قاسم شه‌شۆ: ئه‌و ژن و زارۆیێن pkk ئیناینه سه‌ر جادێ نوونه‌راتیا خه‌لكێ شنگالێ ناكه‌ن
ئه‌ڤرۆ، له‌زگین جوقی
فه‌رماندێ هێزا شنگالێ یا پێشمه‌رگێ كوردستانێ، قاسم شه‌شۆ راگه‌هاند” pkk ژن و زارۆ ئینابوونه سه‌ر جادێ بۆ رێگریێ ل هه‌وا هه‌لبژارتنێن پارتی ل شنگالێ و ب هیچ شیوه‌كێ ئه‌و ژن و زارۆ وچه‌كدارێن pkk نوونه‌راتیا خه‌لكێ شنگالێ ناكه‌ن.
قاسم شه‌شۆ، گۆت” ئه‌وا دوهی pkk ل شنگالێ ئه‌نجامدای بۆ رێگریێ ل شانده‌كێ پارتی بۆ هه‌وا هه‌لبژارتنان مه‌زنترین شاشی بوو ئه‌نجامدای، چونكه مافێ پارتی یه بچیته هه‌ر جهه‌كێ هه‌وا خوه بكه‌ت، مخابن هنده‌ك چه‌كدارێن pkk ژن و زارۆ ئینابوونه سه‌ر جادێ رێگریێ ل شاندێ پارتی بكه‌ن و ئه‌م ڤێ كارێ pkk ریسوا دكه‌ین”.
گۆت ژی” pkk دخوازیت پتر ئالۆزیان ل شنگالێ دروست بكه‌ت وئه‌ڤه جهێ قه‌بوولكرنێ نینه و پێدڤیه شنگالێ چۆل بكه‌ت، چونكه ب هیچ شێوه‌كێ نوونه‌راتیا خه‌لكێ شنگالێ ناكه‌ت و داخواز ژ به‌غدا دكه‌ین پشته‌ڤانیا pkk ل شنگالێ نه‌كه‌ت”.
دیاركر”هه‌ر جارا پارتی یان ئێدارا شه‌رعی بزاڤا زڤرینێ بۆ شنگالێ بكه‌ت، چه‌كدارێن pkk ب ناڤێ خه‌لكێ شنگالێ رێگریێ دكه‌ن، لێ ئه‌و بخوه ب چ ره‌نگه‌كێ نوونه‌راتیا خه‌لكێ شنگالێ ناكه‌ن وگه‌له‌ك جاران خه‌لكێ شنگالێ داخواز كریه pkk وهه‌موو گرۆپێن ب سه‌ر ڤه شنگالێ چۆل بكه‌ن، به‌لێ مخابن هه‌تا نوكه pkk شنگال چۆل نه‌كریه وبه‌رده‌وام ئاسته‌نگان دروست دكه‌ت”.
ئێزدێن شه‌مۆ، به‌رپرسێ لیژنا پارتی ل ناحیا سنوونێ دیاركر” دوهی 2/10/2021ێ پارتی ل به‌ر بوو بچیته شنگالێ بۆ ده‌ستپێكرنا هه‌وا خوه یا هه‌لبژارتنان، لێ pkk رێگری ل به‌ربژارێن پارتی ل شنگالێ كر كو كو هه‌وا خوه یا هه‌لبژارتنان ئه‌نجام بده‌ن”.
گۆت ژی” pkk د وێ رێگریێ دا ریێا ناحیا سنوونی بۆ مه‌زارگه‌هێ شه‌رفه‌دین داخست و نه‌هێلان شانده‌كێ پارتی بچیته سنوونێ و مه‌زارگه‌هێ شه‌رفه‌دین بۆ ئه‌نجامدانا هه‌وا هه‌لبژارتنان بۆ به‌ربژارێن پارتی و pkk ل حه‌ردان و سنوونێ رێ داخستن”.
خویاكر” بتنێ pkk وحه‌شدا شه‌عبی رێكریێ ل پارتی دكه‌ن ل شنگالێ، به‌لێ هه‌موو حزب و گرۆپێن چه‌كدار هه‌وا خوه یا هه‌لبژارتنان ل شنگالێ دكه‌ن تنێ رێگری ل پارتی هاته كرن”.
گۆت ژی:” چه‌ند رێگریێ ل پارتی بهێته كرن دێ هه‌ر به‌ربژارێن پارتی ل هه‌لبژارتنان سه‌ركه‌ڤن، چونكه پارتی یا دناڤ دلێ خه‌لكێ شنگال دایه”.
