سه‌رۆكێ حوكمه‌تا هه‌رێمێ: دێ به‌ردوام بین ل سه‌ر پرۆژه‌یێن ستراتیژی بۆ بهێزكرنا ئابوورێ هه‌رێمێ
ئه‌ڤرۆ نیوز:
ئه‌ڤرۆ ب سه‌رپه‌رشتی و به‌رهه‌ڤبوونا سه‌رۆكێ حوكمه‌تا هه‌رێما كوردستانێ به‌رێ بنیاتێ پرۆژه‌یێ ده‌ڤه‌را پیشه‌سازیا خوراكی هاته دانان.
مه‌سرور بارزانی سه‌رۆكێ حوكمه‌تا هه‌رێما كوردستانێ راگه‌هاند ل ده‌ستپێكا ئه‌ڤێ كابینێ مه سوزدابوو گرنگیێ ب كه‌رتێن دی یێن ئابووری بده‌ین نه بتنێ پشت به‌ستنێ ب ئێك ژێده‌رێ داهاتێ بهێته گرێدان، بۆ ئه‌ڤێ مه‌به‌ستێ پێشڤه‌برنا كه‌رتێ پیشه‌سازی و چاندن و بازرگانیێ ئێكه ژ وان سوز و به‌رنامه‌یێن كۆ ل كارنامه‌یا حوكمه‌تێ دا هاتی، ئه‌ڤرۆ به‌رهه‌ڤین بۆ دانانا به‌رێ بنیاتێ پرۆژه‌یێ ده‌ڤه‌را پیشه‌سازی ل پارێزگه‌ها دهۆكێ به‌رهه‌م و خێرا وێ بۆ هه‌می كوردستانێ یه، ده‌ستخوشیێ ژی ل كۆمپانیا بجهكارێ ئه‌ڤی پرۆژه‌ی و وه‌زاره‌تا پیشه‌سازی و چاندنێ و هه‌موو وه‌زاره‌تێن حوكمه‌تێ دكه‌م كۆ پلان و دامه‌زراندنا ئه‌ڤی پرۆژه‌ی هه‌ڤكار بووینه، ئه‌ڤه دوماهی پرۆژه نابیت، ل چه‌ند روژێن بوری ب پرۆژه‌یێن ستراتیژی مه ده‌ستپێكریه و دێ ل هه‌مو كوردستانێ ئه‌ڤان پرۆژان ئه‌نجام ده‌ین.
سه‌رۆكێ حوكمه‌تا هه‌رێما كوردستانێ ئه‌و چه‌نده ژی راگه‌هاند به‌رنامه‌یێ مه كوردستانێ ژ روویێ ئابووری پێشڤه ببه‌ین، حوكمه‌ت به‌رنامه‌یێ خو بجه بكه‌ت ول گه‌ل كه‌رتێ تایبه‌ت ژی هه‌ڤكار بیت بۆ پرۆژه‌یێن ژڤی جوری، حوكمه‌ت گرنگیه‌كا تایبه‌ت ب كه‌رتێ تایبه‌ت دده‌ت و د هنده‌ك پرۆژان دا ل گه‌ل كه‌رتێ تایبه‌ت دێ كارا كه‌ن، ئارمانجا مه رزقێ خه‌لكی ل ده‌ستێ وان بخو دا بیت و چاڤ ل دامه‌زراندنا كه‌رتێ گشتی نه‌بیت، دلخوشم كۆ به‌رنامه‌یێ مه زیده‌باری قه‌یرانا ئابووری و به‌لاڤ بوونا ڤایرۆسێ كورونایێ رێ لێ نه‌هاته‌گرتن، بجهكرنا پرۆژه‌یێن حوكمه‌تا هه‌رێما كوردستانێ به‌رده‌وام بوون.
مه‌سرور بازرانی سه‌رۆكێ حوكمه‌تا هه‌رێما كوردستانێ ئه‌و چه‌نده دا زانین به‌رێ بنیاتێ پرۆژه‌یێ ده‌ڤه‌را پیشه‌سازیا خوراكی ل دهۆكێ پرۆژه‌یه‌كی هه‌ڤپشكه ل گه‌ل كه‌رتێ چاندنێ، دێ چه‌ندین ده‌لیڤه‌یێن كاری ل كه‌رێن پیشه‌سازی و چاندنی دناڤ ئه‌ڤی ده‌ڤه‌ری و ده‌رڤه‌ی ده‌ڤه‌رێ دروست بیت.
