هشیار زێباری: پارتی ب رێیا هه‌لبژارتنان دێ پێگه‌هـ و سه‌نگا خوه دیار كه‌ت
ئه‌ڤرۆ، نه‌وزاد هلۆری:
ناڤه‌ندا خانی یا ره‌وشه‌نبیری و راگه‌هاندنێ كه‌رنه‌ڤاله‌كێ تایبه‌ت ل بارا بانگه‌شا هه‌لبژارتنان ئه‌نجام دا و تێدا هوشیار زێباری، به‌رپرسێ لژنا بلندا هه‌لبژارتنان ل ده‌ڤه‌را به‌هدینان په‌یڤه‌ك پێشكێش كر و باسێ رۆلێ ناڤه‌ندا خانی د هشیاركرنا وه‌لاتیان بۆ پشكداریكرنێ د هه‌لبژارتنان دا كر.
هشیار زێباری، به‌رپرسێ لژنا بلندا هه‌لبژارتنان ل ده‌ڤه‌را به‌هدینان دیار كر كو ناڤه‌ندا خانی رۆله‌كێ به‌رچاڤ یێ هه‌ی د گه‌هاندنا په‌یاما پارتی دیمۆكراتی كوردستان دا بۆ هشیاركرنا وه‌لاتیان كو به‌ر ب سندۆقێن ده‌نگدانێ بچن و ده‌نگێ خوه بده‌ن و گۆت: “ئه‌ڤ قووناغا نوكه گه‌له‌كا گرنگه و هه‌ر ده‌نگه‌ك بۆ پارتی گه‌له‌كێ گرنگه، داخوازێ ژ وه‌لاتیان دكه‌ین كو رۆژا ده‌نگدانێ بچنه سه‌ر سندۆقێن ده‌نگدانێ و ده‌نگێ خوه بده‌نه پارتی و سه‌ربئێخن، مه نه‌ڤێت ئه‌م به‌حسا پارتی بكه‌ین، به‌لكو ئاڤه‌دانی و دیرۆك و كار و كریارێن پارتی دیمۆكراتی كوردستان بۆ خزمه‌ت و خه‌باتا پارتی دیده‌ڤانن”.
هشیار زێباری زێده‌تر گۆت: “به‌رنامه و په‌یاما پارتی دیموكراتی كوردستان به‌رنامه‌یه‌كێ به‌رفره‌هه و به‌رسڤا هه‌موو وان كه‌سان دده‌ت كو ل ئیراق و كوردستانێ گازندان ژ پارتی دكه‌ن، مه‌یدان و جه‌ماوه‌ر ل هه‌مبه‌ر سینگێ هه‌موویانه و ئه‌و دێ بڕیارێ ده‌ن كێ ب هه‌لبژێرن”.
گۆتژی: “هه‌موو هه‌لبژارتن بۆ چاره‌سه‌ركرنا هنده‌ك ئاریشان دگرنگن، دیسا ئارمانجا مه د ڤان هه‌لبژارتنێن پێشوه‌خت یێن جڤاتا نوونه‌رێن ئیراقێ دا ئه‌وه كو بۆ هه‌موو جیهان و ئیراق و كوردستانێ ژی دوپات بكه‌ین كا سه‌نگا پارتی چه‌نده”.
