سعوديێ گه‌فێن شه‌رى ل گه‌ل قه‌ته‌ر دكه‌ت
ئه‌ڤرۆ نيوز، فاتما مزوورى:
سعوودى گه‌فا بكارائينانا هێزێ ل دژی وه‌لاتێ قه‌ته‌ر دكه‌ت، هه‌كه هات و وی وه‌لاتی سیسته‌مێ به‌ره‌ڤانیا مووشه‌كێن س400 ژ رۆسیا وه‌ربگريت.
ل گۆر نووچه‌یه‌كێ رۆژناما “لو مۆندو” يا فره‌نسی، ریازێ داخواز ژ سه‌رۆكێ فرانسا ئێمانوێل ماكرۆن كریه كو ژ بۆ پاراستنا ئارامیێ رێگریێ ل هه‌ولا قه‌ته‌رێ یا كرینا سیسته‌مێ به‌ره‌ڤانیێ س400 بكه‌ت، هه‌كه نه سوودى دێ بژارده‌یا له‌شكری بكار ئينيت.
د خزيرانا 2017ێ دا سوودیێ، به‌حرێن، ئیماراتا عە‌ره‌بی و مسرێ ب بهانه‌یا “پشته‌ڤانیكرنا ل گرۆپێن تيرۆرستی و ئیرانێ” پێوه‌ندیێن دبلۆماسی ل گه‌ل قه‌ته‌ر بڕین و ئەو وه‌لات خسته دبن دۆرپێچێ دا.
د به‌رسڤا وێ پێنگاڤێ دا، قه‌ته‌رێ رۆسیا وه‌ك دۆسته‌كێ نوو ده‌ستنیشان كر و د ده‌ستپێكا ئه‌ڤساله دا ژی بالیۆزێ قه‌ته‌رێ یێ ل مۆسكۆ راگه‌هاند كو دانوستاندنێن وان ل گه‌ل رۆسیا ژ بۆ كرینا سیسته‌مێ مووشه‌كی يێ س400 گه‌هیشتينه قووناغه‌كا پێشكه‌فتى.