سێ وه‌زیر ل دۆر ئاریشه‌یێن مامۆستا و قوتابیان بۆ په‌رله‌مانی دهێنه گازیكرن
هه‌ولێر، قائید میرۆ:
ئه‌ڤ ساله زێده‌تری 50 هزار قوتابیان داخوازیێن وه‌رگرتنێ ل زانكۆ و په‌یمانگه‌هان پێشكێش كرینه و بڕیارده‌را لژنا په‌روه‌رده و خواندنا بلند ل په‌رله‌مانێ كوردستانێ ژی دبێژیت: مه داخواز كریه هه‌ژمارا كۆرسیان ل زانكۆیێن حوكمه‌تێ بهێنه زێده‌كرن.
دكتۆر گه‌لاوێژ عوبێد، بڕیارده‌را لژنا په‌روه‌رده و خواندنا بلند ل په‌رله‌مانێ كوردستانێ بۆ رۆژناما ئه‌ڤرۆ دیار كر، لژنا په‌روه‌رده و خواندنا بلند نڤیساره‌ك پێشكێشی وه‌زاره‌تا خواندنا بلند كریه و تێدا داخواز كریه پترین هه‌ژمارا قوتابیان ئه‌ڤ ساله ل زانكۆ و په‌یمانگه‌هان بهێنه وه‌رگرتن، ب شێوه‌یه‌كی كۆرسی ل زانكۆیێن سه‌ر ب حوكمه‌تێ ڤه بهێنه زێده‌كرن، هه‌تا ئه‌ڤ ساله رێژه‌یا وه‌رگرتنا قوتابیێن ده‌رچوویێن پۆلا 12 ئاماده‌یی بهێته زێده‌كرن و پترین قوتابی ژ پرۆسا خواندنێ ل زانكۆ و په‌یمانگه‌هێن سه‌ر ب حوكمه‌تا هه‌رێما كوردستانێ ڤه مفادار بن.
دكتۆر گه‌لاوێژ عوبێد گۆت: “ل گوره‌ی قانوونێ هه‌ر قوتابیه‌كێ نمره‌یا وی بگه‌هیته 60% ئه‌ڤه دێ ل زانكۆیێ هێته وه‌رگرتن و قوتابیێن نمره‌یێن وان ژ 60% كێمتر ل په‌یمانگه‌هان دێ هێنه وه‌رگرتن و بڕیاره ڤێ حه‌فتیێ سێ وه‌زیر بهێنه گازیكرن بۆ په‌رله‌مانی ل دۆر ئاریشه‌یێن قوتابی و مامۆستایان”.
دیسا ل دووڤ پێزانینان بڕیاره ئه‌ڤرۆ رۆژا ئێكشه‌مبی 24/10/2021 ئه‌نجامێن زانكۆلاین بهێنه راگه‌هاندن.
