PSK پرۆژه‌یه‌كێ بۆ چاره‌سه‌ركرنا پرسا كوردی پێشكێش دكه‌ت
ئه‌ڤرۆ، هۆشه‌نگ تاجر:
پارتا سوسیالیست یا كوردستانێ پرۆژه‌یه‌كێ بۆ چاره‌سه‌ركرنا پرسا كوردی ل توركیا پێشكێش دكه‌ت و د پرۆژێ خوه دا دا به‌حسێ هندێ كریه دڤێت زمانێ كوردی ببیته زمانێ فه‌رمی یێ خواندنێ و پێدڤیه هه‌موو قه‌ده‌غه‌یێن ل سه‌ر ناڤێ كوردستانێ و خه‌باتا پارتێن سیاسی یێن كوردی بهێنه راكرن.
بایرام بۆزیه‌ل جێگرێ سه‌رۆكێ گشتی یێ پارتا سوسیالیست یا كوردستانێ بۆ ئه‌ڤرۆ دیار كر كو پارتا وان ده‌مه‌كه ل سه‌ر چاوانیا چاره‌سه‌ركرنا پرسا كوردی ل توركیا كار دكه‌ت و به‌ری نها وان سه‌ره‌دانا گه‌له‌ك پارتێن سیاسی، رێكخستنێن جڤاكێ سڤیل و كه‌سایه‌تیێن ناسكری ل باكورێ كوردستانێ كرینه و وه‌كو پارتا سوسیالیست یا كوردستانێ وان پرۆژه‌یه‌ك به‌رهه‌ڤ كرینه و د پرۆژێ خوه دا به‌حسێ چاوانیا چاره‌سه‌ركرنا پرسا كوردی ل توركیا و باكورێ كوردستانێ دكه‌ن و گۆت: (بێگومان بۆ هه‌ر كه‌سه‌كێ ئاشكرایه كو پرسا كوردی نها پرسا سه‌ره‌كی یا توركیا یه، چونكو هه‌تا نها پرسا كوردی ل توركیا نه‌هاتیه چاره‌سه‌ركرن و ئه‌و یه‌ك بوویه ئه‌گه‌ر كو توركیا تووشی گه‌له‌ك قه‌یرانێن مه‌زن بوویه، ب تایبه‌تی ژی قه‌یرانا ئابووری، ژ به‌ر هندێ ژی دڤێت پرسا كوردی دوور ژ شه‌ری و ب رێیێن سیاسی و ئاشتیانه بهێته چاره‌سه‌ركرن، ژ به‌ر هندێ ژی به‌ری هه‌ر تشته‌كێ دڤێت ده‌وله‌تا توركیا هه‌بوونا پرسا كوردی ب فه‌رمی قه‌بوول بكه‌ت).
ناڤهاتی ئه‌و یه‌ك ژی دیار كر كو دڤێت زمانێ كوردی ل توركیا ببیته زمانێ فه‌رمی، ل باكورێ كوردستانێ ژی دڤێت زمانێ كوردی ببیته زمانێ فه‌رمی یێ په‌روه‌ردێ، هه‌روه‌سا دڤێت چو ئاسته‌نگی ل هه‌مبه‌ر كار و خه‌باتا پارتێن سیاسی یێن كوردی ل توركیا نه‌مینیت، دڤێت رێ بهێته دان پارتێن كوردستانی ب ناڤێ كورد و كوردستان خه‌باتێ بكه‌ن و نابیت ئاسته‌نگی ل هه‌مبه‌ر خه‌باتا سیاسی یا پارتێن كوردستانێ بهێته دروستكرن و گۆت: (به‌ری نها ژ به‌ر سیاسه‌تا ئاسیمیلاسیۆنێ یا ده‌وله‌تا توركیا ناڤێن گه‌له‌ك ده‌ڤه‌رێن كوردی هاتینه گوهۆرین، دڤێت ناڤێن وان ده‌ڤه‌ران دیسان وه‌كو به‌رێ ببنه كوردی، هه‌روه‌سا دڤێت ده‌وله‌تا توركیا ده‌ستان ژ سیاسه‌تا خوه یا توندوتیژیێ ل هه‌مبه‌ر گه‌لێ كورد ل توركیا و باكورێ كوردستانێ به‌رده‌ت، چونكو بۆ ده‌وله‌تا توركیا ژی هاتیه سه‌لماندن كو ئه‌و نه‌شێن ب زۆلم و زۆرداریێ پرسا كوردی چاره‌سه‌ر بكه‌ن، پرسا كوردی ب شه‌ری و توندوتیژیێ ناهێته چاره‌سه‌ركرن، ئه‌ڤرۆكه پتر ژ هه‌ر ده‌مه‌كێ كورد ل توركیا هشیارن و داخوازا مافێن خوه دكه‌ن).
جێگرێ سه‌رۆكێ گشتی یێ پارتا سوسیالیست یا كوردستانێ ئه‌و یه‌ك ژی دیار كر كو گه‌له‌ك خالێن دی یێن گرنگ ژی د پرۆژێ وان دا هه‌نه و ئه‌و دێ ب فه‌رمی پرۆژێ خوه پێشكێشی هه‌موو هێز و ئالیێن سیاسی و رایا گشتی ل توركیا و جیهانێ كه‌ن، چونكو بۆ هه‌ر كه‌سه‌كێ ئاشكرایه ب چاره‌سه‌ركرنا پرسا كوردی دێ گه‌له‌ك قه‌یرانێن دی یێن نها ل توركیا ژی هێنه چاره‌سه‌ركرن.
