نێچیرڤان بارزانی:پێدڤیه له‌شكری توركی و چه‌كدارێن PKK شه‌ر و پێكدادانان رابگرن
سه‌رۆكێ هه‌رێما كوردستانێ، سه‌باره‌ت تۆپبارانكرنا سنوورێ زاخۆ په‌یامه‌ك به‌لاڤكر و تێدا راگه‌هاند، پێدڤیه له‌شكرێ توركیا و چه‌كدارێن PKK شه‌ر و پێكدادانان رابگرن و ئێدی نه‌بنه هۆكارێ كوشتن و وێرانكاریێ ل ده‌ڤه‌رێن سنووری.
ده‌قێ په‌یاما سه‌رۆكێ هه‌رێما كوردستانێ
گه‌له‌ك ب توندی تاوانا تۆپبارانكرنا سنوورێ زاخۆ شه‌رمزار دكه‌ین كو بوویه ئه‌گه‌رێ گیان ژده‌ستدانا هه‌ژماره‌كا وه‌لاتی و گه‌شتیارێن سڤیل یێن ده‌ڤه‌رێن جودا ژ ئیراقێ و برینداربوونا هه‌ژماره‌كا دی.
دووباره‌بوونا تۆپبارانكرنێ و به‌رده‌وامیا شه‌ر و پێكدادانێن له‌شكرێ توركیا و چه‌كدارێن PKK ل سنووران، ب تمامی یا ره‌تكریه وجهێ قبوولكرنێ نینه و ئێمناهی و سه‌قامگیریا هه‌رێما كوردستانێ و سنوورێ نێڤده‌وله‌تیێ ئیراقێ شێواندیه، هه‌روه‌سا بوویه ئه‌گه‌رێ ۆلكرنا سه‌دان گوندێن ده‌ڤه‌رێ.
پرسه و سه‌ره‌خوه‌شیێ ئاراسته‌ی خێزان و كه‌سوكارێن قوربانیان دكه‌ین و هه‌ڤده‌رد و هه‌ڤخه‌مێن وانین، هیڤیا زوو چاكبوونێ بۆ برینداران دخوازین. نه‌خوه‌شخانه و ئالیێن په‌یوه‌ندیدارێن هه‌رێما كوردستانێ هه‌موو هاریكاری و خزمه‌تگوزاریه‌كا پێدڤی پێشكێشی برینداران دكه‌ن.
پێدڤیه له‌شكرێ توركیا و چه‌كدارێن PKK شه‌ر و پێكدادان رابگرن و ئێدی نه‌بنه هۆكارێ كوشتن و وێرانكاریێ ل ده‌ڤه‌رێن سنووری. دڤێت حوكمه‌تا فیدرالی یا ئیراقێ ژی هه‌موو رێكارێن پێدڤی بگریته به‌ر بۆ رێگریكرنێ ل دووباره‌بوونا وان تاوانان و ژ ئاخا ئیراقێ گه‌ف ل ئێمناهیا وه‌لاتێن ده‌وروبه‌ر نه‌هێنه كرن.
