رێ و هه‌موو رۆژهه‌لاتا ناڤین دێ گرنگ بیت، ژ وی روانگه‌ی سه‌ركردایه‌تیا سیاسی یا كوردستانێ دخوازیت وێ تایبه‌تمه‌ندیێ بپارێزیت، ئه‌ورۆپا ژی سیاسه‌تا خوه‌ د چارچۆڤێ سیسته‌مێ ناتۆ و هه‌ڤپه‌یمانیا سیاسی یا ئه‌مریكا، ئه‌وژی دشێن رۆلێ خوه‌ ل ده‌ڤه‌رێ ببینن”.

ل دۆر وێ چه‌ندێ كو وه‌سا دهێته‌ گۆتن ژ ئه‌گه‌رێ ڤه‌كێشانا ئه‌مریكا ژ ئیراقێ ره‌نگه‌ هه‌لبژارتن دده‌مێ خوه‌ دا نه‌هێنه‌ ئه‌نجامدان، گۆت” ل دووڤ داخۆیانیێن كۆمسیۆنا هه‌لبژارتنان و حوكمه‌تا ئیراقێ، هه‌لبژارتن ل ده‌مێ خوه‌ دێ هێنه‌ ئه‌نجامدان، به‌لێ د واقع دا ب راستی ڤه‌كێشانا سه‌دری ژ پرۆسا هه‌لبژارتنان دێ كاریگه‌ریا خوه‌ هه‌بیت و سه‌دری سه‌نگا خوه‌ یا هه‌ی د پرۆسا سیاسی دا و ئه‌و ره‌وشا ل به‌غدا هه‌ی و كونترۆلا مێلیشیان وه‌كریه‌ كو حوكمه‌ت كونترۆلا ره‌وشێ نه‌كه‌ت و ئه‌ڤه‌ ژی ئاماژێن ئه‌رێنی نینن كو هه‌لبژارتن ل ده‌مێ خوه‌ دا بهێنه‌ كرن”.

سه‌باره‌ت ئه‌گه‌رێ ڤه‌كێشانا پارتی ژ هه‌لبژارتنان، د ده‌مه‌كی دا ره‌وشا كه‌ركووكێ و شنگالێ و مووسل و خانه‌قین و دیالا یا جێگیر نینه‌، دیاركر” وه‌كو پارتی مه‌ هیچ بریاره‌ك نه‌دایه‌ ل دۆر هه‌لبژارتنان، پارتی پشكه‌كه‌ ژ لایه‌نێن سیاسی یێن ئیراقی و هه‌ر بریاره‌ك بهێته‌ دان ل كوردستانێ پێكڤه‌ گرنگه‌ بریارێ ل سه‌ر بده‌ین نه‌كو وه‌كو حزبه‌كا سیاسی ب تنێ، چونكه‌ هه‌كه‌ هه‌لبژارتن ژی بهێنه‌ كرن؟، دڤێت لایه‌نێن سیاسی بزاڤێ بكه‌ن ئێكده‌نگیێ دروست بكه‌ن”.

ل دۆر ئه‌گه‌رێ ڤه‌كێشانا هێزێن ئه‌مریكی و هه‌ڤپه‌یمانان ژ ئیراقێ و هاتنا هێزێن ناتۆ، گۆت” ئێكلاكرنا دانوستاندنان و رێككه‌فتنێ دێ دیاركه‌ت كا مانا هێزان ئه‌مریكی دێ چاوان بیت یان ژی چاوان ژی دێ هێنه‌ ڤه‌كێشان، به‌لێ نوونه‌رێن هه‌رێما كوردستانێ د چارچۆڤێ شاندێ به‌غدا بۆ واشنتۆن یێ هه‌ین و هه‌بوونا نوونه‌رێن كورد د شاندێ ئیراقی دا یا گرنگه‌”.