مه‌سرور بارزانى ل گه‌ل شاندێ دانوستاندكارێ هه‌رێمێ ل گه‌ل به‌غدا كۆم دبيت
ئه‌ڤرۆ نيوز
ئه‌ڤرۆ ئێكشه‌مبى 24/11/2019 مه‌سرور بارزانى سه‌رۆكێ حوكمه‌تا هه‌رێما كوردستانێ ب به‌رهه‌ڤبوونا قوباد تاله‌بانى جێگرێ سه‌رۆكێ حوكمه‌تێ، ل گه‌ل شاندێ حوكمه‌تا هه‌رێمێ بۆ دانوستاندنێ ل گه‌ل حوكمه‌تا فيدرالى ل به‌غدا، تايبه‌ت ب پرسا په‌ترۆلێ و بودجا 2020 كۆمبوو.
د كۆمبوونێ دا شاندێ حوكمه‌تا هه‌رێمێ دووماهى پێشهاتين پرۆسا دانوستاندنێ ل گه‌ل حوكمه‌تا فيدرالى به‌رچاڤكرن، شاندى ئاماژه كر كو دانوستاندنێن د ناڤبه‌را هه‌ردولا قۆناغه‌كا گرنگ و پێشكه‌فتى ده‌رباز كريه و د سه‌قايه‌كێ ئه‌رێنى دا ب رێڤه دچن.
شاندێ ناڤبرى ئه‌و پرنسيبه به‌رچاڤكرن كو ژ ئه‌نجامێ سه‌ره‌دانا ڤێ دووماهيێ بۆ به‌غدا په‌يدابووين و دێ بنه بنه‌مايه‌ك بۆ رێككه‌فتنا دووماهيێ ل سه‌ر بابه‌تين پرۆژێ قانوونا بودجا فيدرالى بۆ سالا 2020، ب جۆره‌كێ كو به‌رژه‌وه‌نديا هه‌ڤپشك يا هه‌ردولا ل به‌رچاڤ بهێته وه‌رگرتن و ماف و شايستێن دارايى يێن هه‌رێما كوردستانێ بهێنه دابينكرن ل به‌رامبه‌ر پێگيريێن هه‌رێما كوردستانێ.
شاندێ دووپات كر كو پرۆسا دانوستاندنان ب رێنمايى و سه‌رپه‌رشتيا راسته‌وخوه يا مه‌سرور بارزانى سه‌رۆكێ حوكمه‌تا هه‌رێما كوردستانێ يا به‌رده‌وامه و هه‌ردولا گه‌هشتينه لێكتێگه‌هشتنه‌كا باش ل سه‌ر بابه‌تێن دانوستاندن ل سه‌ر دهێنه كرن و سوباهى دوشه‌مبى 25/11/2019 بۆ به‌رده‌واميێ ب دانوستاندنان شاند جاره‌كادى دێ سه‌ره‌دانا به‌غدا كه‌ت.
