تارق حه‌رب بۆ ئه‌ڤرۆ نيوز:ل دووڤ دستوورى نابيت ده‌مێ په‌رله‌مانى بۆ ئێك رۆژ ژى بهێته زێده‌كرن
ئه‌ڤرۆنيوز، ئه‌ياد به‌روارى
شاره‌زايێ قانوونى يێ عيراقى دداخۆيا نيه‌كێ دا بۆ ئه‌ڤرۆنيوز ل دۆر بزاڤا سه‌رۆكاتيا په‌رله‌مانێ عيراقێ بۆ درێژكرنا ده‌مێ ته‌شريعى يێ په‌رله‌مانى بۆ ده‌مێ چه‌ندين هه‌يڤان، ب بزاڤه‌كا نه دستوورى هژمارت وراگه‌هاند، ل دووڤ دستوورى هه‌كه ده‌مێ ته‌شريعى يێ په‌رله‌مانى ب دووماهى بهێت، نابيت بۆ ئێك رۆژ ژى ده‌مێ په‌رله‌مانى بهێته زێده‌كرن.
تارق حه‌رب، شاره‌زايێ قانوونى يێ عيراقى بۆ ئه‌ڤرۆ نيوز گۆت” ده‌مێ ته‌شريعى يێ په‌رله‌مانێ عيراقێ ل رۆژا پێنجشه‌مبيا داهاتى 28/6/2018 ب دووماهى دهێت، ژبه‌ركو ب دووماهى هاتنا ده‌مێ دستوورى يێ په‌رله‌مانى كو 30/6/2018 يه دبيته رۆژا شه‌مبى ئه‌وژى رۆژا بێهنڤه‌دانا فه‌رمى يه ل عيراقێ.
تارق حه‌رب دياركر” پشتى 30/6/2018 نابيت هه‌تا بۆ ده‌مێ رۆژه‌كێ ژى، ده‌مێ په‌رله‌مانى بهێته زێده‌كرن، چونكى مادا 56 ژ دستوورێ عيراقى ده‌مێ په‌رله‌مانى ب چار سالان دياركريه هه‌ر ژ روونشتنا ئێكێ كو يا ڤێ خۆلا په‌رله‌مانى دكه‌ڤيته 1/7/2014، له‌وما رۆژا 30/6/2018 دبيته رۆژا دووماهيێ ژ ده‌مێ دستوورى يێ په‌رله‌مانى وئه‌ندامێن په‌رله‌مانى ئێدى وه‌كو په‌رله‌مانتار نامينن”.
ئاماژه دا ” هه‌كه بزاڤ بهێنه كرن ژى بۆ درێژكرنا ده‌مێ په‌رله‌مانى هه‌تا بۆ ئێك رۆژ ژى، ڤێ چه‌ندێ دێ پێدڤى ب راستڤه‌كرنا دستوورى هه‌بيت ونابيت قانوونه‌ك بۆ درێژكرنا ده‌مێ په‌رله‌مانى بهێته ده‌ركرن، هه‌تاكو هه‌كه بهانه‌يێن درێژكرنا ب بێ مووچه، يان ژى هه‌بوونا ئالۆزيان ل دۆر ئه‌نجامێن هه‌لبژارتنان، يان هه‌ر ئه‌گه‌ره‌كێ دى”.
وى شاره‌زايێ قانوونى يێ عيراقى ره‌تكر كو پشتى ب دووماهى هاتنا ده‌مێ ته‌شريعى يێ په‌رله‌مانێ عيراقێ ل 30/6/2018، ڤالاهيه‌كا دستوورى ل عيراقێ دروست ببيت وگۆت” دێ ڤالاهيه‌كا په‌رله‌مانى دروست بيت، چونكى جڤاتا نوونه‌ران نامينيت و په‌رله‌مانتار نامينن وئه‌ڤ چه‌نده ب ڤالاهيا په‌رله‌مانى دهێته هژمارتن، نه‌كو ب ڤالاهيا دستوورى كو ئه‌و ڤالاهيا دووماهى ئانكو نه‌بوونا حوكمه‌تێ ونه‌بوونا په‌رله‌مانى ونه‌بوونا دادوه‌ريێ”.
ل دۆر وێ چه‌ندێ ئايا دێ حوكمه‌تا عيراقى ب سه‌رۆكاتيا عه‌بادى پشتى 30/6/2018 بيته حوكمه‌تا ب رێڤه‌برنا كارى، يان دێ حوكمه‌ته‌كا تمام وب ده‌ستهه‌لات بيت، تارق حه‌رب دبێژيت”دێ حوكمه‌ته‌كا تمام وب هه‌موو ده‌ستهه‌لات بيت، ژبه‌ركو ددستوورى عيراقى دا نه‌هاتيه، ب دووماهى هاتنا ده‌مێ په‌رله‌مانى، حوكمه‌ت دێ بيته حوكمه‌تا ب رێڤه‌برنا كاران، به‌لكو دستوورى ب رۆهنى به‌حس ل وێ چه‌ندێ يا كرى كو حوكمه‌ت ل دو حاله‌تان دبيته حوكمه‌تا ب ريڤه‌برنا كاران، يا ئێكێ ل ده‌مێ لێپرسينێ ژ حوكمه‌تێ وڤه‌كێشانا باوه‌ريێ ل دووڤ مادا 61 ژ دستوورى، يا دويێ ل ده‌مێ هه‌لوه‌شاندنا په‌رله‌مانى ل دووڤ مادا 61 ژدستوورى وئه‌ڤ هه‌ردو حاله‌تا هه‌تا نوكه نه‌هاتيه پێش، به‌لكو تنێ حاله‌تا ب دووماهى هاتنا ده‌مێ په‌رله‌مانى دێ پشتى چه‌ند رۆژێن كێم روو ده‌ت، ب ڤێ چه‌ندێ ژى حوكمه‌ت دێ ب تمامى دكارێن خوه دا وب هه‌موو ده‌ستهه‌لاتێن خوه‌ڤه دێ يا به‌رده‌وام بيت”.