نڤیسه‌ره‌كێ ناڤدار یێ توركیا: بلا ئه‌ردۆغان چاڤه‌رێی ده‌نگێن كوردان و خه‌لكێ هه‌ژار نه‌بیت
ئه‌ڤرۆ:
نڤیسه‌ره‌كێ ناڤدارێ توركیا دیار دكه‌ت كو سه‌رده‌مێ ده‌ستهه‌لاتا ئه‌ردۆغانی ل توركیا به‌ر ب دووماهیێ ڤه دچیت، چونكو نها نه كورد و نه ژی خه‌لكێ هه‌ژار یێ توركیا پشته‌ڤانیێ ل ئه‌ردۆغانی ناكه‌ن و هه‌كه ره‌وش وه‌كو نها به‌رده‌وام بیت د هه‌لبژارتنێن داهاتی دا ئه‌ردۆغان دێ ژ ده‌ستهه‌لاتێ هێته دوورخستن.
ده‌نیز زه‌یره‌ك نڤیسه‌ر و ڤه‌كۆله‌رێ ناڤدارێ توركیا راگه‌هاند كو ئه‌ردۆغانی د ڤان چه‌ند سالێن دووماهیێ دا توركیا تووشی قه‌یرانه‌كا گه‌له‌ك مه‌زن كریه، نها ره‌وشا ئابووریێ یا توركیا گه‌له‌ك خراب بوویه، ده‌ستێوه‌ردانێن توركیا ل سووریێ، لیبیا و ده‌ڤه‌رێن دی وه‌سا كریه كو پاره‌یه‌ك گه‌له‌ك مه‌زن بۆ وان ده‌ڤه‌ران بهێته ته‌رخانكرن و ئه‌و یه‌ك ژی رێ بۆ هندێ خوه‌شكر كو هێزێن سه‌ربازی پاره‌یه‌ك مه‌زنتر بۆ خوه ته‌رخان بكه‌ن و نها رێژا بێكاریێ ل توركیا گه‌له‌ك زێده بوویه.
ده‌نیز زه‌یره‌ك هه‌روه‌سا دیار دكه‌ت كو كورد ژی نها پتر ژ هه‌ر ده‌مه‌كێ ژ ده‌ستهه‌لاتا ئه‌ردۆغانی تووره نه، چونكو یا ئێكێ ئه‌ردۆغانی پرۆسێسا ئاشتیێ دا راگرتن و ده‌ست ب شه‌ره‌كێ مه‌زن ل دژی كوردان كر، هه‌روه‌سا نها توركیا ل باكورێ سووریێ و هه‌رێما كوردستانێ ژی شه‌ری دكه‌ت و ژ به‌ر هندێ ژی كورد ژ ئه‌ردۆغانی و ده‌ستهه‌لاتا وی تووره نه، د هه‌لبژارتنێن ڤێجارێ دا كورد ده‌نگێ خوه ناده‌نه ئه‌ردۆغانی و ل ئالیێ دی خه‌لكێ هه‌ژار ژی ژ ده‌ستهه‌لاتا ئه‌ردۆغانی بێزار بووینه و ژ به‌ر هندێ ژی هه‌كه نها ل توركیا هه‌لبژارتن برێڤه بچن ئه‌ردۆغان نه‌شێت وه‌كو جارا بۆری بهێته سه‌ر ده‌ستهه‌لاتێ و هه‌كه ل هه‌مبه‌ر ئه‌ردۆغانی ئۆپۆزسیۆنه‌كا بهێز هه‌بیت دێ دووماهی ب ده‌ستهه‌لاتا ئه‌ردۆغانی هێت.
ناڤهاتی ئه‌و یه‌ك ژی دیار كر كو ره‌وشا توركیا نها وه‌كو سالێن بۆری نینه، گه‌له‌ك تشت هاتینه گوهۆرین، نها رێژه‌كا گه‌له‌ك مه‌زن ژ كوردان ل ئسته‌نبۆلێ و ئه‌نقه‌ره دژین، د هه‌لبژارتنێن باژێرڤانیان دا ب ده‌نگێ وان كوردان سێ باژێرێن هه‌ری مه‌زن ژ ده‌ستێ ئه‌ردۆغانی و ئاكپارتیێ هاته ده‌رخستن و گۆت: (ئه‌ز وه‌سا دبینم كو دێ د هه‌لبژارتنێن داهاتی یێ توركیا دا ژی هه‌مان تشت روو ده‌ت، چونكو كورد ب ته‌مامی ژ ئاكپارتیێ بێزار بووینه، چو به‌رنامه و پرۆژێن ئه‌ردۆغانی بۆ چاره‌سه‌ركرنا پرسا كوردی و پرسێن دی یێن توركیا نینن، لێ ل هه‌مبه‌ر ئه‌ردۆغانی نها پارتا كۆماری ب سه‌رۆكاتیا كه‌مال كلچدار ئوغلۆ ده‌ست ب قۆناغه‌كا نوو كریه، پارتا كۆماری دڤێت په‌یوه‌ندیێن خوه ل گه‌ل كوردان باش بكه‌ت، ژ به‌ر هندێ ژی به‌ری نها شانده‌ك ژ پارتا كۆماریا گه‌ل سه‌ره‌دانا هه‌رێما كوردستانێ كر، ئه‌ز دشێم بێژم كو پارتا كۆماریا گه‌ل نها پتر ژ هه‌ر ده‌مه‌كێ پێدڤی ب ده‌نگێن كوردانه و حسابه‌كا مه‌زن ژی ل سه‌ر ده‌نگێن كوردان دهێته كرن).
نڤیسه‌ر و ڤه‌كۆله‌رێ ناڤدار یێ توركیا دیار ژی دكه‌ت كو دڤێت ئه‌م ڤێ راستیێ قه‌بوول بكه‌ین كو كورد بووینه هێزه‌كا كاریگه‌ر ل توركیا، كورد دشێن ب ده‌نگێ خوه گه‌له‌ك تشتان ل توركیا بگوهۆرن و د هه‌لبژارتنێن دووماهیێ دا ئه‌و یه‌ك ب ره‌نگه‌كێ ئاشكرا دیار بوو، ژ به‌ر هندێ ژی هه‌كه سالا بهێت هه‌لبژارتن ل توركیا برێڤه بچن دڤێت ئاكپارتی و ئه‌ردۆغان چاڤه‌رێی به‌رسڤا كوردان و خه‌لكێ هه‌ژار بن، چونكو ئێدێ كورد پشته‌ڤانیێ ل ئه‌ردۆغانی و پارتا وی ناكه‌ن، كورد بووینه كارته‌ك كاریگه‌ر د سیاسه‌تا توركیا دا، پارتا كۆماری ژی هه‌ست ب هێزا كوردان كریه و خوه نێزیكی كوردان دكه‌ت.
