د. ماجد شنگالێ: پێدڤیه ره‌وشا شنگالێ بهێته ئاساییكرن
ئه‌ڤرۆ، له‌زگین جوقی:
كاندیدی سه‌ركه‌ڤتی یێ پارتی دیموكراتی كوردستان ل شنگال راگه‌هاند، پێدڤیه ئیدارا شه‌رعی بزڤریته شنگال و حكومه‌تا داهاتیا عیراقَی ل سه‌ر بجهئینانا رێكه‌فتنا دناڤبه‌را حكومه‌تا هه‌رێما كوردستانێ و عیراقێ دا كاربكه‌ت بۆ ئاساییكرنا ره‌وشا شنگال”.
د. ماجد شنگالی كاندیدێ سه‌ركه‌فتی یێ پارتی دیموكراتی كوردستان ل شنگال دیار كر، پێدڤیه حكومه‌تا داهاتی یا عیراقێ كار ل سه‌ر باشكرنا ره‌وشا شنگال و نه‌هێلانا هێزێن نه‌یاسایی دناڤ شنگال دا بكه‌ت و ئه‌م وه‌كو نوونه‌رێن خه‌لكێ شنگال دێ دناڤ په‌رله‌مانێ عیراقێ دا كار كه‌ین بۆ زڤرینا ئاواران و ئاڤه‌دانیا شنگال، هه‌روه‌سا ژی پێدڤیه حكومه‌تا بهێت یا عیراقێ ده‌ست بجهئینانا رێكه‌فتنا دناڤبه‌را حكومه‌تا هه‌رێما كوردستانێ و عیراقێ دا بكه‌ت بۆ ئاسایێكرنا ره‌وشا شنگال و نه‌هێلانا گرۆپ و هێزێن چه‌كدار دناڤ شنگالێ دا و هه‌موو كار بهێنه كرن بۆ زڤرینا ئیدارا شه‌رعی یا شنگال و ره‌وشا سیاسی یا شنگال چاره‌سه‌ربیت”.
د. ماجد شنگالی ئاشكه‌را كر، خه‌لكێ مه یێ كورد ل ده‌ڤه‌رێن كوردستانێ یێن ده‌رڤه‌ی ئیدارا هه‌رێما كوردستانێ تووشی زیانه‌كا مه‌زن بووینه هه‌تا خه‌لك نه‌شێن ڤه‌گه‌رنه سه‌ر جهێن خۆ و كرین و فرۆتن و مولكی كوردان دهێته‌ن كرن. د خولا بهێت یا په‌رله‌مانێ عیراقێ دا ئه‌م دێ هه‌موو هه‌ولا ده‌ین مادێ 140 بجهبهێت چونكو ده‌مێ مادێ ده‌ستورێ یێ 140 بجه دهێت دێ هه‌موو ئاریشه‌یێن مه چاره‌سه‌ربن و ده‌ڤه‌رێن كوردستانێ دێ زڤرنه باوه‌شا هه‌رێما كوردستانێ و دێ خزمه‌تا خه‌لكێ مه پتر هێته كرن”.
د. ماجد شنگالێ زێده‌تر گۆت: ئه‌و نامه‌یا خه‌لكێ شنگال ل هه‌لبژارتنان گه‌هاندی دێ بیته ئه‌گه‌ر ته‌ناهی و ئاڤه‌دانی ل شنگال په‌یدابیت، چونكو خه‌لكێ شنگال گۆتنه هێزێن نه‌یاسایی مه هوون نه‌ڤێن، ده‌مێ ئه‌م ده‌ستبكاربن ل په‌رله‌مانێ عیراقێ ب هیچ شێوه‌یه‌كی ئه‌م رازی نابین هێزێن نه‌یاسایێ دناڤ شنگالدا بن، چونكو ئه‌ڤه پتر ژ پینچ سالانه شنگال ل بن ده‌ستێ هێز و گرۆپێن نه‌یاسایی دا و وان نه‌شیایه ته‌ناهیێ و ئاڤه‌دانیێ ل شنگال دابین بكه‌ن، نوكه ده‌م هاتیه كار بهێته كرن هیزێن نه‌یاسایێ شنگال چوول بكه‌ن، دا كو خزمه‌تا خه‌لكێ شنگال بهێته كرن و ته‌ناهی و ئاڤه‌دانی ل سه‌ر ده‌ستێ پارتی ل شنگال بهێته كرن”.
