پرۆفایلێ وه‌به‌رهێنانێ بۆ 378 پرۆژان ل پارێزگه‌ها دهۆكێ هاته راگه‌هاندن
ئه‌ڤرۆ:
پارێزگارێ دهۆكێ پێشوازی ل سه‌رۆكێ ده‌سته‌یا وه‌به‌رهێنانێ كر و د كۆمبوونه‌كێ دا پرۆفایلێ وه‌به‌رهێنانێ بۆ 378 پرۆژان ل پارێزگه‌ها دهۆكێ راگه‌هاند.
د. عه‌لی ته‌ته‌ر، پارێزگارێ دهۆكێ دوهی 7/11/2021 پێشوازی ل د. محه‌مه‌د شوكری، سه‌رۆكێ ده‌سته‌یا وه‌به‌رهێنانێ ل هه‌رێما كوردستانێ كر و د كۆمبوونه‌كێ دا ب به‌رهه‌ڤبوونا سه‌رۆكێ جڤاتا پارێزگه‌ها دهۆكێ و جێگرێن پارێزگاری و رێڤه‌به‌رێن گشتی و ده‌ڤه‌ردارێن پارێزگه‌هێ و رێڤه‌به‌رێن داموده‌زگه‌هێن په‌یوه‌ندیدار پرۆفایلێ وه‌به‌رهێنانی ل سنوورێ پارێزگه‌ها دهۆكێ بۆ هه‌موو ناوچه‌داری و ده‌ڤه‌رداریان راگه‌هاند كو 378 پرۆژێن وه‌به‌رهێنانێ دبیاڤێن جودا جودا، ب تایبه‌تی بیاڤێن چاندن، گه‌شتوگوزار و پیشه‌سازی دا ب خوه‌ڤه دگریت.
هه‌ر ئێك ژ سه‌رۆكێ ده‌سته‌یا وه‌به‌رهێنانێ و پارێزگارێ دهۆكێ و سه‌رۆكێ جڤاتا پارێزگه‌هێ د په‌یڤێن خوه دا دوپاتی ل سه‌ر گرنگیا پێشئێخستنا كه‌رتێ وه‌به‌رهێنانێ د هه‌موو بیاڤه‌كی دا كر و داخواز ژ رێڤه‌به‌رێن په‌یوه‌ندیدار كر كو ئاسانكاریان ل دووڤ یاسا و رێنمایان بۆ وه‌به‌رهێنه‌ران ئه‌نجام بده‌ن، ژ به‌ركو ب پێشئێخستنا كه‌رتێ وه‌به‌رهێنانێ رۆیێ پێشڤه‌چوون و شارستانیه‌تێ و په‌یداكرنا ده‌لیڤێن كاری دێ زێده بیت.
دیسا ژ لایه‌كێ دیڤه پارێزگارێ دهۆكێ ل رۆژا 4/11/2021 ب گوژمێ چار ملیار و 545 ملیۆن دیناران پرۆژی ل سنوورێ پارێزگه‌هێ راوانه‌ی بجهئینانێ كرن، ئه‌و ژی ئه‌ڤ پرۆژه‌نه: دروستكرنا سه‌ربڕخانه‌كا مودێرن ل ئامێدیێ، دابینكرن و سه‌رپه‌رشتیكرنا كرێكاران بۆ نه‌خۆشخانه و سه‌نته‌ر و بنگه‌هێن ساخله‌میێ، دابینكرنا پێدڤیێن پاقژكرنێ بۆ نه‌خۆشخانه و سه‌نته‌رێن نۆشداری ل سنوورێ پارێزگه‌ها دهۆكێ و دابینكرنا خوارنێ بۆ گرتیگه‌ها زاخۆ.
