ئيران سپۆنسه‌را سه‌ره‌كى يا تيرۆرێ يه ل ده‌ڤه‌رێ
ئه‌ڤرۆ نيوز:
وه‌زاره‌تا ژ ده‌رڤه يا ئه‌مريكا د راپۆرتا خوه يا سالانه دا ئاماژه ب وێ چه‌ندێ دكه‌ت كو ئيران سپۆنسه‌را هه‌ره مه‌زن يا تيرۆرێ يه.
وه‌زاره‌تا ژ ده‌رڤه يا ئه‌مريكا راپۆرتا سالانه يا تايبه‌ت د ده‌ربارێ تيرۆرێ دا ل سه‌ر ئاستێ جيهانێ به‌لاڤكر.
د وێ راپۆرتێ دا ئاماژه ب ئيرانێ كريه وه‌كو “سپۆنسه‌را هه‌ره مه‌زن يا تيرۆرێ” و ئيران ب ئه‌گه‌رێ نه‌سه‌قامگێريا ئه‌ڤغانستان، به‌حرێن، عيراق، سوريا، لوبنان و يه‌مه‌نێ يه.
راپۆرت دده‌ته زانين ژى كو ئيرانێ بزاڤێ دكه‌ت زيانێ بگه‌هينيته حوكمه‌تێن هه‌رێمى و هه‌ڤده‌م ئالۆزى و هه‌ڤركيێن د ناڤبه‌را وه‌لاتان دا زێده دكه‌ت.
ته‌كست ل سه‌ر وێ چه‌ندێ ژى دكه‌ت كو رێڤه‌به‌ريا ته‌هران ب رێيا سۆپايێ قودس يێ سه‌ر ب پاسداران ڤه، وه‌زاره‌تا هه‌والگه‌رى و ئاسايش و حزبولا يا لوبنانى ڤان كارێن خوه دكه‌ت و دبێژيت: “ب ڤان كاران بوويه سپۆنسه‌را تيرۆرێ ل سه‌ر ئاستێ جيهانێ”.
راپۆرتا وه‌زاره‌تا ژ ده‌رڤه يا ئه‌مريكا كو ل سه‌ر سالا 2017ێ هاتيه نڤيسين، راگه‌هانديه سالا 2009ێ ئيرانێ ژبۆ قاعيده ئاسانكارى كرينه دا كو پاره و چه‌كداران ڤه‌گوهێزيته باشوورێ ئاسيا و سوريا.
ئه‌مريكا ژ سالا 1984ێ ڤه ئيران وه‌كو ده‌وله‌ته‌كا سپۆنسه‌را تيرۆرێ دده‌ته نياسين و د راپۆرتا ئه‌ڤ ساله ژى دا دهێته گۆتن كو ئيران ل سالا 2017ێ ژى وه‌كو سپۆنسه‌را تيرۆرێ بوويه و پشته‌ڤانى دايه حزبولا يا لوبنانى، گرۆپێن تيرۆرستى يێن فه‌لستينى، گرۆپێن تيرۆرستى يێن شيعى ل عيراقێ وه‌كو كه‌تيبا حزبولا و چه‌ند گرۆپێن دى ل سوريێ و وه‌لاتێن دى يێن رۆژهه‌لاتا ناڤين، ب رێيا وان نه‌سه‌قامگێريێ دروست دكه‌ت.
