شرۆڤه‌كاره‌كێ سیاسی: پشكداریا گرۆپێن حه‌شدێ د حوكمه‌تێ دا به‌رۆڤاژی دستووری و قانوونا هه‌لبژارتنایه
ئه‌ڤرۆ:
چاره‌نڤیسێ گرۆپێن حه‌شدا شه‌عبی و پرسا پشكداریا بالێ سیاسی یا حه‌شدێ د حوكمه‌تا نوو یا ئیراقێ دا ئێك ژ بابه‌تێن سه‌ره‌كی یێن نوكه یه ل مه‌یدانا سیاسی ل ئیراقێ، هه‌ڤپه‌یمانیا فه‌تح كو بالێ سیاسی یێ حه‌شدێ یه د هه‌لبژارتنان دا 17 كورسی بده‌ستڤه‌ئیناینه، د ده‌مه‌كی دا د هه‌لبژارتنێن 2018 دا 47 كورسی هه‌بوون.
د. محه‌مه‌د حه‌یانی، شرۆڤه‌كارێ سیاسی دبێژیت” پرۆسا پشكداریا گرۆپێن حه‌شدێ ب هه‌ر شێوه‌كی بیت د حوكمه‌تێ دا، ناگونجیت ل گه‌ل دستووری و قانوونا هه‌لبژارتنان، چاوان مامه‌له ل گه‌ل حزبه‌كا سیاسی دێ هێته كرن كو بالێ له‌شكری هه‌بیت؟ مه دیت كو هنده‌ك حزبێن سیاسی ئه‌نجامێن هه‌لبژارتنان ره‌تكرن، گرۆپێن حه‌شدێ ترس ژ به‌رژه‌وه‌ندیێن سیاسی و حزبی یێن خوه هه‌بوون، هنده‌ك جاران مه گوه ل گه‌فێن سه‌ركردێن وان گرۆپان دبیت كو گه‌فێن بكارئینانا چه‌كی دكه‌ن، هه‌كه بهێت و پشكپشكانی یا تایفگه‌ری ب دووماهی بهێت كو ب درێژاهیا ده‌مێن بۆری ل سه‌ر وێ چه‌ندێ ژیاینه”.
ره‌وتێ سه‌دری سه‌ركه‌فتیێ ئێكێ یێ هه‌لبژارتنایه و رێبه‌رێ وی ره‌وتی به‌رده‌وام دووپاتیێ ل پێكئینانا حوكمه‌تا زۆرینه‌یا نیشتمانی و نه‌هێلانا كه‌سێن نه رێكخستی دناڤ حه‌شدێ دا دكه‌ت.
موقته‌دا سه‌در ئاماژێ ب وێ چه‌ندێ دكه‌ت كو پێدڤیه گرۆپێن چه‌كدار یێن نه رێكخستی بهێنه هه‌لوه‌شاندن و چه‌كێن وان ب ئاگه‌هداریا فه‌رمانده‌یا گشتی یا هێزێن چه‌كدار راده‌ستی حه‌شدا شه‌عبی بهێنه كرن.
هادی عامری، سه‌رۆكێ هه‌ڤپه‌یمانیا فه‌تح ژی دبێژیت” حه‌شد دێ هه‌ر به‌رگریكار مینیت و هه‌رچه‌ند پێلانگیریان دژی وێ بكه‌ن، دێ هه‌ر ب هێز مینیت و ب هیچ شێوه‌كی ژی داگیرانێ ل سه‌ر ناكه‌ین، ئه‌ڤجا قوربانیا وێ چه‌ندێ چ بیت ژی”.
