رێنمایێن نوو بۆ مۆهله‌تا چه‌كی دێ هێنه ده‌ركرن
هه‌ولێر، قائید میرۆ:
بڕیاره رێنمایێن نوو بۆ دانا مۆهله‌تا چه‌كی بهێنه ده‌ركرن و به‌رپرسه‌كێ وه‌زاره‌تا ناڤخوه ژی ئاشكرا كر، هه‌وا ده‌ست ب سه‌رداگرتنا چه‌كێ بێ مۆهله‌ت دێ یا به‌رده‌وام بیت و ژلایێ هێزێن ئه‌منیڤه مه‌فره‌زه دێ هێنه پێكئینان بۆ گرتنا وان جهێن چه‌كێ بێ مۆهله‌ت تێدا.
هێمن میرانی، رێڤه‌به‌رێ گشتیێ دیوانا وه‌زاره‌تا ناڤخوه بۆ رۆژناما ئه‌ڤرۆ دیار كر، هه‌وا ده‌ست ب سه‌رداگرتنا چه‌كی ژلایێ هێزێن ئه‌منی ڤه یا به‌رده‌وامه و دێ به‌رده‌وام ژی بیت هه‌تا رێنمایێن نوو ژلایێ حوكمه‌تا هه‌رێما كوردستانێ ڤه بۆ دانا مۆهله‌تا هه‌لگرتنا چه‌كی دهێنه ده‌ركرن و گۆت: “بڕیاره رێنمایێن نوو ژلایێ حوكمه‌تا هه‌رێما كوردستانێڤه بهێنه ده‌ركرن و هه‌تا ئه‌ڤی ده‌می دێ هه‌وا ده‌ست ب سه‌رداگرتنا چه‌كێ بێ مۆهله‌ت یا به‌رده‌وام بیت”.
هێمن میرانی گۆتژی: “د ده‌مێ نوكه دا هه‌موو جهێن كڕین و فرۆتنا چه‌كی هاتینه گرتن و به‌رده‌وام ژی مه‌فرزه‌یێن هێزێن ئه‌منی دێ هێنه دانان، هه‌م مه‌فره‌زه‌یێن هه‌میشه‌یی و هه‌م یێن ده‌مكی هه‌بن بۆ ده‌ست ب سه‌رداگرتنا چه‌كێ بێ مۆهله‌ت و رێك ناهێته دان خه‌لك ژ ده‌رڤه‌ی قانوونێ چه‌كی هه‌لبگریت”.
