ب گوژمێ پتری دو ملیار دیناران پڕۆژه‌یه‌كێ گه‌شتیاری ل دێره‌لۆكێ دهێته چێكرن
دێره‌لۆك، نه‌وزاد هلۆری:
ب مه‌ره‌ما زێده‌تر خزمه‌تكرنا كه‌رتێ گه‌شتیاری و دابینكرنا ده‌لیڤێن كاری بۆ خه‌لكێ ده‌ڤه‌رێ، ب گوژمێ پتری دو ملیار دیناران پرۆژه‌كێ وه‌به‌رهێنانێ د وارێ گه‌شتیاری دا ل ناوچه‌داریا دێره‌لۆكێ دهێته دروستكرن.
هه‌رمان سدقی، وه‌به‌رهێنه‌ر و خودانێ پڕۆژه‌ی بۆ رۆژناما ئه‌ڤرۆ گۆت: (ب مه‌ره‌ما پێشڤه‌برنا كه‌رتێ گه‌شتیاری ل ده‌ڤه‌رێ، مه قووناغا ئێكێ یا پڕۆژه‌كێ نوو یێ وه‌به‌رهێنانێ د وارێ گه‌شتیاری دا ل ناوچه‌داریا دێره‌لۆكێ ب دووماهی ئینا و كه‌فته د خزمه‌تا گه‌شتاران دا).
زێده‌تر گۆت: (ئه‌و كۆمه‌لگه‌ها گه‌شتیاری ژ چه‌ندین ئۆتێل و مۆتێل و ئاكوا پارك و یاریێن ئاڤێ و یاریا رافینك و خوارنگه‌ه و كافیتریا و چه‌ندین خزمه‌تگوزاریێن دی پێك دهێت و ب گوژمێ دو ملیار و 134 ملین دیناران دهێته بجهئینان، كو دێ خزمه‌ته‌كا باش بۆ كه‌رتێ گه‌شتیاری ل ده‌ڤه‌رێ كه‌ت، دیسا دێ 93 ده‌لیڤێن كاری یێن به‌رده‌وام بۆ گه‌نج و خه‌لكێ ده‌ڤه‌رێ دابین كه‌ت).
گۆتژی: (حوكمه‌تا هه‌رێما كوردستانێ پشته‌ڤانه بۆ چێكرنا پڕۆژه‌یێن گه‌شتیاری، دیسا مه چه‌ندین پڕۆژه و خزمه‌تگوزاریێن نوو یێن گه‌شتیاری ل گه‌لیێ شێرانه دروستكرینه).
