مه‌سرور بارزانی: هه‌ڤخه‌مم ل گه‌ل كه‌سوكارێن قوربانیان
سه‌رۆكێ حوكمه‌تا هه‌رێما كوردستانێ ل دۆر تۆپبارانكرنا ده‌ڤه‌را په‌ره‌خێ ل زاخۆ تویته‌ك به‌لاڤكر و تێدا گۆت” هه‌ڤخه‌مم ل گه‌ل كه‌سوكارێن قوربانیان”.
مه‌سرور بارزانی، سه‌رۆكێ حوكمه‌تا هه‌رێما كوردستانێ د پێگه‌هێ خوه یێ تایبه‌ت
ل سه‌ر تۆرا جڤاكی یا تویته‌ری به‌لاڤكر” تۆپبارانكرنا هاڤینگه‌هكا زاخۆ ژ ئالیێ هێزێن توركی ڤه، كو چه‌ندین كه‌سێن سڤیل بووینه قوربانی، ب توندرین شێوه شه‌رمزار دكه‌م”.
هه‌روه‌سا راگه‌هاند” وه‌زیرێ ساخله‌میێ د. سامان به‌رزه‌نجی من هنارته جهێ تۆپارانكرنێ و من ل گه‌ل سه‌رپه‌رشتیارێ ئیدارا سه‌ربخوه یا زاخۆ گوهدار شێخۆ ئاخڤتیه بۆ وێ چه‌ندێ هه‌ر چ پێدڤی بیت بۆ برینداران و وان خێزانێن ئه‌زیزێن خوه ژ ده‌ستداین، ئه‌نجام بده‌ن”.
سه‌رۆكێ حوكمه‌تا هه‌رێمێ ئه‌وژی به‌رچاڤكر” هێرشكرن ل سه‌ر خه‌لكی سڤیل، چ بیانوویه‌ك بۆ نینه، ئه‌ڤ جۆره روودانه چه‌ندین جاره دووباره دبن، له‌وما پێدڤیه ئه‌ڤ هێرشه ب راوه‌ستن، ئه‌م ل گه‌ل حوكمه‌تا فیدرالی د هه‌ماهه‌نگیێ داینه بۆ ئه‌نجامدانا ڤه‌كۆلینه‌كا هوور و به‌رفرهه”.
گۆت ژی” هه‌رێما كوردستانێ، به‌رده‌وام هاتیه راكێشان بۆ ناڤ شه‌رێ د ناڤبه‌را توركیا و PKK كو زیان و ئازارێن مه‌زن گه‌هاندینه وه‌لاتیێن مه و پێدڤیه دووماهی پێ بهێت”.
ژ ئالیه‌كی دی ڤه، مه‌سرور بارزانی، سه‌رۆكێ حوكمه‌تا هه‌رێما كوردستانێ په‌یامه‌كا ڤیدیۆیی ب زمانێ ئه‌ره‌بی ئاراسته‌ی گه‌لێ ئیراقێ و كه‌سوكارێن قوربانیێن تۆپبارانكرنا گوندێ په‌ره‌خێ كر و ئه‌ڤه ژی ده‌قێ وێ یه:
خوشك و برایێن ئیراقی یێن قه‌در گران.. ب ناڤێ خوه و حوكمه‌تا هه‌رێمێ و گه‌لێ كوردستانێ، سه‌ره‌خوه‌شیێ ل خوه و كه‌سوكارێن شه‌هیدێن كاره‌ساتا په‌ره‌خێ دكه‌ین، هیڤیدارم ژ خودێ مه‌زن ب به‌هه‌شتا خوه یا به‌رین شاد بكه‌ت و هیڤیا زوو چاكبوونێ بۆ برینداران دخوازم و هه‌دارێ و ئارامیێ ب كه‌سوكارێن وان بده‌ت.
بۆ پاراستنا ئاخ و گیانێ هه‌موو ئیراقیان و ب دووماهیئینان ب ڤان پێشێلكاریان، مه پێدڤی ب هه‌ماهه‌نگیه‌كا زێده‌تره د ناڤبه‌را حوكمه‌تا فیدرالی و حوكمه‌تا هه‌رێما كوردستانێ و جڤاكێ نێڤده‌وله‌تی.
ئه‌م یێن ل گه‌ل هه‌وه و دبه‌رهه‌ڤین بۆ پێشكێشكرنا هه‌ر هاریكاریه‌كێ بۆ كێمكرنا ئێش و ئازارێن هه‌وه.
