ئەڤرۆ نيوز:‏

سەرۆکێ زانکۆیا دھۆک بۆ رۆژناما ئەڤرۆ ئاشکرا کر کو رێککەفتنەک ل گەل ھژمارەکا زانکۆیێن ‏وەلاتێ کەنەدا ھاتیە ئیمزاکرن و دچارچووڤێ رێککەفتنێ دا پرۆژەکێ ھەشت سالی دێ ھێتە ‏بجھئینان.‏

پ.د.مسلح دھۆکی، سەرۆکێ زانکۆیا دھۆک ئاشکرا کر کو ل سەر داخوازا دو زانکۆیێن کەنەدی ‏وی سەرەدانا وەلاتێ کەنەدا کر و بۆ جارا ئێکێ د دیرۆکا زانکۆیا دھۆک دا رێککەفتنەک ل گەل ‏زانکۆیێن وەلاتێ ناڤھاتی ئیمزا کر، کو ئیک ژ وان زانکۆیێن وان سەرەدانا وێ کری زانکۆیا ‏‏(یورکم) بوو و گۆت: “ل سالا بۆری ژی مە رێککەفتنەک دگەل وێ زانکۆیێ ئیمزا کربوو، ب ‏مەرەما پتر مفا وەرگرتن و ھەڤکاریێ د ناڤبەرا زانکۆیا دھۆک و زانکۆیێن وەلاتێ کەنەدا دا”.‏

ناڤھاتی گۆت: “د سەرەدانا مە دا مە پرۆژەکێ بەفرەە پێشکێشی سەرۆکێ زانکۆیا ناڤبری کر ‏کو ئەڤ پرۆژە ھەشت سالان دێ یێ بەردەوام بیت، پرۆژە ژ سێ قووناغان پێکدھێت، قووناغا ‏ئێکێ دووڤچوون ل سەر کەمپێن ئاوارە و پەنابەران ل پارێزگەھا دھۆکێ و کا د چ کاودان دانە ژ ‏ھەموو روویەکی ڤە، قووناغا دویێ دووڤچوون ل سەر ئاوارێن قەستا وەلاتێ کەندا کرین کا ‏کاودانێن وی خەلکی د چ ئاست دانە، قووناغا سێ یێ دووڤچوون ل سەر ئەوان زارۆیێن تووشی ‏نەخۆشێن ترامایێ ئانکو (سەدمێ) بووین، ھندەک سازی و رێکخراوێن وەلاتێ کەنەدا دێ ‏پشتەڤانیێ ل ڤی پرۆژەی کەن، دچارچووڤێ رێککەفتنا ھاتیە ئیمزاکرن دێ مامۆستایێن ئەوان ‏زانکۆیان سەرەدانا ھەرێما کوردستانێ کەن ب مەرەما گۆتنا وانا و تایبەت ل ئەوان پشکێن مە ‏کێماسی تێدا ھەی”.‏

سەرۆکێ زانکۆیا دھۆک ئاماژە دا وێ چەندێ کو د ھەمان سەرەدان دا وی سەرەدانا زانکۆیا ‏‏(کارتن) کر و رێکەفتنەک ل گەل زانکۆیا ناڤبری ئیمزاکر بۆ پتر خورتکرنا پەیوەندیێن زانستی، ‏ھەروەسا دانوستاندن ل سەر وێ چەندێ ھاتەکرن ب چو شێوە دێ شارەزایی و شیانێن ‏مامۆستایێن زمانێ ئنگلیزی ھێـنە بلندکرن و گۆت: “زانکۆیا ناڤھاتی پێشنیارکر کو مامۆستایێن ‏زانکۆیا دھۆک سەرەدانا وی وەلاتی بکەن، لێ پشتی گەنگەشێ گەھشتینە وێ رێککەفتنێ کو ‏مامۆستا ژ زانکۆیا (کارتن) سەرەدانا ھەرێما کوردستانێ بکەن و خۆلان بۆ مامۆستایێن زمانێ ‏ئنگلیزیێ ڤەکەن داکو پتر مامۆستا مفایی ژێ وەرگرن”. ‏

پ.د.مسلح دھۆکی خویا کر کو ھەر دچارچووڤێ ئەوێ دانوستاندنێ دا بەحسێ جەندەر ناسیێ ‏کر و وی ئاگەھدارکرن کو وان ل زانکۆیا دھۆک سەنتەرەک د ڤی بیاڤی دا ھەیە و خوەشحالبوون ‏ب ئەڤێ پێنگاڤا زانکۆیا دھۆک و دیارکرن کو دێ پرۆژێن ھەڤپشک ھەبن بۆ پێشڤەبرنا بیاڤێ ‏ناڤھاتی کو ژڤانە ل چریا ئێکی یا ئەڤ سالە شاندەکێ زانکۆیا ناڤھاتی سەرەدانا زانکۆیا دھۆک ‏بکەت و شیانێن مامۆستایێن زانکۆیا دھۆک ببین و زێدەتر ڤێ رێککەفتنێ پێشڤەببەن و گۆت: ‏‏”ئێک ژ ئاریشێن مامۆستایێن زانکۆیێن کەنەدی ڤیزە بوو کو بتنێ دشێن بۆ دەمێ 15 رۆژان بێ ‏فیزە ل عیراقێ بمینن ژ بەر ڤێ چەندێ داخواز ژ مە کر کو ھاریکاربین ل سەر دابینکرنا ڤیزێ ‏بۆ ڤێ مەرەمێ ژی مە سەرەدانا بالیۆزخانا عیراقێ ل وەلاتێ کەنەدا کر و مە ژێ خواست ‏دھاریکاربن ل گەل مامۆستایێن زانکۆیێن کەنەدی بۆ دانا ڤیزێ و ژ ئالیێ خوە ڤە بالیۆزیێ ‏عیراقێ ل وی وەلاتی دووپاتکر کو ھەر دەمێ داخوازا ڤیزێ کر ب زووترین دەم دێ بۆ ھێتە ‏دابینکرن، ھەروەسا مە سەرەدانا زانکۆیەکا دی کر کو دچارچووڤێ گەشتا مە دانەبوو و چ ‏گرێبەست ل گەل نەھاتنە ئیمزاکر و سالێن داھاتی دێ پەوەندیێن مە ھێنە خورتکرن”.‏

سەرۆکێ زانکۆیا دھۆک دیار کر کو ئەڤە بۆ جارا ئێکێ یە پەیوەندی دناڤبەرا زانکۆیا دھۆک و ‏زانکۆیێن کەنەدی دا دھێنە چێکرن، پرۆژێ ھەشت سالی یێ ھاتیە ئیمزاکرن و حوکمەتا کەنەدی ‏دێ پشتەڤانیێ لێ کەت و ئەو پرۆژە دێ بیتە ڕاپۆرت و دێ بۆ حوکمەتا ھەرێما کوردستانێ ‏ھێنە بلندکرن بۆ دووڤچوونا ل سەر ئاوارە و پەنابەران و گۆت: “دچارچووڤێ پەیوەندیێن مە دا ‏ل گەل زانکۆیێن جیھانێ مە سێ باوەرنامێن ھەڤپشک ل گەل زانکۆیێن دەرڤە ھەنە، باوەرنامەکا ‏ھەڤپشک دێ ھێتەدان ل گەل زانکۆیا دوتماند و باوەرنامە دناڤبەرا مە و ھەر دو سەرۆک زانکۆیان ‏دا دێ ھێتە ئیمزاکرن و ئەڤ باوەرنامە ل سەرانسەری جیھانێ یا باوەرپێکریە، ھەروەسا ‏زانکۆیەکا دی ل ئەلمانیا دێ باوەرنامەکا ھەڤپشک دھێـتەدان ل سەر ئەندازیاریێ و یا ‏باوەرپێکریە، دیسا زانکۆیەکا دی ژی یا ئەلمانی مە باوەرنامە یا ماستەرێ ل گەل ھەیە و ئەو ‏ژی یا ھەڤپشکە، د بەرنامێ مە دایە بۆ سالێن داھاتی و دبیاڤێ پەروەردا تایبەت دا کار بکەین و ‏ئەڤ سالە ل گەل زانکۆیەکێ دبەردەوامین و پشتەڤانیا رێکخراوەکێ و گەلەک مامۆستایێن مە ‏راھێنان پێ ھاتینەکرن ل سەر چاوانیا گۆتنا وانا پەروەردا ب تایبەت بۆ کەسێن خودان ‏پێدڤیێن تایبەت”.‏

ل دووماھیێ، سەرۆکێ زانکۆیا دھۆک ب ھەلکەفتا سەر سالا رۆژناما ئەڤرۆ گەرمترین پییرۆزباھی ‏ل ستاف و خواندەڤان و ھەموو خەلکێ پارێزگەھا دھۆکێ کر و رۆژناما ئەڤرۆ ب زمانحالێ ‏خەلکێ دەڤەرێ ل قەلەم دا.‏

ئه‌ڤرۆ نيوز:‏

جەژنا چلێ ھاڤینێ ل رۆژا 31/7 دەست پێ دکەت ھەتا رۆژا 2/8/2019 رێورەسمێن جەژنێ ل پەرستگەھا ‏لالش دھێنە گێران و ئختیارێ مەرگەھێ و جڤاتا وی و شکەستی و زانایێن ئاینی و ھەر ئێزدیەکێ بڤیت دشێت ‏رۆژیان بگریت، کو دبێژنە وان چلەگر ئانکو رۆژی گرتن فەرز نینە ئەو کەسێن رۆژیان دگرن ل ئێڤاریا رۆژا ‏ئێکێ یا جەژنێ قەستا پەرستگەھا لالش دکەن.‏

شەمۆ قاسم، بەرپرسێ لژنا رەوشەنبیری یا دەستەیا بلندا بنگەھی لالش یێ رەوشەنبیری و جڤاکی ل دھۆکێ ‏دیار کر کو جەژنا چلێ ھاڤینێ گەلەک یا کەڤنارە بۆ بەری 1500 سالان رێورەسمێن جەژنا چلێ ھاڤینێ ل ‏پەرستگەھا لالش دھێنە گێران ھەر ئێزدیەکێ بڤێت قەستا پەرستگەھێ دکەت لێ سەردەری و دیندار رێورەسمان ‏دگێرن و بەری دەستپێکرنا رێورەسمان ب شەڤەکێ سەردەری و دیندار ل پەرستگەھا لالش ئامادە دبن بۆ دەمێ ‏سێ رۆژان ل دووڤ ئێک دا رێورەسمێن جەژنێ دھێنە برێڤەبرن کو ھەر ئێزدیەکێ بچیتە لالش د سەر پرا ‏سەلاتێرا دەربازبیت و دچیتە سەر حەودا کانیا سپی و دەست و چاڤێن خوە پێ پاقژ دکەن ھەروەسا ژی ھەر ‏ئێزدیەکێ بچیتە لالش ل ڤێ جەژنێ دڤێت کانیا سپی و دەرێ قاپیێ و زمزمێ و سندرووکا شێخادی و بەرێ ‏شباکێ و نێشانگەھا شێخ فەخر و مەزارگەھێن شێشمس و شێخ و پێرین خوە زیارەتی بیت.‏

ناڤھاتی خویا کر کو ل ھەموو ئێڤاریان چرایێن ئاقد و نێشانگەھێن خاسا دھێنە ھەلکرن و ل ھەر سێ رۆژێن ‏جەژنێ ل سپێدەھیا پشتی بەیتا سپێدەھیان و ئێڤاریان ژی پشتی بەیتا ئێڤاریان رێورەسمێن قنتارێ دھێنە ‏گێران ھەر کەسەکێ نەیی مۆرکری بیت ب ئاڤا کانیا سپی دھێتە مۆرکرن ھەموو ئێڤاریان ژی دەف و شبابا ‏لێدەن و بەیت و قەول و قەسیدێن ئاینی دھێنە گۆتن و سماتی دروست دکەن ل رۆژا دووماھیێ ژ جەژنا چلێ ‏ھاڤینێ تاووس دھێتە جوانکرن ل گۆند و دەڤەرێن ئێزدیان ھەر کەسەکێ بڤێت خێرەکێ دکەت ل پەرستگەھا ‏لالش سەما دھێتە گێشان و گۆڤەندا دەرێ کانیێ دھێتە گێران ل ڤێ جەژنآ ژی وەکو ھەموو جەژنێن دی ئێزدی ‏قەستا لالش دکەن و جەژنا ئێکدو پیرۆز دکەن د لالشا نوورانی دا.‏