مه‌سرور بارزانی: ل ده‌مه‌كێ نێزیك ده‌ست ب پرۆژێ فڕۆكخانا دهۆكێ دێ هێته كرن
ئه‌ڤرۆ:
مه‌سرور بارزانی، سه‌رۆكێ حوكمه‌تا هه‌رێما كوردستانێ و د گه‌ل دا ئانو جه‌وهه‌ر، وه‌زیرێ ڤه‌گوهاستن و گه‌هاندنێ و د. عه‌لی ته‌ته‌ر، پارێزگارێ دهۆكێ دوهی 21/9/2021 سه‌ره‌دانا پرۆژێ دروستكرنا فڕۆكخانا نێڤده‌وله‌تی یا پارێزگه‌ها دهۆكێ ل ده‌ڤه‌رداریا سێمێلێ كر.
مه‌سرور بارزانی، سه‌رۆكێ حوكمه‌تا هه‌رێما كوردستانێ پشتی دیزاین و نه‌خشه و جهێ فڕۆكخانێ ژ نێزیكڤه دیتین د په‌یڤه‌كێ دا راگه‌هاند: ئه‌م یێن هاتین سه‌ره‌دانا پرۆژێ فڕۆكخانا پارێزگه‌ها دهۆكێ ل ده‌ڤه‌رداریا سێمێلێ بكه‌ین، شوله‌كێ كێمێ ل سه‌ر هاتیه‌كرن، ب مخابنی ڤه ژ ئه‌گه‌رێ قه‌یرانا دارایی پرۆژه راوه‌ستیابوو.
مه‌سرور بارزانی هه‌روه‌سا دیاركر كو دیراسا پرۆژێ فڕۆكخانێ ده‌ستپێكریه و پشتی هنده‌ك گۆهورینێن پێدڤی و هه‌كه خودێ هاریكاربیت دوباره دێ كار د پرۆژه‌ی دا هێته‌كرن.
سه‌روكێ حوكومه‌تا هه‌رێما كوردستانێ گۆت: “من حه‌ز دكر ئه‌ز ئاگه‌هداریا خه‌لكێ پارێزگه‌ها دهۆكێ بكه‌م، پشتی دیراسێن ده‌ستپێكی یێن پرۆژه‌ی تمام دبن ل ده‌مه‌كێ نێزیك دێ ده‌ست ب بجهئینانا ڤی پرۆژه‌ی كه‌ین.
دیسا هه‌ر دوهی مه‌سرور بارزانی، سه‌رۆكێ حوكمه‌تا هه‌رێما كوردستانێ، سه‌ره‌دانا ده‌ڤه‌رداریا سێمێلێ كر و ژلایێ د. عه‌لی ته‌ته‌ر، پارێزگارێ دهۆكێ و ده‌ڤه‌ردار و رێڤه‌به‌رێن ناوچه‌داری و دام و ده‌زگه‌هێن سێمێلێ ڤه پێشوازی لێ هاته كرن.
سه‌رۆكێ حوكمه‌تا هه‌رێما كوردستانێ ئاماژه ب وێ چه‌ندێ دا كو ئارمانج ژ سه‌ره‌دانا وان ئه‌وه ژ نێزیك ئاگه‌هداری داخوازی و پێدڤیێن ده‌ڤه‌رداریا سێمێلێ بن و دۆپات كر كو حوكمه‌تا هه‌رێما كوردستانێ كار دكه‌ت بێ جوداهی خزمه‌تا هه‌موو باژێر و باژێرك و گوند و هه‌موو ده‌ڤه‌رێن كوردستانێ بكه‌ت، ل دووڤ شیانێن دارایی یێن به‌رده‌ست د بجهئینانا پرۆژێن خزمه‌تگۆزاری دا یا به‌رده‌وامه.
هه‌ر د ڤێ سه‌ره‌دانێ دا سه‌رۆكێ حوكمه‌تا هه‌رێما كوردستانێ به‌رپرسێن ده‌ڤه‌رداریا سێمێلێ راسپاردن كو هه‌مو بزاڤان بكه‌ن پتر خزمه‌تا وه‌لاتیێن ده‌ڤه‌را خوه بكه‌ن.
