ئهڤرۆنيوز:
حوكمهتا ههرێما كوردستانێ نڤيسارهكا فهرمى بۆ حوكمهتا عيراقێ ئاراستهكريه بۆ پێدانا 952 مليار دينارێن بودجا مووچێ فهرمانبهرێن كوردستانێ.
ژێدهرهكێ ئاگههدار ل سهرۆكاتيا جڤاتا وهزيرێن ههرێما كوردستانى دياركر كو حوكمهتا ههرێما كوردستانێ داخوازا بودجا سێ ههيڤێن مووچێن فهرمانبهرێن ههرێما كوردستانێ ژ بهغدا كريه.
وى ژێدهرى بۆ باس گۆت” پێدڤى بوو تاكو دووماهيا سالا 2018 بهغدا 12 بودجان بۆ مووچێ ههيڤانه يێ فهرمانبهران ل سالا 2018 بۆ ههرێما كوردستانێ هنارتبان، بهلێ ل گهل ڤێ ههيڤێ تنێ مووچێ 9 ههيڤان يێ هاتيه هنارتن”.
گۆت ژى”ژ وى گۆژمێ 317 مليار دينارێن دهاتنه هنارتن، سێ بودجه ل 2018 نههاتينه هنارتن، لهوما حوكمهتا ههرێما كوردستانێ ب نڤيسارا فهرمى داخواز كريه ل سالا 2019 ئهو گۆژمێ پارهى بۆ ههرێما كوردستانێ بهێته قهرهبووكرن”.
دياركر” چاڤهرێ دكهين بهغدا ب فهرمى بهرسڤا مه بدهت”.
ئهڤرۆنيوز:
شيرهتكارێ جڤاتا ئاسايشا ههرێما كوردستانێ مهسرور بارزانى ئهڤرۆ سێشهمبى 4/12/2018 پێشوازى ل يان كوبيچ نوونهرێ تايبهت يێ سكرتێرێ گشتى يێ نهتهوێن ئێكگرتى كر.
دديدارهكێ دا مهسرور بارزانى، بزاڤێن ين كوبيچ د لێك نێزيكرنا هێز ولايهنێن عيراقێ ب بلند نرخاند.
شيرهتكارێ جڤاتا ئاسايشا ههرێما كوردستانێ ئاماژهكر كو دهليڤهكا نوو يا هاتيه پێش بۆ ڤهكرنا بهرپهرهكێ نوو يێ پهيوهنديان وچارهكرنا ههموو كێشێن دناڤبهرا بهغدا وههولێرێ.
مهسرور بارزانى پشتهڤانيا ههرێما كوردستانێ بۆ پێنگاڤێن سهرۆك وهزيرێن عيراقێ وپێكڤه كاركرنێ دياركر.
نوونهرێ تايبهت يێ سكرتێرێ گشتى يێ نهتهوێن ئێكگرتى ل عيراقێ سوپاسيا مهسرور بارزانى كر بۆ پێشكێشكرنا رێنمايان وهاريكارى وئاسانكارىان، ههروهسا خوهشحاليا خوه ب بريارا دهستنيشانكرنا مهسرور بارزانى بۆ سهرۆكاتيا كرنا كابينا نوو يا حوكمهتا ههرێما كوردستانێ دياركر وهيڤيا سهركهفتنێ دوى ئهركى دا بۆ خواست ودياركر كو كارێ سهرهكى يێ نهتهوێن ئێكگرتى ل عيراقێ هاريكاريكرنه ل چارهسهركرنا كێشێن دناڤبهرا بهغدا وههولێرێ ب تايبهتى كێشێن گرێداى مادێ 140 يێ دستوورى وئاماژه كر كو نوونهراتيا نهتهوێن ئێكگرتى ل سهر وى بابهتى دئهركێ خوه دا دێ بهرهوام بيت.
ئەڤرۆ نیۆز:
جوبران باسیل وەزیرێ دەرڤە یێ لوبنانێ ل گەل شاندەکێ بەری دەمەکێ گەهشتنە هەولێرێ و بریارە ل گەل سەرۆک بارزانی و نێچیرڤان بارزانی کۆم ببن.
هاتە زانین کو وەزیرێ دەرڤە یێ لوبنانێ و شاندێ ل گەل دێ ل دۆر پرسێن گرێدایی هەرێمێ و پێشڤەبرنا پەیوەندیێن هەر دو ئالیان ل گەل سەرۆک بارزانی و نێچیرڤان بارزانی دانوستاندنان کەن.
سەفین دزەیی پەیڤدارێ حوکمەتا هەرێما کوردستانێ ژی راگەهاند کو شاندێ لوبنانێ دێ بۆ پێشڤەبرنا پەیوەندیێن ئابووری و سیاسی ل گەل هەرێما کوردستانێ دانوستاندان کەن و بزاڤ ژی دهێنە کرن کو پەیوەندیێن هەرێما کوردستانێ و لوبنانێ بەر ب پێشڤە بچن.
ئەڤرۆ نیوز، رەمەزان رێکانی:
د دو رێورەسمێن جودا دا ل رۆژا ٣/١٢/٢٠١٨ ھاریکارێ سەرۆکێ زانکۆیا دھۆک بۆ کاروبارێن زانستی و خواندنا بلند د. سەباح ئیبراھیم وەیسی ھاتە گوھۆڕین و ل جھێ وی د. لوقمان ھادی حەسەن ھاتە دانان، ھەروەسا د. کەرەڤان محەمەد راگرێ کۆلیژا زانستێن مرۆڤایەتی ل زانکۆیا دھۆک ھاتە گوھۆڕین و ل جھێ وی د. مزگین محەمەد حەسەن دەست ب کاربوو، د. ئیحسان تەوفیق راگرێ کۆلیژا پەروەردا بنیات ئامێدیێ ھاتە گوھۆڕین و ل جھێ وی د. کەرەڤان محەمەد ل جھێ وی دەست بکار بوو.
پ. د. مسلح دھۆکی، سەرۆکێ زانکۆیا دھۆک سوپاسیا د. سەباح ئیبراھیم کر کو بۆ دەمێ چار سالان خزمەت د ڤی پوستی دا کری و پەسنا رۆلێ وی کر، ھەروەسا داخازا سەرکەفتنێ بۆ د. لوقمان ھادی حەسەن کر د کارێ وی یێ نوو دا، د. سەباح ئیبراھیم ژی سوپاسیا سەرۆکێ زانکۆیێ کر کو یێ ھاریکار بوو د دەمێَ ئەو د پوستێ ھاریکارێ سەرۆکێ زانکۆیا دھۆک بۆ کاروبارێن زانستی و خواندنا بلندا و ئامادەیا خۆ ژی دیارکر کو یێ ھاریکار بیت دگەل د. لوقمان ھادی د کارێ وی یێ نوو دا.
ژ ئالیێ خوە ڤە د. کەرەڤان محەمەد پیرۆزباھی ل ل راگرێ نوو د. مزگین محەمەد کر و داخوازا سەرکەفتنێ بۆ د کارێ وی دا خواست و بەرھەڤیا خوە دیار کر کو یێ ھاریکار بیت دگەل دا، ھەروەسا د. مزگین محەمەد سوپاسیا د. کەرەڤانی کر بۆ دەمێ بۆری خزمەتا کۆلیژا زانستێن مرۆڤایەتی کری.
ئەڤرۆ نیوز، رێوار مزیری:
جێگرێ پارێزگارێ دھۆکێ بۆ ئەڤرۆ نیوز دیار کر کو ملیۆن دۆلار ژ پارێ پەترۆ دۆلار د گەڕا چارێ دا گەھشتنە گەنجینا پارێزگەھا دھۆکێ و گۆت: “62 کۆمپانیێن کار د پرۆژێن حوکمەتێ دا کری دێ مفای ژ ڤی پارەی وەرگرن”.
ئەندازیار ئوسمان یونس، جێگرێ پارێزگارێ دھۆکێ ئاشکرا کر کو بەری نوکە حوکمەتا ھەرێمێ سێ جاران پارێ پەترۆ دۆلار بۆ پارێزگەھا دھۆکێ فرێکریە کو ھەر جارێ ملیۆن دۆلار بوون و ل دووماھیا ھەیڤا بۆری ژی حوکمەتا ھەرێمێ د گەڕا چارێ دا ملیۆن دۆلار ژ پارێ پەترۆ دۆلارێ ھنارتنە گەنجینا پارێزگەھا دھۆکێ و گۆت: “62 کۆمپانیێن کار د پرۆژێن حوکمەتێ دا کری دێ مفای ژ ڤی پارەی وەرگرن و چەندین پرۆژە دێ ب ڤی پارەی ھێنە تمامکرن”.
ناڤھاتی ئاماژە دا وێ چەندێ کو ب ھنارتنا ڤی پارەی دێ شەش ملیۆن دۆلارێن بەلێندەران وەکو قەر ل دەف حوکمەتا ھەرێما کوردستانێ مینن و ھەکە حوکمەت وی پارەی ژی ب ھنێریت ب دیتنا وی دێ پرۆژە ب دووماھی ھێن و بەلێندەر ژی دێ پارێ خوە ب تمامی وەرگرن.
ئهڤرۆ نیوز:
سهندیكا نۆشدارێن عیراقێ بڕیار دا ههموو نۆشدار ئێدی دهرمانان بۆ نهخۆشان ب دهست نهنڤیسن و دڤێت بهێته تایبكرن و چاپكرن.
سهندیكا نۆشدارێن عیراقێ دروونشتنا خوه یا ژماره 40 ل رێكهفتی 1/12/2018 بڕیار دایه نۆشدار دهرمانان ب رێیا چاپكرنێ بۆ نهخۆشان بنڤیسن و ناهێته قهبوولكرن نوشدار ب دهسنڤیس دهرمانان بۆ نهخۆشان بنڤیسن پشتی 1/3/2019 و ل سهر ههموو دهرمانخانان پێدڤیه دهرمانان نهدهنه نهخۆشان ههكه ب دهستنڤیس بۆ هاتبنه دیاكرن.
ئهڤ بڕیارا سهندیكا نۆشدارێن عیراقێ پشتی وێ یهكێ هاته كو هژمارهكا سكالا ل سهر ب زهحمهت خواندنا دهستنڤیسێ نۆشداران هاتبوون.
ئەڤرۆ نیۆز، قائید میرۆ:
دوھی وەلاتێ قەتەرێ بەلافکر کو بڕیارە ل سالا ٢٠١٩ێ خوە ژ رێکخراوا ئوپێک ڤەکێشیت و شارەزایەک ژی ئاشکرا دکەت، کو پێشبینی دھێتەکرن ھەتا سێ سالێن داھاتی رێکخراوا ئۆپێک ب ئێکجاری بھێتە ھەلوەشاندن.
سعود ھاشم، سەرۆکێ پەیمانگەھا کوردستان بۆ وزێ بۆ ئەڤرۆ نیۆز گۆت: “ھەڤڕکیێن سیاسیێن وەلاتێن کەنداڤ، ب تایبەتی ئاریشەیێن د ناڤبەرا سعودیێ و قەتەر دا، ھەروەسا ئیمارات ل گەل بەحرێن رەنگڤەدان ھەبوویە ل سەر رێکخراوا ئۆپێک ب شێوەیەکی ھەر ئێک ژ سعودی و رۆسیا بۆ کێمکرنا پشکا بەرھەمێ وەلاتان ناڤەگەڕینن بۆ بڕیارێن ئەندامێن رێکخراوا ئۆپێک د گەل ڤێ چەندێ ژی قەتەر وەکو پەیامەکا سیاسی بۆ نەیارێن خوە ل کەنداڤی بڕیارا خوە ڤەکێشانێ ژ رێکخراوا ئۆپێک دەرکریە”.
سەرۆکێ پەیمانگەھا کوردستان گۆتژی: “ھەر چەندە رێژەیا ھنارتنا پەترۆلا وەلاتێ قەتەر ب تنێ ٥٠٠ ھزار بەرمیلن، ئەڤە ژی رێژەکا زۆر نینە، بەلێ دیسان بۆ ھەڤسەنگیا بازاڕێ پەترۆلێ ھژمارەکا زۆرە و دەمژی یێ گونجای نینە”.
سعود ھاشم ئاشکرا کر ژی کو ب دیتنا وی ھەتا سێ سالێن دی، رێکخراوا ئوپێک دێ ھێتە ھەلوەشاندن، ھەتا جەمسەربەندیا نێڤدەولەتی ژی رۆل دێ ھەبیت بۆ دووبارە چێبوونا دەزگەھەکێ دی یێ نوو، ب گورەیی ھەڤکێشێن سیاسی یێن ھەرێمی و نێڤدەولەتی دێ بنە جھگرتنا ئۆپێکێ.
ئهڤرۆ نيوز، نيوار محهمهد سهليم:
سهرۆكاتيا جڤاتا نوونهرێن عيراقێ راگههاند كو ئهڤرۆ رۆژا سێشهمبى و ل دانێ نيڤرۆ دێ دهنگدان ل سهر تهمامكرنا كابينا عادل عهبدولمههدى هێته دان.
ب گۆرهيى بهرنامێ كارێ جڤاتا نوونهران دێ بهرچاڤكرنا بابهتێ دانوستاندنێ بيت ل دۆر پێكئينانا لژنهكێ د دهربارێ بهرههڤكرنا لژنهكێ بۆ دووڤچوونا بهلاڤكرنا وزێ و دهنگدان ل سهر پێكئينانا حوكمهتێ.
بڕياره پشتى دهمهكێ كێم كۆمبوونا جڤاتا نوونهرێن عيراقێ ب رێڤه بچيت و پارتى ديموكراتى كوردستان ژى راگههاند كو ئهو دێ دهنگى دهنه ههر ههست وهزيرێن كابينا عهبدولمههدى يێن سيڤى يێن وان گههشتينێ.
هندرين لهزگين دۆسكى، ئهندامێ فراكسيۆنا پارتى ديموكراتى كوردستان ل جڤاتا نوونهرێن عيراقێ، د داخۆيانيهكێ دا بۆ ئهڤرۆ نيوز گۆت: “مه وهكو فراكسيۆنا پارتى ديموكراتى كوردستان كۆمبوونهك كر و تێدا ل سهر وێ چهندێ رێكهفتين كو دهنگى بدهينه ههموو وهزيرێن ماين يێن كابينا عهبادى ئهوێن سى ڤى يێن وان بۆ نوونهران هاتين”.
زێدهتر گۆت: “ههكه گوهۆڕينهك د ليستا ناڤان دا چێبوو ل وى دهمى، دێ مه وهكو فراكسيۆنا پارتى ديموكراتى كوردستان ههلويستهكێ دى ههبيت، بهلێ ب زهحمهت تشتهكێ وهسان ههبيت، چونكو ههكه تشتهكێ وهسان ههبايه، دا سى ڤى يێ وان گههيته نوونهران”.
ژ لايهكێ دى ڤه، د. ديار تهيب، ئهندامێ جڤاتا نوونهرێن عيراقێ ل سهر فراكسيۆنا پارتى ديموكراتى كوردستان بۆ ئهڤرۆ نيوز گۆت: “ئێكهتى و سائيرون بزاڤ دكرن كو بهربژارێ ئێكهتيێ بۆ پۆستێ وهزارهتا داد بهێته كانديد كرن، بهلێ ئهو بزاڤ د بێ بنهما بوون و نها ناڤێ بهربژارێ پارتى بۆ وى پۆستى يێ هاتى”.
زێدهتر گۆت: “نوونهر ههموو ل سهر وێ چهندێ يێن رێكهفتين، كو دهنگى ب ههر ههشت وهزيران بدهن، ههر چهنده دێ ئێك ئيكه كهڤنه بهر دهنگدانێ، بهلێ بڕياره دهنگدان ب ههموو كابينێ بهێته دان و ههر ههشت وهزير باوهريا جڤاتا نوونهران وهرگرن”.
پێشبينى ژى دهێته كرن كو كۆمبوونا جڤاتا نوونهران ژ ئهگهرێ تهمامنهبوونا رێژا قانوونى يا ئهندامێن جڤاتا نوونهران بهێته پاشخستن، ژ بهر كو لايهنێن نهرازى يێن ههين و ناخوازن بچنه ناڤا هۆلا جڤاتا نوونهران.
بڕياره جڤاتا نوونهران دهنگدانێ ل سهر وهزارهتێن بهرهڤانى، ناڤخۆ، رهوشهنبيرى، پهروهرده، داد، پلاندانان، خواندنا بلند و كۆچبهران بدهت.
ب گۆرهيى ئهو پێزانينێن ل بهر دهست عهبدولمههدى دێ ههر ئێك ژ فالح فهياز وهكو وهزيرێ ناڤخۆ و فهيسهل فهنهر جهربا وهزيرێ بهرهڤانيێ و دادوهر دارا نورهدين وهزيرێ داد و سهبا تائى وهزارهتا پهروهردێ و قوسهى سههيل وهزيرێ خواندنا بلند و ڤهكۆلينێن زانستى و عهبدولئهمير حهمدانى وهزيرێ رهوشهنبيرى و نورى دلێمى وهزيرێ پلاندانانێ و ههنا كوركيس وهزيرا كوچ و كۆچبهران.
نيشاندان