ب ڤیدیۆ -مالباتا ئه‌و پێشمه‌رگێ داعشێ سه‌ربرى پشته‌ڤانیا خوه بۆ لیستا پارتى راگه‌هاند
ئه‌ڤرۆ نیوز، نه‌وزاد هلۆرى:
كازم حسێن بێزه‌لى ئه‌و پێشمه‌رگێ قاره‌مان كو پتریا ژیێ خوه د خزمه‌تا پێشمه‌رگایه‌تى و بزاڤا رزگاریخوازیا كوردستانێ دا بوراندبوو، و دوماهى جار ژى ل سالا 2014 ل گه‌ل هه‌ڤالێن خوه یێن پێشمه‌رگه ل سه‌نگه‌ران به‌ره‌ڤانیێ ل كوردستانێ دكه‌ت، و به‌لێ هه‌ر ل وێ سالێ د شه‌ره‌كێ گران دا دكه‌ڤیته ده‌ست تیرورستێن داعش و پشتى ساله‌كێ ژ نه‌خوشى و ئه‌شكه‌نجه و زولم و سته‌مێ ب ده‌ستێن داعش، دوماهیێ ل سالا 2015 ب ده‌ستێن تیرورسێن داعش دهێته سه‌ربرى و شه‌هیدكرن، و ڤیدیویا سه‌ربرینا وى ل تورێن جڤاكى هاته به‌لاڤكرن.
موسته‌فا بێزه‌لى كورێ شه‌هید كازم بێزه‌لى دیاركر كو بابێ وى ل سالا 1970 ل گوندێ بێزه‌ل یا سه‌ر ب ده‌ڤه‌را نێروه‌ورێكان ژ دایك بویه و ل سالا 1986 دبیته رێكخستیه‌كێ پارتى ، و ل سالا 1987 ل گه‌ل لژنا گولان دبیته پێشمه‌رگه ، و دگه‌له‌ك داستان و شه‌ران دا پشكدارى كریه و چه‌ند جاره‌كان ژى بریندار دبیت و گۆت: (پشتى كو ل سالا 2014 تیرورستێن داعش به‌ر ب ده‌ڤه‌رێن كوردستانێ هاتى ئه‌و ل گه‌ل هه‌ڤالێن خوه دچیته ده‌ڤه‌را ئه‌تروش ، و پاشان د چه‌ندین شه‌ران دا پشكدار دبیت، و ل مێحوه‌رێ شه‌لالات روو ب روویێ شه‌ره‌كێ گران دبیت و پاشان ب بریندارى دكه‌ڤیته ده‌ستێ داعش و بو موسل و چه‌ند ده‌ڤه‌رێن دن دهێته ڤه‌گوهاستن).
زێده‌تر گۆت: (پشتى ئێك سال ل بن زولم و سته‌ما تیرورستێن داعش دوماهیێ ل 30/9/2015 ب ده‌ستێن تیرورستێن داعش دهێته سه‌ربریكرن و دگه‌هیته كاروانێ شه‌هیدان، و داعش هه‌ر ب سه‌ربرینا وى رازى نه‌بوون ، به‌لكو وه‌كو گه‌ف بو پێشمه‌رگه و خه‌لكێ كوردستانێ ڤیدیویێن شه‌هیدكرنا وى د تورێن جڤاكى دا به‌لاڤكرن).
ناڤبرى د درێژاهیا ئاخفتنێن خودا دیاركر ژى كو ئه‌و هه‌تا نوكه چوو ژ ته‌رمێ بابێ خوه نوزانن و ئه‌و دخوازن كو حوكمه‌ت و لایه‌نێن شوله‌ژێ كار بكه‌ن بو ڤه‌گه‌راندنا ته‌رمێ بابێ وى داكو ئه‌و ژى ئارامیا خوه د دیتنا گورێ بابێ خوه دا ببینن و گۆت ژى: (وه‌كو رێزگرتن بو شه‌هیدێ قاره‌مان كو بویه ئێك ژ هێمایێن ده‌ڤه‌رێ، خه‌لكێ گوندێ بێزه‌ل رابوینه ب چێكرنا مونومێنته‌كا جوان ل ناڤه‌راستا جاددا سه‌ره‌كى یا شێلادزێ ، و چه‌ندین جوانكارى دناڤ دا چێكرینه)
موسته‌فایى دیاركر ژى كو ژبلى شه‌هیدبوونا بابى وى ، دوو مامێن وى ژى هاتینه شه‌هیدكرن و دیسان شه‌ش مامێن وى و چه‌ندین پسمامێن وى ژى نها پێشمه‌رگه‌نه ل سه‌نگه‌رێن به‌ره‌ڤانیێ ، و پسمامه‌كێ وى ژى ل پردێ دژى حه‌شد شه‌عبى هاتیه برینداركرن و نوكه په‌ككه‌فتى یه و ل دوماهیێ گۆت: (نوكه هه‌رێما كوردستانێ به‌ر ب هه‌لبژارتێن په‌رله‌مانێ كوردستانێ دچیت ، و ئه‌م دخوازین كو خه‌لكێ كوردستانێ به‌ر ب سندوقێن ده‌نگدانێ بچن و ده‌نگى بده‌ن لیستا 183 یا پارتى دیموكراتى كوردستان ، چونكى بتنێ ئه‌و خودان خه‌بات و قوربانیدانه و دشێت خزمه‌ته‌كێ بو خه‌لكێ كوردستان و كه‌س و كارێن شه‌هیدان بكه‌ت، و لیستا پارتى لیستا شه‌هید و پێشمه‌رگێن قاره‌مانه).
