%43 قوتابیێن دھۆکێ ئاریشێن ددانان ھەنە
ئه‌ڤرۆ نيوز:
د. راجی سلێمان داود، جێگرێ رێڤەبەرێ بنگەھێ زانین یێ ساخلەمیا قوتابخانا بو نۆش نیوز دیارکر کو ل سالا خواندنێ 2017-2018 ئەو شیاینە پشکنینا بۆ 145 هزار و 429 قوتابیان بکەن و د ئەنجامێن پشکنینان دا دیاربوویە کو 43% قوتابیان ئاریشەیێن ددانان (کرمیبوون، کەتن و لاوازیا ددانان) ھەنە و 2% یێن چاڤان وەکو (کێم دیتن، ویربوون، نەخۆشیێن دەوروبەرێن چاڤان) ھەنە و گۆت: 858 قوتابی ژی حالەتێن تایبەتبووینە وەکو ( نابینان، نابیستان، و ئاریشێن مێشکی و دەروونی) کو ل قوتابخانەیێن پەروەردا تایبەت ھاتینە وەرگرتن.
د. نورەدین عەبدوللا حەمدی، رێڤەبەرێ بنگەھێ زانین یێ ساخلەمیا قوتابخانان بو نۆش نیوز دیارکر، ھەموو قوتابیێن قەستا باخچەیێن زارۆیان و قوناغێن بنەرەت و ئامادەیی و ل گەل ئامادەیێن پێشەیی و پەیمانگەھێن تایبەت دکەن ل بنگەھی دھێنە پشکنینکرن و گۆت: پشتی پشکنینێن چاڤان و گوھلێبوونێ و دیتنێ و ددانان و پیستی و پلا کێم ئەندامیێ بو دھێنە کرن، دھێنە رەوانەکرن بو قوتابخانێ داکو ل دووڤ ئەنجامێن پشکنینێ سەرەدەری د تومارکرنا وان دا بھێتە کرن.
د. نورەدین دیارکر ھەر قوتابیەکێ ئەو ئاریشەکێ ل دەڤ ببینن رەوانەی نەخوشخانە و سەتنتەرێن تایبەتمەند دکەن داکو چارەسەریا وی بھێتە کرن و پێدڤیێن وی بھێنە دابینکرن و گۆتژی: ژبلی پشکنینێن دەستپێکی یێن دیتنا قوتابیان ئەو ل دووڤ پرۆگرامەکی سەرەدانا ھەموو قوتابخانان دکەن و بەردەوام سمینارێن روشەنبیری و ھشیاریا ساخلەمیێ پێشکێشی وان دکەن و حانوتێن قوتابخانا پشکنین دکەن.
دیارکر ژی ل قوتابخانێ ژی ھەکە نەخوشیێن ڤەگر بھێنە دیتن ئەو پێرابوونێن پێدڤی د وارێ چارەسەریێ و پاراستنا قوتابیان دا وەردگرن و گۆتژی: پێدڤی ل سەر قوتابیان و ستافێ کارگێریا قوتابخانێ دھێنە بەلاڤکرن و رێیێن دروست یێن خوپاراستنا ساخلەمیێ بو دھێنە روھنکرن.
د. نورەدین عەبدوللا ئەوژی دیارکر ل سالا بوری شیاینە ھژمارەکا زور یا (فرچە و مەعجینێن ددانان، شاموپویێن رشک و سپیھان) ل سەر قوتابیان بەلاف بکەن و گۆت: ل گەل ڤێ چەندێ رۆژێن جیھانی یێن زارۆیان، قوتابیان و ماموستایان ئەو ساخ دکەن و شیرەت و رێنمایێن ساخلەمیێ پێشکێشی قوتابیان دکەن.
