جڤاتا پارێزگەها دهۆکێ ئه‌ڤرۆ دەنگی ل سەر پۆستێ رێڤەبەرێن سێ ناحیان دەت
ئه‌ڤرۆ نیوز ، زنار تۆڤى:
جڤاتا پارێزگه‌ها دهۆكێ، ئه‌ڤرۆ دێ ده‌نگى ل سه‌ر به‌ربژارێن هه‌رسێ پۆستێن ناحیێن بامه‌رنێ و ده‌ركارێ و رۆڤیان ده‌ت
هشیار فه‌ریق گۆلى، سه‌رۆكێ فراكسیۆنا پارتى ل جڤاتا پارێزگه‌هێ بۆ ئه‌ڤرۆ نیوز راگه‌هاند؛ جڤاتا پارێزگه‌هێ ئه‌ڤرۆ سات 11 یێ سبێ ل دۆر سێ ته‌وه‌ران كۆمبیت، ته‌وه‌رێ ئێكێ ده‌نگدانه ل سه‌ر دیاركرنا سێ به‌ربژارێن رێڤه‌به‌رێن ناحیان ل گۆر بریارا ژماره ئێك یا په‌رله‌مانێ كوردستانێ، كو ب نڤیساره‌كا فه‌رمى گه‌هشتینه وان، به‌ریا نها ئه‌و پۆست ژ ئالیێ ئێكگرتوویا ئیسلامى ڤه دهاتنه برێڤه برن.
خویا كر، به‌ربژار پێكهاتینه ژ خانم میران عه‌بدولره‌حمان، به‌ربژاره بۆ پۆستێ رێڤه‌به‌را ناحیا بامه‌رنێ، ئه‌دیب جه‌عفه‌ر بۆ پۆستێ رێڤه‌به‌رێ ناحیا ده‌ركارێ، عنته‌ر فه‌رهاد بۆ پۆستێ رێڤه‌به‌رێ ناحیا رۆڤیان، پشتى ناڤێن وان دهێنه په‌سه‌ند كرن ژی ب نڤیساره‌كا فه‌رمى بریارا ده‌ست ب كاربوونا وان دێ ده‌ركه‌ڤیت.
ته‌وه‌رێن دی یێن كۆمبوونێ ژی، گۆهارتنا لژنێن نافخۆیى یێن جڤاتا پارێزگه‌هێ نه، ته‌وه‌رێ سییێ ژى راپۆرته‌ك ژ ئالیێ لژنا چاندنێ ڤه هاتیه ئاماده‌كرن و ژ ئالیێ جڤاتا پارێزگه‌هێ ڤه هێت گۆتوبێژكرن.
