سه‌رحه‌د قادر: داعش له‌گه‌ڵ پاش ماوه‌كانی قایده كۆبوه‌ته‌وه پلانی ئه‌وه داده‌نێن ناوچه‌ك بخه‌نه ژێڕده‌سه‌ڵاتی خۆیان
ئه‌ڤرۆ نیۆز، عه‌زیز ڕه‌سووڵ :
له پارێزگای كه‌ركوك هێزه‌عێراقییه‌كان هێزێكی زۆریان بڵاوه پێكردووه، باس له‌وه‌ده‌كرێت داعش پلانی هێرشی كوشنده‌ی هه‌بێت بۆ سه‌ر كه‌ركوك و ده‌وروپشتی، به‌ڕێوه‌به‌ری پێشوی پۆلیسی قه‌زا و ناحیه‌كانی كه‌ركوك ده‌ڵێ، داعش له‌گه‌ڵ پاشماوه‌كانی قایده كۆبوه‌ته‌وه مه‌به‌ستیانه ناوچه‌یه‌كی ڕزگار كراو تایبه‌ت به‌خۆیان هه‌بێت.
له لێدوانێكی تایبه‌ت به ئه‌ڤرۆ نیۆز، عه‌مید سه‌رحه‌د قادر به‌ڕێوه‌به‌ری پێشووی پۆلیسی قه‌زاو ناحیه‌كانی كه‌ركوك، ڕایگه‌یاند: پاش ئه‌وه‌ی ئه‌مریكا بڕیاریدا هێزه‌كانی له چه‌ند ناوچه‌یه‌كی عێراق كشانده‌وه، جوڵه‌كانی داعش زیادیان كردووه به تایبه‌ت له حه‌ویجه و ڕه‌شاد و ڕیاز و عه‌باسیه له ده‌وروبه‌ری كه‌ركوك، به‌رده‌وام په‌لاماری هێزه عێراقییه‌كان ده‌ده‌ن لێیان ده‌كوژن و لێیان به‌دیل ده‌گرن، به‌ئاشكرا هێزه‌كانی داعش ده‌سوڕێنه‌وه، وه‌ك هێزێكی ناوچه‌كه.
سه‌رحه‌د قادر ده‌ڵێ، ئه‌و هێزه‌ی حكوومه‌تی عێراق ڕه‌وانه‌ی كه‌ركوكی كردووه، به‌پێ زانیارییه‌كانم وا باس ده‌كرێت لیوای 61ی سوپای عێراق به‌رپرسێكی داعشیان ده‌ستگیركردبێت، زانیاری ئه‌وه‌ی دابێت چه‌ند شانه‌یه‌كی نوستوی داعش له ناو شاری كه‌ركوكداهه‌یه به‌رنامه‌یان هه‌یه له سه‌عاتی سفردا په‌لاماری چه‌ند شوێنێك بده‌ن.
قادر ئاماژه به‌وه‌ده‌كات:ئه‌و هێزانه‌ی عێراق بۆ كه‌ركوك هێناویه‌تی جێگای گومانه چونكه هێزه‌كه له ناوچه كوردییه‌كان بڵاو بونه‌ته‌وه، به‌شێكیشیان به‌ره‌و ناحیه‌ی پردێ و دوبز جوڵه‌یان پێكراوه، له كاتێكدا شوێنی سه‌ره‌كی داعش حه‌ویجه و قه‌زای داقوق و سلسیله‌كانی حه‌مرین و ناحیه‌كانی ڕه‌شاد و عه‌باسییه، داعش له‌و شوێنانه خۆیان ڕێكخستووه‌ته‌وه، هێزه‌كانی عێراق چه‌ند ترسیان له چه‌كدارانی داعش هه‌یه ئه‌وه‌نه‌ش له كورد ترسیان هه‌یه چونكه كورد ئه‌و هێزانه به پارێزه‌ری خۆیان نازانن و وه‌ك داگیركری له 16ـی ئۆكتۆبه‌ری 2017 ته‌ماشایان ده‌كه‌ن.
به‌ڕێوه‌به‌ری پێشوی پۆلیسی قه‌زا و ناحیه‌كانی كه‌ركوك ده‌ڵێ، ئێستا داعش هێزیان هه‌یه و چه‌كی پێشكه‌وتوشیان پێییه و له‌گه‌ڵ گروپه‌كانی سه‌ر به قایده كۆبونه‌ته‌وه قسه‌یان له‌سه‌ر ئه‌وه‌كردووه ناوچه‌یه‌ك بخه‌نه ژێرده‌سه‌ڵاتی خۆیان وه‌ك پێشوتر به‌ئازادی كاری خۆیانی تێدابكه‌ن. ئێستا ئه‌وكاته‌یه داعش چاوه‌ڕێ ده‌كرد بۆ ده‌ستپێكردنه‌وه‌ی هێرشه‌كانیان، ئه‌مریكا له چه‌ند شوێنێك كشاوه‌ته‌وه، حكوومه‌تی عێراق پێكنه‌هاتووه، ڤایرۆسی كۆرۆنا بڵاو بوه‌ته‌وه، حه‌شدی شه‌عبی به‌رده‌وام ترسی هێرشی ئه‌مریكایان هه‌یه بۆ سه‌ریان هه‌موو ئه‌وانه وای كردووه ئێستا ئه‌وكاته‌بێت داعش ده‌ی ویست و خۆشی ڕێكخستوه‌ته‌وه، عه‌مید سه‌رحه‌د وای گوت.