قانوونا هه‌لگرتنا چه‌كی دێ هێته راستڤه‌كرن
هه‌ولێر، قائید میرۆ:
بڕیاره ئه‌ڤرۆ په‌رله‌مانێ كوردستانێ كۆم ببیت و ئێك ژ خالێن كۆمبوونێ ژی راستڤه‌كرنا قانوونا هه‌لگرتنا چه‌كی یه ل هه‌رێما كوردستانێ و بڕیارده‌رێ لژنا ناڤخوه ژی ل په‌رله‌مانێ كوردستانێ دبێژیت: قانوونا راستڤه‌كری دێ دیارده‌یا هه‌لگرتنا چه‌كی سنووردار كه‌ت و وه‌ك به‌رێ هه‌موو كه‌س نه‌شێن چه‌كی هه‌لبگرن.
حیكمه‌ت محه‌مه‌د، بڕیارده‌رێ لژنا ناڤخوه ل په‌رله‌مانێ كوردستانێ بۆ رۆژناما ئه‌ڤرۆ دیار كر، ئێك ژ مژارێن كۆمبوونا ئه‌ڤرۆ 23/11/2021 یا په‌رله‌مانێ كوردستانێ راستڤه‌كرنا قانوونا هه‌لگرتنا چه‌كیه ل هه‌رێما كوردستانێ، كو ئه‌ڤ قانوونا نوكه هه‌ی، به‌ری 30 سالان هاتیه ده‌ركرن و بۆرینا ڤی ده‌مێ درێژ وه‌كریه قانوونا هه‌لگرتنا چه‌كی ل گه‌ل سه‌رده‌مێ نوكه نه‌گونجیت، له‌وڕا ژلایێ سه‌رۆكایه‌تیا جڤاتا وه‌زیرێن هه‌رێما كوردستانێ پڕۆژه‌قانوونه‌كا نوو ل دۆر هه‌لگرتنا چه‌كی هاتیه به‌رهه‌ڤكرن.
حیكمه‌ت محه‌مه‌د گۆت: “قانوونا راستڤه‌كری دێ گه‌له‌ك ژ قانوونا به‌رێ باشتربیت و كاریگه‌ری ل سه‌ر دیارده‌یا هه‌لگرتنا چه‌كی دێ هه‌بیت، ژ به‌ركو زۆربه‌یا تاوانێن نوكه دهێنه ئه‌نجامدان ب ئه‌گه‌رێ هه‌لگرتنا چه‌كێ نه‌قانوونینه و دڤێت هه‌لگرتنا چه‌كی بهێته كۆنتڕۆلكرن، ب تایبه‌تی لایه‌نێن په‌یوه‌ندیدار قانوونێ وه‌كی خوه بجه بینن، هه‌تا چه‌ك نه‌مینیته د ده‌ستێ وه‌لاتیان دا و ژ ده‌رڤه‌ی قانوونێ”.
