ئه‌ڤرۆنيوز:

ل درێژيا كۆمبوون ودانوستاندنێن ل دۆر پێكئينانا كابينا نوو يا حوكمه‌تا هه‌رێما كوردستانێ، سوباهى شه‌مبيێ 16/2/2019 شاندێ مه‌كته‌با سياسى يا پارتى ديموكراتى كوردستان وبزاڤا گۆران دێ جاره‌كادى ل سلێمانيێ كۆمبن.

برياره‌ د وێ كۆمبوونێ دا هه‌ردو شاندێن پارتى وگۆران دووماهى پێشهات وگوهۆريێن تايبه‌ت ب پێكئينانا كابينا نوو يا حوكمه‌تا هه‌رێما كوردستانێ به‌حس بكه‌ن.

دوهى پێنجشه‌مبى 14/2/2019 شاندێ مه‌كته‌با سياسى يا پارتى وبزاڤا گۆران ل پيرمام كۆمببون وپشتى كۆمبوونێ په‌يڤدارێن هه‌رد لايه‌نان بۆ رۆژنامه‌ڤانان راگه‌هاندبوو كو لێكنێزيكبوونه‌كا باش ل دۆر پرسا پێكئينانا كابينا نوو يا حوكمه‌تا هه‌رێما كوردستانێ دناڤبه‌را هه‌ردو لايه‌نان دا هه‌يه‌.

ئه‌ڤرۆنيوز:

كۆمسيۆنا بلند يا هه‌لبژارتنان وراپرسيێ ل هه‌رێما كوردستانێ دبه‌رپه‌رێ خوه‌ يێ فه‌رمى دا ل سه‌ر تۆرا جڤاكى يا فه‌يسبووكى به‌لاڤكر، پشتى تمامبوونا هه‌موو پێرابوونان وده‌رچوونا فه‌رمانا خه‌رجكرنا پارێ كارمه‌ندێن گرێبه‌ستێن كۆمسيۆنێ بۆ رۆژا ده‌نگدانا په‌رله‌مانێ كوردستانێ، نوكه‌ به‌لاڤكرنا پاره‌ى دقۆناغا دووماهيێ دايه‌.

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ ئه‌ينيێ 15/2/2019 دچارچۆڤێ كۆنگرێ ئاسايشا جيهانى ل مونشن ل ئه‌لمانيا ل گه‌ل فالح فه‌ياز شيره‌تكارێ ئاسايشا نيشتمانى يا عيراقێ كۆمبوو.

دديداره‌كێ دا، مه‌سرور بارزانى دووپاتى ل سه‌ر پێدڤيا به‌رده‌واميا هاريكاريا ئه‌منى دناڤبه‌را هه‌ولێرێ وبه‌غدا كر.

هه‌ر د وێ كۆمبوونێ دا گرنگيا زڤرينا كاركرنێ ب ميكانيزما ئه‌منى يا هه‌ڤپشك دناڤبه‌را هێزێن پێشمه‌رگه‌ى وهێزێن عيراقى ل ده‌ڤه‌رێن تايبه‌ت ب مادێ 140 ڤه‌ هاته‌ به‌حسكرن ول دۆر زێده‌بوونا لڤين وكريارێن داعشێ ل پارێزگه‌هێن كه‌ركووك، نه‌ينه‌وا، سه‌لاحه‌دين، ديالا وپشكه‌ك ژ ئه‌نبار دلته‌نگى هاته‌ نيشاندان.

مه‌سرور بارزانى دووپاتكر كو راوه‌ستاندنا داعشێ وئايديولۆژيا وێ پێدڤى ب هاريكاريا به‌رده‌وام دناڤبه‌را حوكمه‌تا هه‌رێما كوردستانێ وحوكمه‌تا فيدرال هه‌يه‌.

هه‌ر د وێ كۆمبوونێ دا هه‌ڤرايى هه‌بوو ل دۆر گرنگيا ئاساييكرنا ره‌وشا كه‌ركووكێ ل سه‌ر بنه‌مايێ وێ نه‌خشه‌رێيا دمادێ 140 يێ دستوورى هاتى.

ئه‌ڤرۆنيوز:

پشتى ب دووماهى هاتنا كۆمبوونا دناڤبه‌را هه‌ردو شاندێن پارتى وئێكه‌تيێ ل سلێمانيێ، په‌يڤدارێن هه‌ردو لايه‌نان كونفرانسه‌كێ رۆژنامه‌ڤانى ئه‌نجامدا.

مەحمود محەمەد، په‌يڤدارێ فه‌رميێ پارتى ديموكراتى كوردستان گۆت” هه‌ردو حزب ب حوكمێ ديرۆكێ وخه‌باتێ، هه‌ست ب به‌رپرسياره‌تيێ دكه‌ن ولژنه‌ بۆ چاره‌كرنا كێشان هاتنه‌ پێكئينان”.

گۆت ژى” هه‌موو كێشێن مه‌ كو گرێداى پێكئينانا حوكمه‌تێ وسه‌رۆكايه‌تيا هه‌رێمێ وكه‌ركووكێ هاتنه‌ چاره‌كرن”.

دياركر ژى” ئه‌ڤ ره‌شنڤيسێ هاتيه‌ به‌رهه‌ڤكرن سوباهى ژلايێ پارتى وئێكه‌تيێ ڤه‌ دێ دانوستاندن ل سه‌ر هێته‌ كرن وپاشى هه‌كه‌ هاته‌ په‌سه‌ندكرن، درێ وره‌سمه‌كى دا رێككه‌فتنا دناڤبه‌را پارتى وئێكه‌تيێ دێ هێته‌ ئيمزاكرن”.

ژلايێ خوه‌ڤه‌ سه‌عدى ئه‌حمه‌د پيره‌،  په‌يڤدارێ فه‌رميێ ئێكه‌تيێ راگه‌هاند كو ئێكه‌تى دێ پشكداريێ دكۆمبوونا 18 ڤێ هه‌يڤێ يا په‌رله‌مانێ كوردستانێ دا كه‌ت.

گۆت ژى” ئه‌م رێككه‌فتين كو پارێزگه‌رێ كه‌ركووكێ ب رێككه‌فتن بهێته‌ دانان وبۆ پرسا وه‌زاره‌تا داد يا عيراقێ بريار هاته‌ دان كو ئه‌و پرسه‌ بهێنه‌ چاره‌كرن ب شێوه‌كى كو ل سه‌ر وى بابه‌تى ژى رێككه‌فتن هه‌بيت”.

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، دێ ل كۆنگرێ ئاسايشێ ل مونشن ل گه‌ل وه‌زيرێ ده‌رڤه‌يێ رووسيا كۆم بيت.

مه‌سرور بارزانى، شيره‌تكارێ جڤاتا ئاسايشا هه‌رێما كوردستانێ دئێكه‌م رۆژا پشكداريا وى دكۆنگرێ ئاسايشێ ل مونشن ل ئه‌لمانيا، دێ ل گه‌ل سێرگى لاڤرۆڤ وه‌زيرێ ده‌رڤه‌يێ رووسيا كۆمبيت.

برياره‌ پشتى كۆمبوونا ل گه‌ل لاڤرۆڤى، مه‌سرور بارزانى ل گه‌ل فالح فه‌ياز شيره‌تكارێ ئاسايشا نيشتمانى ل عيراقێ كۆم ببيت.

هه‌ر ددرێژيا كۆمبوونێن خوه‌ يێن ئه‌ڤرۆ دا، مه‌سرور بارزانى دێ ل گه‌ل سه‌رۆك وبه‌رپرسێ په‌يوه‌نديێن ده‌رڤه‌ يێن پارتا كريستيانا ديموكراتى يا ئه‌لمانى كو پارتا ئه‌نگێلا مێرگل شيره‌تكارا ئه‌لمانيايه‌ كۆمبيت.

ئه‌ڤرۆنيوز:

كۆمبوونا هه‌ردو شاندێن مه‌كته‌بێن سياسى يێن پارتى ديموكراتى كوردستان وئێكه‌تى نيشتمانى كوردستان ئه‌وا ئه‌ڤرۆ ل ده‌مژمێر 11 سپێدێ ل سلێمانيێ ده‌ستپێكرى، هه‌تا نوكه‌ يا به‌رده‌وامه‌.

شاندێ پارتى پێكهاتيه‌ ژ فازل ميرانى سكرتێرێ مه‌كته‌با سياسى، هشيار زێبارى، رۆژ نورى شاوه‌يس، جه‌عفه‌ر ئيبراهيم، مه‌حمود محه‌مه‌د، عارف ته‌يفوور وزه‌عيم عه‌لى.

 شاندێ ئێكه‌تيێ ژى پێكهاتيه‌ ژ حاكم قادر، عومه‌ر فه‌تاح، سه‌عدى ئه‌حمه‌د پيره‌، ئه‌رسه‌لان بايز، عيماد ئه‌حمه‌د، شوره‌ش ئيسماعيل، رزگار عه‌لى وبافل تاله‌بانى.

كۆمبوون يا تايبه‌ته‌ ب بريارا دووماهيێ ل دۆر پرۆژێ سياسى دناڤبه‌را پارتى وئێكه‌تيێ دا بۆ رێككه‌فتنێ ل سه‌ر چاوانيا حوكمرانيێ ل هه‌رێما كوردستانێ دچار سالێن داهاتى دا، زێده‌بارى پرسا كه‌ركووكێ وهه‌لويستێ هه‌ردو حزبان ل به‌غدا.

ئه‌ڤرۆنيوز:

سه‌رۆكێ ليستا پارتى ديموكراتى كوردستان، هێمن هه‌ورامى ئه‌ڤرۆ پێنجشه‌مبى 14/2/2019 دكۆنگره‌كێ رۆژنامه‌ڤانى دا راگه‌هاند، كۆمبوونا په‌رله‌مانێ كوردستانێ 100% ل 18/2/2019 دێ هێته‌ ئه‌نجامدان.

هێمن هه‌ورامى گۆت ژى” پارتى وئێكه‌تيێ ژبلى رێككه‌فتنێ چو به‌ديله‌كێ دى نينه‌”. دياركر ژى” ئه‌م به‌رده‌وام ل گه‌ل گيانێ پێكڤه‌بوون وته‌باييێ ودانوستاندنێ داينه‌، ل گه‌ل وێ چه‌ندێ نه كو‌ كێشه‌ ب دانوستاندنێ بهێنه‌ چاره‌كرن، ب ديتنا مه‌ ماده‌م پارتى وئێكه‌تى ل رۆژا 5/2/2019 رێككه‌فتنه‌ك ئيمزاكريه‌، وه‌كو دو هێزێن مه‌زن وسه‌ركه‌فتيێن ئێكێ ودويێ يێن رێككه‌فتين ل سه‌ر وێ چه‌ندێ كومبوونا 18 ڤێ هه‌يڤێ بهێته‌ ئه‌نجامدان، له‌وما ئه‌م وه‌كو پارتى دپێگيرين ب وێ ئێكێ كۆمبوونا رۆژا 18 هه‌يڤێ بهێته‌ كرن ودێ بينين كو 100% ئه‌و كۆمبوون دێ هێته‌ كرن”.

هێمن هه‌روامى خوياكر” كۆمبوونا په‌رله‌مانى به‌رى نيڤرۆيا رۆژا دوشه‌مبيا داهاتى دێ هێته‌ ئه‌نجامدان وفراكسيۆنێن په‌رله‌مانى چاڤه‌رێ بريارا مه‌كته‌بێن سياسى يێن حزبێن خوه‌ دكه‌ن، سوباهى ژى دێ روونشتنه‌كا گرنگ دناڤبه‌را پارتى وئێكه‌تيێ دا هێته‌ ئه‌نجامدان ودڤێت رێككه‌ڤين، چونكى ژبلى رێككه‌فتنێ  چو رێيه‌كا دى ل به‌ر مه‌ نينه‌، له‌وما پێدڤيه‌ ئه‌و رێككه‌فتنه‌ بهێته‌ كرن ودووماهى ب ڤێ ره‌وشێ بهێت، كو فراكسيۆنێن په‌رله‌مانى بۆ مه‌ره‌ما سياسى دكه‌ن”.

دياركر ژى” پۆستێ سه‌رۆكێ په‌رله‌مانى دێ بۆ ئێكه‌تيێ بيت وجێگرێ ئێكێ يێ سه‌رۆكێ په‌رله‌مانى دێ بۆ پارتى بيت وجێگرێ دويێ يێ سه‌رۆكێ په‌رله‌مانى دێ بۆ پێكهاتێ توركمانى بيت”.

ل دۆر رێككه‌فتنا دناڤبه‌را پارتى وئێكه‌تيێ دا، گۆت” مه‌ پێخوه‌شه‌ ئه‌ڤرۆ بهێته‌ ئيمزاكرن، ب پشت راستى ڤه‌ هه‌كه‌ بكه‌ڤيته‌ پشتى 18هه‌يڤێ، دێ هه‌ر هێته‌ ئيمزاكرن، چونكى مه‌ وئێكه‌تيێ ژبلى رێككه‌فتنێ چو به‌ديلێن دى نينن”.

ئه‌ڤرۆنيوز:

ئه‌ندامه‌كێ شاندێ دانوستاندكارێ پارتى ديموكراتى كوردستان ئه‌ڤرۆ پێنجشه‌مبى 14/2/2019 راگه‌هاند، ئه‌م ل گه‌ل بزاڤا گۆران گه‌له‌ك يێن نێزيك بووين وئه‌ندامه‌كێ شاندێ بزاڤا گۆران ژى هيڤى خواست دڤێ حه‌فتيێ دا مزگينيا خوه‌ش بده‌نه‌ خه‌لكى.

پشتى كۆمبوونا هه‌ردو شاندێن پارتى ديموكراتى كوردستان وبزاڤا گۆران ئه‌ڤرۆ ل هه‌ولێرێ، مه‌حمود محه‌مه‌د ئه‌ندامێ شاندێ دانوستاندكارێ پارتى بۆ پێكئينانا كابينا نوو يا حوكمه‌تا هه‌رێما كوردستانێ وپه‌يڤدارێ پارتى دكۆنگره‌كێ رۆژنامه‌ڤانى دا راگه‌هاند” كۆمه‌كا بابه‌تان هاتبوونه‌ به‌رهه‌ڤكرن بۆ كۆمبوونا ئه‌ڤرۆ پێنجشه‌مبى دناڤبه‌را پارتى وگۆران ل سه‌ر چاوانيا دروستكرنا هه‌ڤپشكيێ دحوكمه‌تا نوو دا”.

په‌يڤدارێ پارتى دياركر ژى كو ل دووڤ پتريا دانوستاندنێن دناڤبه‌را پارتى وگۆران دا هاتينه‌ ئه‌نجامدان، پێشبينيێ دكه‌ت گه‌له‌ك نێزيك ببن ژ گۆران.

خوياكر ژى

” دێل رۆژا شه‌مبيا داهاتى ژى جاره‌كادى ل گه‌ل گۆران كۆمبين”.

ژلايێ خوه‌ڤه‌ ئاراس وه‌لى، ئه‌ندامێ جڤاتا نيشتمانى يا گۆران وئه‌ندامێ شاندێ دانوستاندكارێ گۆران دكۆنگرێ رۆژنامه‌ڤانى دا راگه‌هاند كو يێ هيڤداره‌ دڤێ حه‌فتيێ دا مزگينيا خوه‌ش بده‌نه‌ خه‌لكى وگۆت” ب ديتنا مه‌ ئه‌و به‌رنامێ چاكسازيا حوكمه‌تێ هه‌ى، ببه‌ين بۆ په‌رله‌مانى، براده‌رێن پارتى ژى ل گه‌ل چو خالان ناكۆكى نه‌بوو”.

ئاشكراكر ژى” بۆ بابه‌تێ به‌لاڤكرنا پۆستان، مه‌ گاڤێن باش يێن هاڤێتين، به‌لێ مه‌ پێدڤى ب وێ چه‌ندێ هه‌يه‌ دانوستاندنێ ل گه‌ل خانا راپه‌راندنێ وجڤاتا نيشتمانى يا گۆران بكه‌ين”.