سەرۆکێ لیژنا دارایی ل پەرلەمانێ کوردستانێ : دبیت سوبەهی پرۆژە قانوونا چاکسازیێ بهێتە پەسەند کرن

ئەڤرۆ نیوز ، زنار تۆڤی :

بۆ ئامادەکرنا راپۆرتەکێ دەربارەی پڕۆژەقانوونا چاكسازیێ، هەردو لیژنێن دارایی ‌و قانوونی یێن پەرلەمانی دێ ل گەل سەرۆكاتیا پەرلەمانێ كوردستانێ كۆم بن ، سەرۆکێ لیژنا دارایی ژی پێشبینی دکەت کو د کۆمبوونا سوبەهی دا پەرلەمان وێ پرۆژەقانوونێ پەسەند بکەن.
رۆژا سێشەمبی 12-6-2018 پەرلەمانێ كوردستانێ دێ كۆم بیت و بەرنامێ كارێ روونشتنا سوبەهی گوتۆبێژکرنە سەبارەت پرۆژەقانوونا چاكسازیا خانەنشینیێ و مووچەی ‌و دەرمالان.

عزەت سابر سەرۆكێ لیژنا دارایی ل پەرلەمانێ كوردستانێ بۆ ئەڤرۆ راگەهاند :ئەڤرۆ دووشەمبی هەردوو لیژنێن دارایی و قانوونی دێ ل گەل سەرۆكاتیا پەرلەمانی کۆم بن و ئارمانجا کۆمبوونێ ژی ئامادەکرنا راپۆرتەکێیە دەربارەی پڕۆژەقانوونا چاكسازیا خانەنشینیێ و مووچە ‌و دەرمالان ، هەروەسا گوتیە: ناكۆكی ل سەر ڤێ پرۆژەقانوونێ گەلەک کێمبووینە ، لەوما پێشبینی دكەم کو د كۆمبوونا سوبەهی دا پەرلەمان پەسەند بکەت.

پرۆژەقانوونا چاكسازیا خانەنشینیێ و مووچە ‌و دەرمالان د ماوێ بوریدا ل پەرلەمانێ كوردستانێ هاتیە پەسەند كرن، بەلێ کارڤەدان و نەرەزابوونەکا دژوار ژ لایێ خەلکێ ڤە لێکەفت ، لەوما فراكسیۆنا پارتی ل گەل 9 فراكسیۆنی دیتر ‌و هەر ئێک ژ فراكسیۆنێن گۆران‌ و كۆمەل‌ و ئیكگرتوو ، ب رەنگێن جۆدا داخوازا ڤەگەراندنا وێ پرۆژەقانوونێ كر بۆ پەرلەمان و پشتی هنگێ هاتە ڤەگەراندن.

کۆمێنتا تە