هه‌ڤپه‌يمانيا نيڤده‌وله‌تى پێگيريێ ب هه‌ماهه‌نگيێ ل گه‌ل هه‌رێما كوردستانێ دووپات دكه‌ت
ئه‌ڤرۆنيوز:
دديداره‌كێ دا ل گه‌ل شيره‌تكارێ جڤاتا ئاسايشا هه‌رێما كوردستانێ، فه‌رماندێ نوو يێ هێزێن هه‌ڤپه‌يمانان ل عيراقێ، پێگيريێ هه‌ڤپه‌يمانيا نێڤده‌وله‌تى ب هاريكاريێ وهه‌ماهه‌نگيێ ل گه‌ل هه‌رێما كوردستانێ وهێزا پێشمه‌رگه‌ى دووپات كر.
ئه‌ڤرۆ چارشه‌مبى 28/3/2018، مه‌سرور بارزانى شيره‌تكارێ جڤاتا ئاسايشا هه‌رێما كوردستانێ پێشوازى ل جه‌نه‌رال (وولته‌ر پابێت) فه‌رماندێ گشتيێ نوو يێ هێزێن هه‌ڤپه‌يمانان ل عيراقێ كر.
دوێ ديدارێ دا، دانوستاندن ل سه‌ر دووماهى پێشهاتێن ده‌ڤه‌رێ وبه‌رده‌ميا هه‌ماهه‌نگيا هه‌ردو ئاليان ل شه‌رێ دژى تيرۆرێ وپێشخستنا په‌يوه‌نديێن دو ئالى هاته كرن.
مه‌سرور بارزانى داخوازا سه‌ركه‌فتنێ بۆ جه‌نه‌رال پابێت دپۆستێ خوه يێ نوو دا خواست ودياركر كو هه‌رێما كوردستانێ ب هه‌موو شيانێن خوه ل به‌ره‌يێ شه‌رێ دژى تيرۆرستان دا دێ مينيت.
مه‌سرور بارزانى دلگرانيا خوه ژ سه‌رهلدانا چالاكيێن تيرۆرستان ل هنده‌ك ده‌ڤه‌رێن عيراقێ وده‌ڤه‌رێ كوردستانى يێن ده‌رڤه‌ى ئيدارا هه‌رێمێ دياركر وب پێدڤه زانى كو هه‌ر چ زووتره، ب هه‌ڤكارى وهه‌ماهه‌نگيێ ل گه‌ل هه‌رێما كوردستانێ ئاليێن نێڤده‌وله‌تى وعيراقى ره‌وشا وان ده‌ڤه‌ران بهێته ئاساييكرن وهه‌موو ئه‌و ئه‌گه‌رێن سياسى وئابوورى وئيدارى بهێته لادان كو رێخوه‌شكه‌ر بوون بۆ سه‌رهلدانا توندوتيژيێ وگه‌شه‌كرنا گرۆپێن تيرۆرستى.
د به‌رامبه‌ر دا، فه‌رماندێ گشتيێ هێزێن هه‌ڤپه‌يمانان ل عيراقێ پێگيريا هه‌ڤپه‌يمانيا نێڤده‌وله‌تى بۆ هاريكاريێ وهه‌ماهه‌نگيێ ل گه‌ل هه‌رێما كوردستانێ وهيزا پێشمه‌رگه‌ى دووپاتكر وراگه‌هاند” هه‌رێما كوردستانێ پێگه‌هه‌كێ كاريگه‌ر يێ هه‌ى ووه‌كو فاكته‌ره‌كێ سه‌قامگير ل ده‌ڤه‌رێ جهێ پێزانينا هه‌ڤپه‌يمانانه”.
جه‌نه‌رال پابێت هيڤى خواست كو ب هه‌ماهه‌نگيا هه‌موو ئاليه‌كى رێ ل سه‌رهلدانا توندوتيژيێ بهيته گرتن وسه‌ركه‌فتنا دشه‌رێ دژى تيرۆرستان دا، دێ ب سه‌ركه‌فتنا ئاشتيێ وسه‌قامگيريێ ب دووماهى هێت.