ئەڤرۆ نیوز، رێوار مزیری:

ب هەلکەفتا هاتنا سەرێ سالا نوو رێڤەبەریا گشتی یا گەشت و گۆزارێ ل پارێزگەها دهۆکێ دێ ئەڤ شەڤە ل دەمژمێر 9:00 ئاهەنگەکا مەزن ب پشکداریا چەندین هونەرمەندان ل پارکا نەورۆز یا دناڤ سەنتەرێ باژێرێ دهۆکێ دا گێریت.

شەمال جەعفەر، رێڤەبەرێ کاروبارێن پشکنینێ ل رێڤەبەریا گشتی یا گەشت و گۆزارێ ل پارێزگەها دهۆکێ بۆ ئەڤرۆ نیوز دیار کر کو هەموو بەرهەڤی بۆ گێرانا ئاهەنگا سەرێ سالا 2019 ێ ژ ئالیێ رێڤەبەریا گشتی یا گەشت و گۆزارێ ل پارێزگەها دهۆکێ ڤە هاتینە کرن و گۆت: “هەر ئێک ژ هونەرمەندان (عەبدولقەهار زاخۆلی، لوجین ئەلحەنین، ئەحمەد زێباری، ئاشڤان فەرەج) و هەلبەستڤان (بورهان زێباری) و تیپا شاریا یا هونەرێ مللی دێ د ڤێ ئاهەنگێ دا د پشکدار بن”.

ناڤهاتی ئاماژە دا وێ چەندێ کو د هەمان ئاهەنگ دا دێ چەندین کەس ب جلکێن بابانۆئێلان دیاریان ل سەر زارۆیێن ل ئاهەنگێ ئامادەدبن بەلاڤکەن، هەروەسا ل چرکێن دووماهیێ یێن سالا 2018ێ دێ یاریێن ئاگری هێنە هاڤێتن.

ئەڤرۆ نیوز، قائید میرۆ:
پۆلیسێن پارێزگەھا ھەولێرێ ئامارێن ئەڤ سالە یێن سنوورێ ھەولێرێ بەلاڤکرن و ل گورەی ئامارێ ژی نێزیکی 90 حالەتێن کوشتن و خوەکوشتنا ژن و زەلامان ھاتینە تۆمارکرن و پەیڤدارێ پۆلیسان ژی دبێژیت، ئەڤ سالە رێژا تاوانان کێمبوویە.
ھۆگر عەزیز، پەیڤدارێ پۆلیسێن ھەولێرێ ئەڤرۆ رۆژا ئێک شەمبیێ د کۆنگرەکێ رۆژنامەڤانی دا ئامارا ئەڤ سالە یا تاوانێن پارێزگەھا ھەولێرێ دیارکرن کو تێدا ھاتیە” د سالا 2018 ێ نێزیکی 90 کەسان ھاتینە کوشتن، ب ڤی شێوەی 44 زەلام ھاتینە کوشتن دگەل 21 ژنان، ھەروەسا 22 ژن و زەلامان ژی خوە کوشتیە و دووماھی ب ژیانا خوە ئینایە.
پەیڤدارێ پۆلیسێن ھەولێرێ خویا کر کو د ئەڤ سالە دا 819 حالەتێن دزیێ ھاتینە تۆمارکرن و زێدەتری 100 تاوانێن دزیان تایبەت بووینە ب دزینا تڕۆمبێلان و 542 کەسان ژی ل دادگەھێ سکالا تۆماکرینە کو دزی ژ وان ھاتینە کرن و گۆت: “ھەر د ئەڤ سالە دا 846 حالەتێن شەڕکرنێ ل سنوورێ ھەولێرێ ھاتینە تۆمارکرن و 700 ژوان ھاتینە چارەکرن و ئێکلاکرن”.
ھۆگر عەزیز گۆت: “رێژا تاوانان د ئەڤ سالە دا ژ بەراورد ل گەل سالا بۆری گەلەک کێمکریە، ئەڤە ژی بۆ بجە ئینانا ئەرکێ ھێزێن ئەمنی ڤەدگەڕیت ل ھەرێما کوردستانێ، کو زێدەتر ب ئەرکێ خوە رابووینە و تاوانبار ھاتینە دەستەسەرکرن”.

ئەڤرۆ نیوز:

ل دۆر لیستا وان ھونەرمەند و رەوشەنبیر و میدیاکارێن ناڤێن وان د گەندەلیێ دا ھاتین، دەستەیا دەستپاکیا ھەرێما کوردستانێ د بەیاننامەکێ دا وان دەنگۆیان رەتدکەت و ئاشکرا دکەت کو ڤێ چەندێ پەیوەندی ب وان ڤە نینە و تشتەکێ دروستکریە.

دەستەیا دەستپاکیێ د بەیاننامەکێ دا راگەھاند کو د دەمێ بۆری دا د تۆرێن جڤاکی دا چەند لیستەک ھاتبوونە بەلاڤکرن و تێدا چەند کەسەک ب تۆمەتا گەندەلیێ تۆمەتبارکربوون و بەلاڤکربوو کو ڤەکۆلین دێ ژ لایێ دەستەیا دەستپاکیێ ڤە ل گەل وان کەسان ھێتەکرن.

د ھەمان بەیاننامە دا ھاتیە کو وێ لیستێ چو پەیوەندی ب دەستەیا دەستپاکیا ھەرێما کوردستانێ ڤە نینە و لیستەکا دروستکریە و دەستەیا دەستپاکیا ھەرێمێ دامەزراوەیەکا فەرمی یە و چالاکیێن خوە ب فەرمی و ب شێوەکێ ئاشکرا بەلاڤ دکەت ژ بەر ڤێ چەندێ ئەو دخوازن ناڤێ دەستەیا ناڤھاتی بۆ چو مەرەمان بکارنەئینن.

ئەڤرۆ نیوز، رێوار مزیری:

ب ھەلکەفتا سەرێ سالا نوو رێڤەبەریا گشتی یا رەوشەنبیری و ھونەری ل دھۆکێ ب ھەماھەنگی ل گەل رێڤەبەریا چاڤدێری و گەشەپێدانا جڤاکی ل دھۆکێ ئەڤرۆ رۆژا 30/12/2018ێ ل دەمژمێر 7:00 ئێڤاری دێ ئاھەنگەکێ بۆ زارۆیێن بێ سەمیان ل خوارنگەھا وودن ھاوس ل دھۆکێ گێڕن.
کامیران مەرعی، ژ رێڤەبەریا گشتی یا رەوشەنبیری و ھونەری ل دھۆکێ بۆ ئەڤرۆ نیوز دیار کر کو ئەڤ ئاھەنگە ب ھەلکەفتا سەرێ سالا نوو دێ بوو 52 زارۆیێن بێ سەمیان ژ کچ و کوران کو د بێ دایک و بابن و ژ ئالیێ رێڤەبەریا چاڤدێری و گەشەپێدانا جڤاکی ل دھۆکێ ڤە دھێنە ب خودانکرن ھێتە گێڕان و گۆت: د ڤێ ئاھەنگێ دا ئەڤ زارۆیە دێ شیڤەکێ پێکڤە خوون و دووڤ دا دێ چەندین دیاری ل سەر ڤان زارۆیان ھێنە بەلاڤکرن و سەرەرایی ڤێ چەندێ چەندین بڕگێن ھونەری ژی دێ د ڤێ ئاھەنگێ داھێنە ئەنجامدان، ھەروەسا چەندین ھونەرمەند ژی دێ د پشکداربن کو ئێک ژ وان ھونەرمەندان رۆمی ھەرکی یە.