فراكسیۆنا پارتی دیموكراتی كوردستان راگەهاندنەک بەلاڤکر
ئەڤرۆ نیوز ، تۆڤی :
فراكسیۆنا پارتی دیموكراتی كوردستان ل پەرلەمانێ كوردستانێ راگەهاندنەک بەلاڤ كریە و تێدا هاتیە ، کو هەولدان بۆ ڕەتكرنا دەنگێن تایبەت بێ ڕێزی كرنە ل بەرامبەر ئێك ژ مەزنترین پیرۆزیێن گەلێ مە.
د وێ راگەهاندنێدا هاتیە ، پشتی هەلبژارتنێن جڤاتا نوونەرێن عێراقێ ب جۆرەکێ كەفتیە، كو ئەم هەموو كێم یان زۆر ل بەرامبەر وان ئەنجامێن هاتینە ڕاگەهاندن نیگەران بووین ، بەلێ دەربڕینا نیگەرانی و تانەدانێ ل ئەنجامان ، رێکارێن خوە یێن قانوونی هەیە و پێدڤیه ل بەر ڕۆشنایا قانوونێن هاتینە كارپێكرن یێن تایبەت ب هەلبژارتن و دامودەزگەهێن تایبەت ب هەڵبژارتنان پێنگاڤ بهێنە هاڤێتن ، بەرۆڤاژی پێنگاڤان دێ بنە سیاسی و دێ بهایێ قانوونی ژ دەست دەن.
ئەم ژ فراكسیۆنا پارتی دیموكراتی كوردستان ل پەرلەمانێ كوردستانێ رادگەهینین، ئەو بزاڤێن ژ پێناڤی ڕەڤاندنا گومانان هاتینە دان، ب ئاراستەیێ خراپدا برینە ، ب جۆرەکێ كو هەرێما كوردستانێ كریە ئارمانج و ب رێیا دروستكرنا گومانێ ، بزاڤا ڕەتكرنا دەنگێن تایبەت دهێتە دان ، كو دەنگێ هێزێن پێشمەرگەی و هێزێن نافخوە نە ، ئەو هێزن كو قارەمانانە وەلاتێ مە ژ تیرۆر و تەقاندنێ پاراستیە و ژ پێناڤی هندێ خوێنەکا زۆر بەخشیە ، ئەڤێ بڕیارێ نە درووست و نەهەق دەرهەقێ ب وان هێزان و ب رۆلێن گەلێ كوردستانێ دزانین ، راگەهاندنا فراكسیۆنا پارتی دبێژیت:.
د وێ راگەهاندنێدا ئەو چەند خستیە بەرچاڤ ، کو هندەك لایەنێن سیاسی یێن كوردستانێ ل پشت ڤێ بزاڤێ نە و وەك پشکەک ژ جولێنەرا ڤێ پرسێ دەردكەڤن، لەوما ئەڤ لایەنێن سیاسی و بزاڤێن وان بۆ مە جهێ گومانێ نە و ل بەراژبەر رۆلێن گەلێ كوردستانێ و هێزێن پێشمەرگە و هێزێن تەناهیێ و ئەو قوربانی و ئەو خوینا وان بەخشی ، هەولدان بۆ ڕەتكرنا دەنگێ وان هێزان ، بێ ڕێزیكرنە ل بەرامبەر ئێك ژ مەزنترین پیرۆزیا گەلێ مە.