ئەڤرۆ نیوز:

ژ بەر وەفاتا بێرنارد دۆرین بالیوزێ بەرێ یێ فرەنسا سەرۆک مەسعود بارزانی ل رۆژا ٢٣/٢/٢٠١٩ ب رێکا بروسکەیەکا ھەڤخەمیێ بۆ مالباتا بالیوز بێرنارد دۆرین ھنارت و تێدا سەرەخوشی و ھەڤخەمیا خوە ئاراستەی مالباتا خودێ ژێ رازی کر، سەرۆک بارزانی د بروسکا خوە دا دیاردکەت کو بالیوز بێرنارد دۆرین دوستێ گەلێ کوردستانێ بوویە و کەسەکێ گەلەک نێزیکی وی بخوە ژی بوو.

ئەڤرۆ نیوز، هۆشەنگ تاجر:

مستەفا جومعە ئەندامێ مەکتەبا سیاسی یا پارتی دیموکراتی کوردستان/ سووریا بۆ ئەڤرۆ نیوز دیار کر کو بریارا ئەمریکا یا هێلانا ٢٠٠ سەربازێن خوە ل رۆژئاڤایێ کوردستانێ پێنگاڤەکا گرنگ و دیرۆکی بوو و تنێ ٢٠٠ سەربازێن وان نامینن بەلکو دێ ٤٠٠ سەرباز ل گەل چەکێن گران ل رۆژئاڤا مینن و گۆت: (ژبلی ئەمریکا هندەک وەلاتێن دی یێن ئورۆپا و ئوسترالیا ژی دێ نێزیکی هزار سەربازێن خوە رەوانەی رۆژئاڤایێ کوردستانێ کەن، ب ڤی رەنگی ژی پیلانا هێرشەکێ ژ ئالیێ تورکیا و رژێما سووریێ ل سەر رۆژئاڤایێ کوردستانێ ژناڤچوو).

ئەندامێ مەکتەبا سیاسی یا پارتی دیموکراتی کوردستان/ سووریا ئەو یەک ژی دیار کر کو هەکە تنێ ئالایێ ئەمریکا ژی ل دەڤەرێن رۆژئاڤایێ کوردستانێ بمینیت بۆ مە کوردان گرنگە، چونکو هەتا ئەمریکا ل رۆژئاڤایێ کوردستانێ بمینیت چو هێزەک نەشێت هێرشی کوردان بکەت و گۆت: (پێشڤەچوونێن گرنگ نها روو ددەن کو هەموو ژی د بەرژەوەندیا کوردێن سووریێ دانە، ئەز ب باوەرم پشتی ڤێ پێنگاڤا گرنگ یا ئەمریکا دێ دەڤەرەکا ئارام ژی هێتە ئاڤاکرن و ب ڤی رەنگی ئێدی تورکیا نەشێت هێرشی رۆژئاڤایێ کوردستانێ بکەت).

ناڤهاتی د دووماهیا ئاخڤتنا خوە دا ئەو یەک ژی نەڤەشارت کو شاندەکێ ئەمریکی بەری نها ل گەل ئەنجوومەنێ نیشتمانی یێ کوردی ل سووریێ ژی کۆمبووینە و ئەمریکا ب چو رەنگەکێ کوردان ب تنێ ناهێلیت و دێ کوردان پارێزیت.

ئه‌ڤرۆ نيوز:

هه‌ده‌پێ سه‌رپێل كه‌مالباى په‌رله‌مانتارێ باژێرێ ئه‌زميرێ وه‌كو كانديدێ خوه‌ بۆ سه‌رۆكاتيا په‌رله‌مانێ توركيا ده‌ست نيشانكر.

ژ ئه‌نجامێ دانوستاندنا ئورگانێن په‌يوه‌نديدار پارتى ديموكراتى گه‌لان- هه‌ده‌په‌ سه‌رپێل كه‌مالباى په‌رله‌مانتارێ باژێرێ ئه‌زميرێ وه‌كو كانديدێ خوه‌ بۆ سه‌رۆكاتيا په‌رله‌مانێ توركيا ده‌ست نيشانكر.

ناڤێ كانديدێ هه‌ده‌پێ دێ ژ لايێ شانده‌كى ب سه‌رۆكاتيا سه‌رۆكا فراكسيۆنا هه‌ده‌پێ فاتيما كورتۆلان ب فه‌رمى پێشكێشى سه‌رۆكاتيا په‌رله‌مانى هێته‌ كرن.

بڕياره‌ سوبه‌هى 24ى شوباتا 2019ێ هه‌لبژارتنا سه‌رۆكێ په‌رله‌مانێ توركيا ل ناڤ په‌رله‌مانى بهێته‌ كرن، پشتى كو بينالى يلدرم سه‌رۆكێ په‌رله‌مانى خوه‌ بۆ والياتيا باژێرێ سته‌مبۆلێ به‌ربژار كرى.

ئه‌ڤرۆنيوز:

شره‌تكاره‌كێ مه‌كته‌با سياسى يا ئێكه‌تى نيشتمانى كوردستان ل دۆر په‌يوه‌نديێن دناڤبه‌را پارتى وئێكه‌تيێ راگه‌هاند، په‌يوه‌نديێن هه‌ردو لايه‌نان دێ ئاسايى بن.

سمكۆ ئه‌سعه‌د، شيره‌تكارێ مه‌كته‌با سياسى يا ئێكه‌تى نيشتمانى كوردستان گۆت” بريارا مه‌كته‌با سياسى يا ئێكه‌تيێ بۆ ئاساييكرنا په‌يوه‌نديێن پارتى وئێكه‌تيێ ئه‌وه‌ كو كێشين مه‌ ل سه‌ر مێزا دانوستاندنێ بهێنه‌ چاره‌كرن، هه‌روه‌سا ئه‌م هه‌ردو لايه‌ن وه‌كو دو لايه‌نێن به‌رپرس مامه‌لێ ل گه‌ل چاره‌نڤيسێ ملله‌تێ خوه‌ بكه‌ين”.

سمكۆى زێده‌تر بۆ باسنيوز گۆت” ئارمانجا ئێكه‌تيێ ئه‌وه‌ ده‌ستهه‌لاتا كوردستانێ ل سه‌ر ئاستێ هه‌موو كوردستانێ يا ئێكگرتى بيت نه‌كو ده‌ڤه‌ر ب ده‌ڤه‌ر بهێته‌ جوداكرن، ئه‌ڤه‌ ئه‌و بناغه‌ كو ئێكه‌تى دخوازيت دانوستاندنێ ورێككه‌فتنێ ل سه‌ر بكه‌ت”.

گۆت ژى” باوه‌ر ناكه‌م پارتى وئێكه‌تى بشێن په‌يوه‌نديێن خوه‌ ببرن، چه‌نكى ئه‌و دولايه‌نه‌ دزانن به‌رژه‌وه‌نديا بلند يا ملله‌تێ مه‌ دسه‌ر به‌رژه‌وه‌نديێن حزبان دايه‌، هه‌روه‌سا ئێكه‌تى وپارتى هه‌تا نوكه‌ ژبۆ به‌رژه‌وه‌نديا ملله‌تێ كورد خه‌بات وسياسه‌ت كريه‌، له‌وما چو ده‌مه‌كى په‌يوه‌نديا پارتى وئێكه‌تيێ ناگه‌هيته‌ حاله‌تا دووركه‌فتنێ”.

دووپاتكر كو پارتى وئێكه‌تى دێ كۆمبن ودێ ل سه‌ر مێزا دانوستاندنێ كێشان چاره‌كه‌ن، گۆت ژى”به‌رپرسێن پارتى وئيكه‌تيێ بزاڤا چاره‌كرنا وان كێشان دكه‌ن، چونكى هه‌كه‌ ئه‌و دو لايه‌نه‌ كێشێن خوه‌ چاره‌ نه‌كه‌ن، دبيت زيان بۆ وه‌لاتيان هه‌بيت”.

شيره‌تكارێ مه‌كته‌با سياسى يا ئێكه‌تێ خوياكر ژى”ئاسايي كرنا په‌يوه‌نديێن پارتى وئيكه‌تيێ پێدڤى ب ناڤبه‌ريا چو لايه‌نه‌كێ دى نينه‌، چونكى پارتى وئێكه‌تى چه‌ندين ساله‌ ڤى وه‌لاتى ب رێڤه‌دبه‌ن وهه‌ر ئه‌و ب خوه‌ ژى لايه‌نێن سيێ وچارێ نه‌ وهه‌ر ئه‌و ب خوه‌ دێ بن‌ ئێك لايه‌ن بۆ چاره‌كرنا كێشان”.

ئه‌ڤرۆنيوز:

ئه‌ندامه‌كێ په‌رله‌مانێ كوردستانێ ژفراكسيۆنا پارتى ديموكراتى كوردستان ده‌ستپێشخه‌ريه‌كا سه‌رۆك مه‌سعود بارزانى بۆ چاره‌كرنا كێشێن هه‌رێما كوردستانێ وپێكئينانا حوكمه‌تا نوو يا هه‌رێمێ ئاشكرا دكه‌ت.

زانا مه‌لا خالد، ئه‌ندامێ په‌رله‌مانێ كوردستانێ ژ فراكسيۆنا پارتى بۆ باسنيوز راگه‌هاند” ده‌نگوباسه‌كێ دلخوه‌شكه‌ر بۆ خه‌لكێ كوردستانێ يێ ب رێڤه‌ وب ده‌ستپێشخه‌ريا سه‌رۆك مه‌سعود بارزانى ل چه‌ند رۆژێن داهاتى گرفتێن دناڤبه‌را پارتى وئيكه‌تيێ ل دۆر پێكئينانا حوكمه‌تا نوو يا هه‌رێما كوردستانێ دێ هێنه‌ چاره‌كرن”.

ل دۆر وێ چه‌ندێ ژێده‌ره‌كى بۆ باسنيوز دووپاتكر كو سه‌رۆك بارزانى داخوازكريه‌ هه‌ردو مه‌كته‌بێن سياسى يێن پارتى وئێكه‌تيێ ب زووترين ده‌م كۆمببن.

ئه‌ڤرۆنيوز:

ب مه‌ره‌ما دانوستاندنێ ل گه‌ل به‌رپرسێن ئێكه‌تى نيشتمانى كوردستان ل دۆر پێكئينانا كابينا نوو يا حوكمه‌تا هه‌رێما كوردستانێ، برياره‌ ل ده‌ستپێكا حه‌فتيا داهاتى نێچيرڤان بارزانى جێگرێ سه‌رۆكێ پارتى ديموكراتى كوردستان سه‌ره‌دانا سلێمانيێ بكه‌ت.