سه‌نته‌رێ وه‌رگرتنا په‌یوه‌ندیان ژ بۆ پشته‌ڤانیكرنا رۆژنامه‌ڤانان هاته ڤه‌كرن
سێمێل، دلڤین ره‌شید:
به‌رپرسێ پڕۆژێ سه‌نته‌رێ وه‌رگرتنا په‌یوه‌ندیان بۆ پشته‌ڤانیا رۆژنامه‌ڤانان بۆ رۆژناما ئه‌ڤرۆ دیار كر، رێكخراوا ستێپ بۆ دیموكراسی و هه‌لبژارتنان یاداشتناما لێكتێگه‌هشتنێ ل گه‌ل هه‌ژماره‌كا رێكخراوێن هه‌رێما كوردستانێ ل دۆر هه‌ژماره‌كا چالاكیێن هه‌ڤپشك ئێمزا كر، كو گرێدای خورتكرنا ئازادیا راده‌ربڕینێ و ئازادیا راگه‌هاندنێ و پاراستنا مافێن مرۆڤی یه د ده‌مێ رۆمالكرنا قه‌یرانان دا ل پارێزگه‌هێن هه‌رێما كوردستان و ئیراقێ.
مافپه‌روه‌ر دلگش سادق، به‌رپرسێ پڕۆژه‌ی گۆت: “ئه‌و سه‌نته‌ره ب هه‌ڤكاری ل گه‌ل سه‌ندیكا رۆژنامه‌ڤانێن كوردستانێ لقێ دهۆكێ هاته ڤه‌كرن، ئه‌م وه‌ك رێكخراو وان سكالایان ب رێیا خوه دێ گه‌هینینه سه‌ندیكا رۆژنامه‌ڤانێن كوردستانێ و ئه‌و ژی دێ دووڤچوونێن یاسایی بۆ وان كه‌یسان كه‌ن، ئه‌ڤ سه‌نته‌ره دێ بۆ ماوێ 10 مه‌هان كه‌ڤیته كاری و هه‌ژماره‌كا كارمه‌ندێن بسپۆر و یاسازان دێ كار تێدا كه‌ن، پێخه‌مه‌ت خۆرتكرنا مافێ رۆژنامه‌ڤانان ل كوردستان و ئیراقێ”.
