ئه‌ڤرۆنيوز:

ئه‌ڤرۆ ئێكشه‌مبى 9/12/2018 ده‌زگه‌هێ بارزانى يێ خێرخوازى ل سه‌ر راسپاردا سه‌رۆك بارزانى، هاريكاريێن ب له‌ز گه‌هاندنه‌ كه‌مپا نه‌مروود يا ئاواران ل نێزيك مووسل.

كه‌مپێن پارێزگه‌ها نه‌ينه‌وا ب تايبه‌ت كه‌مپێن سه‌لاميه‌ نه‌مروود وجه‌دعه‌ وچه‌ند كه‌مپێن دى زيانێن مه‌زن گه‌هشتنێ ژ ئه‌گه‌رێ بارانێن زۆر يێن چه‌ند رۆژێن بۆرى.

ده‌زگه‌هێ بارزانى يێ خێرخوازى هاريكارى گه‌هاندنه‌ پشكه‌ك ژ ئاوارێن پارێزگه‌ها نه‌ينه‌وا كو ئاكنجيێن كه‌مپا نه‌مروودن ل نێزيك مووسل، پشتى كو قايمقامێ مووسل داخواز ژ سه‌رۆك بارزانى كرى كو ده‌ستێ هاريكاريێن هه‌رێما كوردستانێ بۆ درێژ بكه‌ت.

ئه‌ڤرۆنيوز:

په‌يڤدارێ وه‌زاره‌تا كار وكاروبارێن جڤاكى ل هه‌رێما كوردستانێ راگه‌هاند، پشتى تۆماركرنا سكالايا وان كێم ئه‌ندامێن دپشكنينا نوشدارى دا ده‌رنه‌چووين، بريار هاته‌ دان دووباره‌ پشكنين بۆ بهێته‌ كرن.

موسلح عومه‌ر، په‌يڤدارێ وه‌زاره‌تا كا وكاروبارێن جڤاكى گۆت”پشتى كو ئه‌نجامێ پشكنينا كێم ئه‌ندامان هاتيه‌ راگه‌هاندن وژبه‌ركو هژماره‌كا زۆر ژ كێم ئه‌ندامان دپشكنينێ دا ده‌رنه‌چوون، يان رێژا كێم بۆ هاتبوو دانان، وان كێم ئه‌ندامان سكالا تۆمار كربوو”.

ئاماژه‌كر” هه‌رچه‌نده‌ هه‌تا مووچێ ڤێ هه‌يڤێ كار ب ئه‌نجامێ پشكنينێ نه‌هاتيه‌ كرن وهه‌موو كێم ئه‌ندامان ب ليستا هه‌يڤێن بۆرى دێ مووچه‌ى وه‌رگرن، به‌لێ ئارمانجا كارێ پشكنينێ بۆ وێ چه‌ندێ يه‌ ليسته‌كا نوو يا كێم ئه‌ندامان بۆ مووچه‌ى بهێته‌ دروستكرن”.

گۆت ژى” پشتى گه‌هاندنا سكالايا كێم ئه‌ندامان، وه‌زاره‌تا ساخله‌ميێ برياردا پشكنينێ دوباره‌ بكه‌ت بۆ هه‌موو وان كێم ئه‌ندامين دپشكنينێ دا ده‌رنه‌چووين، يان رێژا كێم بۆ هاتيه‌ دانان وبۆ ڤێ مه‌ره‌مێ ژى رێڤه‌به‌ريێن گشتى يێن ساخله‌ميێ هاتينه‌ راسپاردن كو دوباره‌ لژنه‌ ده‌ست ب كارێ پشكنينا كێم ئه‌ندامان بكه‌ن”.

ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى ئه‌ڤرۆ ئێكشه‌مبى 9/12/2018 پێشوازى ل جۆن وێلكس باليۆزێ بريتانيا ل عيراقێ كر

دديداره‌كێ دا كو مارتن وار كونسۆلێ بريتانيا ل هه‌رێما كوردستانێ به‌رهه‌ڤ بووى، دووماهى پێشهاتێن ده‌ڤه‌رێ وبزاڤ وگاڤێن پێكئينانا حوكمه‌تا هه‌رێما كوردستانێ وهاتنا قۆناغه‌كا نوو يا په‌يوه‌نديێن دناڤبه‌را هه‌ولێرێ وبه‌غدا هاته‌ به‌حسكرن.

مه‌سرور بارزانى، قرناغا نوو يا په‌يوه‌نديێن دناڤبه‌را هه‌ولێرێ وبه‌غدا ب ڤه‌كرنا به‌رپه‌ره‌كێ نوو هژمارت وهيڤى خواست دپاشه‌رۆژه‌كا نێزيك ب رێيا دانوستاندنه‌كا ئاڤاكر پرسێن هه‌لاويستى بهێنه‌ چاره‌كرن وده‌ليڤه‌ بۆ چه‌سپاندنا ئاشتيێ وپێشخستنا وه‌لاتى ودابينكرنا خزمه‌تگوزاريێن بنه‌ره‌تى بهێته‌ دان.

باليۆزێ بريتانيا زێده‌بارى پێرۆزباهيكرنێ ل مه‌سرور بارزانى ب هه‌لكه‌فتا به‌ربژاركرنا وى بۆ پۆستێ سه‌رۆكاتيا حوكمه‌تا هه‌رێما كوردستانێ، هيڤيا سه‌ركه‌فتنێ بۆ خواست ودووپات كر كو وه‌لاتێ وى دێ هاريكار بيت كو ل هه‌رێما كوردستانێ ئاڤه‌دانى وپێشكه‌فتنا زێده‌تر ب خوه‌ڤه‌ ببينيت.